Arco xtuny Tito napni chop cós ni rasacgoluʼ ni góc ló dzú ni see, goxeʼsi buñ nan que radzakni né ni ná la Biblia. Arco xtuny Tito nacni toib prueby que guirá ni sieed ló la Biblia rac cumplirni.

Par ló íz 30 de ló xtzúno, gobierno xtuny Roma godiñani Britania, Galia, (Francia) dada Egipto, guirá lagarycu bibanyibu sacró né gopyibu ni biquiinyibu. Per toib gudx ni goyoʼ sitgoluʼ diti gon Roma xi ñony né láani: láani ngú gudx Judea.

Encyclopedia of Ancient Rome rabexa: «Goxeʼsi gudx ni buny mandary Roma bireʼyibu contra gobierno ni buny mandary layibu xomod buny gudx Judea láani. Buñ judíos bidzuitzgoluʼyibu né ni buny mandary layibu portín diti gocyibu buñ xcudxyibu né diti gopyibu respet costumbres xtunyibu. Né Roma diti buny guantary ni buny buñ judíos». Xidalyibu golésyibu toib mesías político ni nabeʼ layibu xan xomandary Roma né ñony que Jerusalén ñac xomod nírcu. Per ló íz 33, Jesucristo goniʼ que Jerusalén sanitlóni.

Jesús goniʼ: «Sadxin dzú órni xi enemiglo sagoo looy né stac ni nadoxcuch punt; sagooyibu looy por guirá lad. Looy né guirá buñ xcudxlo sacantaʼyibu lóoto layoo, né diti sasianyibu toib guiee loguiaʼ stoib guiee» (Lucas 19:43, 44).

Ni goniʼ Jesús bidziguiagoluʼ xpiimbu láani. Chop govitz después laʼga cabiʼyibu templo de gudx Jerusalén, toibtica xpiimbu goniʼ: «Mextra, ¡bibiʼ balaati sacró nac guiee reʼ né yoʼ reʼ!». Né gopyibu razón, portín tipnés guiee xtuny templo góc sioʼolni midid 11 metros, 5 metros xilagni né 3 metros nasoʼni. Per Jesús cuapy layibu: «Sadxin dzú ma diti sioʼ guiee loguiaʼ guiee ni cabiʼto nigoreʼ. Guiráni sanitlóni» (Marcos 13:1; Lucas 21:6).

De ngú goniʼbu: «Órni guibiʼto que soldad ma bigoo gudx Jerusalén, colguidudy cuent que ma bidxin dzú guinitlóni. Órcu, ni noʼ lainy gudx Judea, guixony tzee laidy dainy; ni noʼ lainy gudx Jerusalén, nimaca guireʼ de lagarycu, né ni noʼ laidy dainy diti guibiguet lainy gudxcu» (Lucas 21:20, 21). ¿Góc cumplir ni goniʼ Jesús la?

Por 33 íz, buñ judíos buny guantaryibu gobiernos xtuny Roma. Después, ló íz 66 procurador xtuny gudx Judea, Gesio Floro, golanbu bidxiich xtuny templo. Ngú bunyxiroʼ láani. Órcuca buñ judíos gosaló godíilyibu lainy gudx Jerusalén, né bigaityibu guirá soldad romanos né goniʼyibu que Roma ma diti gony mandary layibu.

Midid tzón beʼo después, más de 30.000 soldad romanos, ni goyoʼ xan xomandary, Cestio Galo, seeyibu gudx Jerusalén par nanitlóyibu láani. Bioʼyibu lainy gudxcu par nacantaʼyibu toibtica muro xtuny  templocu. Tisintiempsi seeyibu. Órcuca goynal buñ judíos layibu. Ndeʼ buny que labúu nasobyibu consej ni bidudy Jesús que nareʼyibu gudx Jerusalén né ñeeyibu laidy dainy, ni noʼ stiplad guʼuc Jordán (Mateo 24:15, 16).

Stoib ízcu, Roma buny mandary guirá soldad ñee gudx Judea stoib né ni gosanir nislóyibu góc laa Vespasiano né xiingaʼnbu Tito. Per después ni goity emperador Nerón ló íz 68, Vespasiano bibiguetbu Roma par gacbu emperador, né ma xiimbu Tito gosanir nisló 60.000 soldad ni see par guicaló gudx Judea.

Ló beʼo juny íz 70, Tito buny mandary guirá soldad xtuny par nacantaʼ yac xtuny gudx Judea né ñonyibu toib leʼ de stac ni nadoxcuch punt, bigooyibu gudx Jerusalén 7 kilómetros. Ló tzón beʼo después guirá soldad romanos goleʼyibu ni goyoʼ gudx Jerusalén né bisaʼijyibu gudxcu né templocu. Xomod goniʼ Jesús, diti bisianyibu guiee loguiaʼ guiee (Lucas 19:43, 44). Ralooyni, «midid 250.000 né 500.000 buñ goity lainy gudx Jerusalén né guirá gudx ni goyoʼ rolooni».

Ló íz 71, Tito bibiguetbu Italia, né gudx Roma bisanadx láabu. Guiránac gudxcu bireʼ, buny toib lanii ni dipa ma goyoʼ dzú góc lainy gudxcu portín bunyibu gan.

Guirá buñcu bidziguiagoluʼyibu órni godudy nislóyibu cós ni rasac lainy cay xtuny gudx Roma. Nislóyibu godudy bark, camión de guerr né stipnés cós ni goleʼyibu lainy templo xtuny gudx Jerusalén.

Ló íz 79 goity Vespasiano bixios Tito, órcu ma láabu gócbu emperador, per chop íz después tisintiempsi goitybu. Domiciano buchbu goyoʼ xalagarybu né ló goxeʼsi tiemp bisaʼbu toib arco par nasetnaladxbu Tito.

Guirá íz xidalguixo buñ riee rabiʼ Foro ni noʼ gudx Roma ronoʼ Arco xtuny Tito. Tipnés buñ rony pensary que nacni toib cós de arte; stipnésyibu rasanadxyibu galnadip ni gop gudx Roma, né stipnésyibu rabiʼ láani xomod toib cós par guisetnaladxyibu que buny ganaryibu gudx Jerusalén né binitlóyibu templo xtunyni.

Per par toib buñ ni rasuidytzay la Biblia, Arco xtuny Tito rasacgoluʼni. Arco reʼ raslooy que guirá profecías ni sieed ló la Biblia diti rachéni, labúu gapno confianz láani portín sieedni de Dios (2 Pedro 1:19-21).