Zezi seli kɛ bé bó Ɲanmiɛn Sielɛ’n i jasin fɛ’n mɛn wunmuan’n nun. I ndɛ sɔ’n kpɛn su andɛ. (Matie 24:14) Daniɛli fluwa’n kle kɛ Ɲanmiɛn Sielɛ’n ti awa kun. Awa sɔ’n fin Ɲanmiɛn. Daniɛli fluwa’n i ndɛ tre nɲɔn su’n kan famiɛn fanunfanun nga kɛ ɔ fɛ i Babilɔninfuɛ’m be blɛ su lele andɛ’n, bé síe mɛn’n be ndɛ. I ndɛ mma 44 se kɛ:

“Ɲanmiɛn m’ɔ o nglo lɔ’n , ɔ́ táka sielɛ kun mɔ be su nunnunmɛn i le-ɔ. Yɛ sielɛ sɔ’n su yoman nvle uflɛ fi i liɛ. Ɔ́ núnkun famiɛn diwlɛ kwlaa sɔ mun, yɛ ɔ́ yó maan be su tranman lɛ kun, kpɛkun i ngunmin ká lɛ tititi.”

Biblu’n nun ndɛ mma sɔ’n, ɔ nin uflɛ wie mun ekun be kan kɛ Ɲanmiɛn Sielɛ’n wá sín klɔ sran’m be famiɛn dilɛ’n i osu. Kpɛkun, ɔ́ yó maan fɔundi trán asiɛ’n su. Maan e kan sa nga bé wá jú asiɛ’n su’n, be nun wie’m be ndɛ.

Kɛ asiɛ’n wá káci lika klanman’n, sran’m be su wuman kun. Ɲanmiɛn Zoova m’ɔ yili e’n, yɛ ɔ kannin sɔ-ɔ.

• BE SU KUNMAN ALƐ KUN

  Jue Mun 46:9: “[Ɲanmiɛn] yo maan alɛ kunlɛ’n wie asiɛ wunmuan’n su. Ɔ bubu ta’n nin cua’n be nun. Ɔ yra alɛ kunlɛ kakaklolo mun sin nun.”

  Sran’m be fa sika kpanngban be fa wlɛ i alɛ kunlɛ ninnge’m be yilɛ’n nun. Sɛ be yaci alɛ kunlɛ’n, bé fɛ́ i sɔ sika’n nin be blɛ’n bé yó be wiengu’m be ye. Ɲanmiɛn Sielɛ’n wá yó maan klɔ sran’m be su kunman alɛ kun. Bé yó be wiengu ye.

• SRAN’M BE SU TƆMAN TUKPACƐ KUN

  Ezai 33:24: “[Sran] fi su seman kɛ: ‘N kpinndinman.’”

  Sran fi su seman kɛ ɔ le awlɛn ba ya, annzɛ kansɛli, annzɛ jɛkuajo, annzɛ tukpacɛ uflɛ. E su kɔman dɔɔtrɔ kun, yɛ e su nɔnman ayre kun. Cɛn wie lele’n, sran’m be su tɔman tukpacɛ kun.

• AWE SU KUNMAN SRAN KUN

  Jue Mun 72:16: “Ble nin i wunsu ninnge’m bé bú asiɛ’n su, bé bú oka’m be ti’n su.”

  Asiɛ’n su ninnge’m bé yó ye. Sran’m be ngba bé ɲán aliɛ kpa bé dí. Awe su kunman sran kun.

• SA YALƐ, NIN WIE’N BE SU TRANMAN LƐ KUN

  Sa Nglo Yilɛ 21:4: “[Ɲanmiɛn] núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.”

?Sa sɔ mɔ Biblu’n kan be ndɛ’n, bé jú sakpa? Kɛ sran sunman be kanngan ndɛ sɔ’m be nun’n, ɔ yo be fɛ. Sanngɛ, be lafiman su kɛ e kwla ɲan nguan m’ɔ leman awieliɛ’n. Sɛ be lafiman su’n, nán be ɲinfu-ɔ. Afin, be nin a wunmam sran kun m’ɔ wuman le’n naan se kɛ ɔ́ kɛ́n i su ndɛ klé be.

Fɔ o klɔ sran’m be nun. Be wun be ɲrun dan. Yɛ Be wu. I sɔ sa’m be o sran’m be su w’a cɛ. Ɔ maan, sran sunman be bu i kɛ i sɔ’n ti anannganman. Sanngɛ, kɛ Ɲanmiɛn Zoova yí klɔ sran’n, nán like ng’ɔ sunnzunnin’n yɛ ɔ o lɛ-ɔ.

Kɛ ɔ ko yo naan y’a lafi ndɛ sɔ’m be su’n, Ɲanmiɛn seli kɛ: “Kɛ ndɛ ng’ɔ fin min nuan fite’n ɔ́ yó sɔ-ɔ. Ɔ su sɛmɛn i sin min wun wa sa ngbɛn, saan ɔ́ yó min klun sa’n, saan ɔ́ yó like nga ti yɛ n sunmɛnnin i’n.”—Ezai 55:11.

Biblu’n se kɛ Zoova ti Ɲanmiɛn “m’ɔ kwlá buaman ato’n.” (Titi 1:2) Ɲanmiɛn bɔbɔ yɛ ɔ seli kɛ ɔ́ yó ninnge sɔ mun mán klɔ sran mun-ɔn. I sɔ’n ti, ɔ fata kɛ e bu kosan yɛ’m be akunndan: ‘?Kɛ nga Ɲanmiɛn fa kannin’n sa’n, klɔ sran kwla ɲan anannganman nguan sakpa asiɛ’n su? ?Ngue yɛ é yó naan like nga Ɲanmiɛn waan ɔ́ yó mán klɔ sran mun’n, e dunman w’a tɛ nun wie-ɔ? Sɛ a kanngan ndɛ akpasua nga be bɛ i sin’n be nun’n, á wún kosan sɔ’m be su tɛlɛ’n.