Ankankinem ḇeḇye Karajan Allah neḇeḇaryas ro supswan ḇesiper, raris ḇardadi Yesus ḇyena. (Matius 24:14) Syap Daniel ikofenḇair Karajan ine na ḇekif yaiso Allah I. Daniel fasal ḇeḇe 2 ya, naser ḇardadi kuker pamarintahan snonkaku ḇepoik sya ro Babilon ḇero fyor iwara isof ro fafisu koḇedine. Daniel 2 mnuk 44 ikofenḇair rosai nari ḇeḇejadi ro fafisu iyama:

”Allah ḇepoik faro nanki nari ḇyawes karajan oso na ḇepok ḇeḇemkokḇa. Karajan ani na ḇyeḇefadwer ḇa faro er ḇesena. Karajan ani nari imkokpres ma ifrur mnai karajan ḇese anna kam. Karajan ani iso monda nari ḇeyores nako pdef isof fyoro.”

Ḇardadi ine ma ḇese ro Refo fyasnaḇair Karajan Allah nari ḇyepoik fadwer karajan  snonkaku anna kam ma nari ḇyuk aski ma ifrur supswan ine ipyum kaḇer. Na imnis rariso kankenem koḇena fyor Karajan Allah ḇyepoik? Rwama kawos asas ḇeḇeso ḇepyum kaku kniko wer na nḇendarirya.

• MAMAMUN NARI NASYA WER ḆA

  Mazmur 46:9: ”[Allah] na ifrur mamamun ro supswan ine fa namnai. Pyankar saren ikoi ma kyakok bom na; ryab kerete-kereta sḇuk mamun na kuker for.”

  Kwarapan rariso dunya ine fyor pipi ma ḇaḇekir nakam kirine sḇuk fa sikfrur roi sḇukimamun na fa nafnoḇek snonkaku, ḇape sḇukmun si ḇa! Iso nari ḇeḇejadi fyor Karajan Allah ḇyepoik.

• DAFDUF NARI NASYA WER ḆA

  Yesaya 33:24: ”Snonkaku osoḇaḇeri ḇeḇarek rodiwa nari ikofen: ’Yadufe.’”

  Wawasen kada snonkaku ḇero supswan ine na siduf ḇarmor, kanker, malaria, ma dafduf ḇesena ḇa. Rum ḇeduf ma aryawin nari sfandun na wer ḇa. Inja, ro fafisu iyama snonkaku sya nari siprei pdef.

• SNONKAKU NARI SIBISER ḆA

  Mazmur 72:16: ”Mor ḇesur nabor nari nasya ro supswan; bonkor urek bon na nasya nabor kaku.”

  Supswan ine nari ḇyuk roḇean nabor ḇe snonkaku sya kam, ma mansei monda na sisma roḇean. Snonkaku osoḇaḇeri nari ibiser wer ḇa ḇaido nya gisi ḇa.

• DAFDUF, SNE ḆEFAFARDUN, MA MARMAR NARI NASYA WER ḆA

  Fasasna faro Yohanes 21:4: ”[Allah] nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako. Roi ḇeḇor ḇekwar napromes.”

  Ine kyurfasna nari kosma kankenem ḇemnis kaku isof fyoro-fyoro ro supswan ḇepyum kaku! Naiso Manḇedaw ḇesaswar koḇedi, Allah Yahwe, ḇyeasas na.

Asas nane mafafu monda rirya ke? Snonkaku sya kam simarisen sna kankenem ḇemnis Refo ikofen anna, ḇape snonkaku ḇebor sya soḇe kankenem fyoro ine samswen fa skarana. Ine roi ḇefrur kanandor snonkaku sya ḇa snar snonkaku osoḇaḇeri ḇesma kankenem ḇerarirya ḇa.

Ro fawar snonkaku rofyor iwara sya, snonkaku sḇewomen faro sasar ma marmarya. Snonkaku na simkeiburo dafduf, kandera, ma samswen ya ḇa, inja snonkaku sya sḇaḇir kankenem koḇena ryadine monda. Ḇape roi nane Yahwe marisen Ḇyena faro snonkaku sya ḇa.

Insama kokyar kaku faro asas Ḇyena, Allah ikofen bo doḇe, ”[Wos Ayena] nari nkaḇer ḇe aya ḇa kuker bonoḇa, rosai yamarisen na nari yafrur kaku na fa ndarirya, ma rosai yakofenna na yafrur rarirya.”​—Yesaya 55:11.

Refo ikofen Allah Yahwe ima ”ipok isrer ḇa”. (Titus 1:2) Snar Allah ḇyeasas kwar roi ḇepyum ine, kwarapan kada: Snonkaku sya na sikenem fyoro ro supswan ḇeḇeasas kwar ani ke? Rosai kofrur ya insama kosma barakas nane? Fakfuken disuru suine nari neḇekarem ro artikel ḇeuserya.