Ol Promes We Bambae Oli Kamtru
Ol man blong God oli stap talemaot gud nius blong Kingdom long olgeta ples long wol, olsem we Jisas i bin talem. (Matiu 24:14) Buk blong Daniel i talem se Kingdom, hem i gavman blong God. Japta 2 blong buk ya i tokbaot profet tok long saed blong ol defdefren gavman, we oli rul stat long Babilon bifo kam kasem tede. Vas 44 i tokbaot samting we bambae i hapen long fiuja, i se:
“God ya we i stap long heven bambae i stanemap wan king we rul blong hem bambae i no save finis samtaem. Bambae i no gat wan king i save winim hem. Bambae hem i save flatemgud paoa blong ol narafala king, nao bambae hem i rul oltaem gogo i no save finis.”
Profet tok ya mo sam narawan bakegen oli talem se, Kingdom blong God bambae i spolem ol gavman blong man, mo Kingdom ya nomo bambae i rul long ol man long wol. ?Laef bambae i olsem wanem taem Kingdom i rul? Hemia sam long ol nambawan promes we bambae oli kamtru i no longtaem.
-
I NO MOA GAT FAET
Ol Sam 46:9: “[God] i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”
!Traem tingbaot se wol ya bambae i olsem wanem sipos ol man oli no moa yusum mane mo save we oli gat, blong wokem ol tul blong faet we i kilim man i ded, be oli yusum nomo blong givhan long olgeta! Hemia samting we bambae i kamtru taem Kingdom blong God i rul.
-
I NO MOA GAT SIK
Aesea 33:24: “Bambae i no moa gat man . . . we i save talem se hem i sik.”
Bambae i no moa gat man i kasem sik blong hat, kansa, malaria, mo sam narafala sik bakegen. Bambae i no moa nidim ol hospital mo meresin. Long fiuja, ol man long wol bambae oli gat gudfala helt.
-
I GAT FULAP KAKAE
Ol Sam 72:16: ‘Bambae i gat plante kakae we ol hil oli fulap gud long hem.’
Graon bambae i givim kakae we i naf long evriwan. Bambae ol man oli no moa hanggri mo oli gat gudfala kakae.
-
I NO MOA GAT KRAE, DED, MO SOA LONG BODI
Revelesen 21:4: “[God] bambae i ravemaot wota blong ae blong olgeta, mo bambae i no moa gat man i ded, mo bambae man i no moa krae from we hem i sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”
!Hemia i min se bambae ol man oli laef olwe long paradaes long wol! Hemia nao promes blong Jehova, we i wokem yumi mo i lavem yumi tumas.
TOK YA BAMBAE I KAMTRU
?Olsem wanem? ?Ol promes ya oli olsem drim nomo? Maet plante man oli agri se ol promes ya we Baebol i talem oli gud, be i had tumas blong bilivim se man i save laef olwe. Yumi no sapraes long samting ya, from we i no gat wan man we i laef olwe samtaem.
Ol man oli lan long laef we i had, from we longtaem finis oli slef blong sin mo ded, oli harem nogud long bodi, mo oli safa. Be samting ya i defren olgeta long plan we Jehova i gat fastaem.
Yumi suagud se ol promes ya bambae oli kamtru, from we God i talem se: “Bambae [tok blong mi] i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”—Aesea 55:11.
Baebol i tokbaot Jehova se hem i “no save giaman.” (Taetas 1:2) Hem nao i promes blong mekem ol gudfala samting ya long fiuja, taswe yumi mas tingting gud long ol kwestin ya: ?Man i save laef olwe long Paradaes long wol? ?Yumi mas mekem wanem blong kasem ol blesing ya? Ol haf we i kam biaen bambae oli ansa long ol kwestin ya.