Mbamba fôé ya Éjôé Zambe a katebane si se, fo’o ve avale Yésus a nga jô. (Matthieu 24:14) Kalate Daniel a liti bia na, Éjôé éte é ne ji Zambe. Kabetôlô 2 ya kalate Daniel a bili nkulan ajô wo liti aval avé beta meyoñ, nge ke bijôé biziñ, bi nga bet a jôé, ataté nnôma Babylone azukui melu mangane ma. A lat a mame ma zu ôsu, éfuse 44 ja jô na:

“Zambe ya yôp a ye telé éjôé j’ aye bo te jañ nnôm éto, nalé fe njôane y’été w’ aye bo te li’i mo me ayoñe bôt afe; ve éjôé éte j’ aye bu’u meyoñe mete mese bitun a di me, a j’ aye tebe nnôm éto.”

Mejô ma, a minkulane mejô mife ya Kalate Zambe mia liti na, Éjôé Zambe ja ye fole bijôé bise y’émo ji a soo mvo’é a évôvoé si va. Ényiñe ja ye bo aya Éjôé Zambe si? Mbamba bengaka’a b’éziñ be mbeme tôébane ba:

• TEKE FE BITA

  Besam 46:9: “[Zambe] a mane mewosan akekui susu’a ya si nyô; a bu’élaé, a tyi’ akoñe bitun; a di’i bewagon bita nduan.”

  Tame simesa’an aval émo e ne bo, nge ba belane moné ase a atyeñe ba belane de den asu na be kôme bikpwelé asu bita na, be jalé miñyiane mi bôt, a lôte na be wôé be! Ngaka’a te ja ye tôéban Éjôé Zambe si.

• TEKE FE AKON

  Ésaïe 33:24: “A môt a to été a ye bo te jô na: M’ akon.”

  Tame simesa’an aval ane émo ja ye bo éyoñe môt a ye beta duk a mintaé y’ôkone nlem, cancer, tit, nge akon afe. Menda mebiañ a mebiañe ma ye bo teke fe mfi. Mvo’é ya minsôn nnôm éto, nje ja yange bôte bese ya si.

• TEKE FE ZAÉ

  Besam 72:16: “Si ja ye bi abui bidi. Afo’o dé da ye yené abôbône beta minkô, Mfefé Nkôñelan.”

  Si ja ye yô bidi asu môt ase, a bôte bese b’aye bu’ubane bie. Zaé a avale ndian ô ne te yian, bia ye mam.

• TEKE FE MINTAÉ, WOÑ, A AWU.

  Nlitan 21:4: “[Zambe] a ye fimi mili’i mese mise map; a awu de aye fe bo; nalé fe ôlun vi aye fe bo, nge ñyôn, nge mintaé: mame ya ôsu me lôteya.”

   Nalé a tinane na, môt ase a ye nyiñe nnôm éto, e mvo’é été e paradis si va! Mame mete mme Yéhôva Zambe, Nté wongan a nye’e bia, a nga kak.

Ye mame ma mese me ne fo’o ve befe’e bia ve’e nga? Akusa bo abui bôt e ne kañese na fatan ényiñe Kalate Zambe a ka’ale é ne fo’o étua abeñ, abui mam da bo na bôt abui be simesane na, e nyiñe nnôm éto a ne jam é ne bo ayaé ya kañese. Nalé a nji bo jame ya kam, amu môt éziñ a nji tame nyiñe nnôm éto asu ya na, a kate bia atinane ya jam ete.

Mona môt a tabeya ôlo ya abé a awu, a nyiñi’i mintaé été, minjuk, a étibela’a abim ayap e ne na, abui e vianeya mane yemban a aval ényiñ ete a da viane simesane na nne ényiñ é ne nalé. Ve nalé a nji ve’ele bo nsôñane Nté wongan, Yéhôva Zambe, a nga sôñ asu môta binam.

Asu na bi nye’e a kañese na bengaka’a bese a nga ve bia ba ye jaléban, Zambe a nga jô a lat a njôan a kuli anyu dé na: “W’ aye bulane be me zesé, ve w’ aye bo jam m’akômbô, a w’ aye ke ôsu jam me nga lôme wô.”​—Ésaïe 55:11.

Kalate Zambe a liti Yéhôva ane Zambe “a se ngule ya laa minsos.” (Tite 1:2) Mbôl a nga ka’ale bia mbamba be mam mete mese asu melu ma zu, bia yiane tu’a nyoñ éyoñe ya fase mame ma: Ye môta binam a ne fo’o nyiñe nnôm éto e Paradis be nga ka’ale si va nga? Jé bia yiane bo asu na bi bu’uban a ngaka’a Zambe a nga bo bia? Mefebe ma tôñe le, wo ye yene mbamba miñye’elane mia ve biyalane ya minsili mite.