Lapurichihóuña uganu buiti le luáguti Larúeihan Bungiu lidan sun Ubóu kei aubei lariñagei Hesusu lidan profesía (Matéu 24:14). Afuranguagüda tumuti líburu tídangiñetu Bíbülia to gíriboun Danieli aban lan gumadi le lúmagiñeti Bungiu Arúeihani le. Lidan kapítulu 2, dariwati aban profesía luáguti liñuraguba lan meha aban arúeihani gabafuti lárigi aban ani gumese lan lúmagiñe binadu Babilónia darí lumoun wadaani. Ariñaga lumuti bérusu 44 kaba lan asusereda lárigiñe:

“Ladügüba Bungiu le siélubei aban arúeihani le siñabei lagünrinchaguni ni lagumadiruni ni aban néchani, günringuarügü lubéi arúeihani ligía sun le líbiri arúeihani sunsuinagubei, ábame ladurarun lun súnwandan”.

Dandu profesía tídangiñeti Bíbülia le kei burí amu, arufudati lagünrinchagubei lan Larúeihan Bungiu sun arúeihani le ubouagubei ani ladügüba lun ñein lan darangilaü ubouagu. Ida luba ibagari lábugiñe Larúeihan Bungiu? Ariha wamá fiu lídangiñe lubuidun burí füramasei le málühalibei agunfulira.

• ÚABEI WURIBU

  Sálumu 46:9. “Gumuguagüdalá [Bungiu] wuribu chülǘ lumoun lagumuhóun larigeirugu ubóu; halagualá burí gimara, günringualá burí eféin, gudala burí karü to lánina wuribu”.

  Ma hamuga lubuidun ibagari ubouagu lun hamuga lun lan híderawagun gürigia layusurúa sun subudi luma ubuñein le ayusurúbei lun tadügǘn burí áruma, adián? Ani ítara luba, lugundun lagunfuliruba füramasei le lábugiñe Larúeihan Bungiu.

• ÚABEI SANDI

  Isaíasi 33:24. “Mariñagunbei ni aban lílana fulasu: ‘Sándiñadina’”.

  Samina humá luagu aban ubóu le ídanti ua lan tisandi anigi, kánserü, libimen hitaü o amu luwuyeri sandi. Lidan aban ubóu ítarati, memegeirunwatu háspitali ni árani. Ligíaba asusereda, buídubei hátuadi sun lílana Ubóu.

• ÚABEI ILAMAÜ

  Sálumu 72:16. “Ñeinlá saragu türigu fulasurugu, gibelá türigu lábulugu burí wübü”.

  Láhüchüguba saragu éigini lun heigin sun gürigia ubouagu ani lafanreinhóuba buidu. Úaalime ilamaü ni magülegu.

• ÚABEI IGARIGU, ASUFURIRUNI NI ÓUNWENI

  Arufudúni 21:4. “Laragahabei [Bungiu] sun háguira; úaalime óunweni ni ayahuni ni íruni ni igarigu, ladüga sügüha furumiñeti burí katei”.

   Mafigoun hañame gürigia ani hawinwanduba lun súnwandan lidan Ubóu danme le paraísuhali. Anihán burí katei le füramase lubéi Heowá, Bungiu hínsiñehabuti le Adügübaliwa, woun.

Saminatün san buíduya lan sun füramasei le lun gayaraabei lan lagunfulirun? Lau sun hínsiñe lan füramasei burí le tídanbei Bíbülia houn hiibe-agei gürigia, hénrenguti houn saragu hádangiñe gunfuranda hamani le mini lubéi ibagari magumuchaditi. Ani maweiriduntu wanigi luagu lira lugundun úagili ni aban gürigia awinwanduti lun súnwandan.

Lühaña gürigia keisi lidamun óunweni luma figóu darí lun hasaminarun saragu lun lan wabagaridun lau gáriti luma asufuriruni wadügǘwa. Gama lumoun, menegeguagubeiti le asuseredubei woun luma le labusenrunbei Bungiu houn gürigia.

Lun lederebugudun wafiñen luagu le füramase láalibei Bungiu woun, ariñagati furangu luagu dimurei le áfuridubei liyumulugugiñe: “Magiribudúnti nun madügüngalei le nabusenrubei, lubaragiñe lira adüga lumuti le nabusenrubei, gúnfuli lumuti le nariñagubei” (Isaíasi 55:11).

Ariñagatu Bíbülia meyeehan lan Bungiu (Titu 1:2). Keiti ligía lubéi adügübalin lubuidun burí füramasei le, buiti lun wararamagun asaminara luagu álügüdahani burí le: “Le san lúgubu gayara lan lawinwandúniwa lun súnwandan lidan aban paraísu ubouagu? Ka lunbei wadügüni lun warihini lagunfulirun sun le füramase láalibei Bungiu”. Líderagubadün leweñegua arütíkulu lun hóunabuni álügüdahani burí le.