E a tataekinaki te rongorongo ae raoiroi ibukin Ana Tautaeka n Uea te Atua ni kabutaa te aonnaba n aron are e taetae ni burabetinna Iesu. (Mataio 24:14) E taekinaki ni bokin te Baibara ae Taniera bwa te Tautaeka n Uea aei bon ana tautaeka te Atua. Iai te taetae ni burabeti ni mwakoro 2 n te boki anne ae taekin tautaeka n aomata tabeua aika mwaaka riki, ke tautaeka n uea, ni moa mairouni Baburon rimoa n uaa ngkai. Ma e kangai kibuna 44 ni kaineti ma te bae e na riki:

“E na katea te tautaeka n uea teuana Atuani karawa ae e na bon aki kamaunaaki. Ao e na bon aki kanakoaki te tautaeka n uea aei nakoia aomata riki tabemwaang. E na urui tautaeka n uea aikai ni kabane ma ni kamaunai, ao tii te tautaeka aei ae e na teimatoa n aki toki.”

E taekinaki n te taetae ni burabeti aei ao tabeua riki aika n te Baibara bwa Ana Tautaeka n Uea te Atua e na onei mwin tautaeka n aomata, ao e na karokoa te mweraoi ao te babaire ae raoiroi nakoia aomata. E na tera aron te maiu i aan te Tautaeka n Uea aei? Aikai tabeua berita aika kamimi aika nang koro bukia.

• E NA AKEA TE BUAKA

  Taian Areru 46:9: “E katoki buaka ni kabutaa te aonnaba [te Atua]. E ototea te kainikatebe ma ni kamaeinikuna te kainiwai, e kabueki kaa ni buaka n te ai.”

  Iangoa aron te aonnaba ngkana taiani mwane ni kabane ma tarena aika kamanenaaki ngkai ibukini karaoani bwaai ni buaka, a a kabonganaaki ibukini kabwaiaia aomata, ao tiaki ae a na mate iai! E na boni koro nanon te berita anne i aan Ana Tautaeka n Uea te Atua.

• E NA AKEA TE AORAKI

  Itaia 33:24: “Akea te tia maeka iai ae e na kangai: ‘I aoraki.’”

  Iangoa aron te aonnaba ae nang akea iai ae e na rotaki n aorakin te buroo, te kaentia, te maraeria, ke aoraki riki tabeua. A nang aki kainnanoaki onnaoraki ma bwainnaoraki. E nang reke te marurung ae kororaoi irouia aomata n te tai ae imwaira.

• E NA AKI TARE TE AMWARAKE

  Taian Areru 72:16: “E na bati te uita n te aonnaba, ao e na taonako i aon taubukini maunga.”

  E na bati te amwarake n te aonnaba ibukia aomata, ao ti na bane ni kona ni karekei. E na akea te baki ao te aoraki ae te bakitaia.

• E NA AKEA TE MARAKI, TE NANOKAWAKI, AO TE MATE

  Te Kaotioti 21:4: “E na kaoa te rannimata ni kabane mai mataia [te Atua], ao e nang akea riki te mate, ke te nanokawaki ke te tang ke te maraki. A a mauna bwaai rimoa.”

   Ae nanona bwa e nang roko te maiu ae kororaoi ae akea tokina n te aonnaba ae bwaretaiti! Anne ana berita ara tia Karikiriki ae tatangira, ae Iehova ae te Atua.

E kangaanga bwa ko na kakoauai baikai? E ngae ngke angia aomata a kakoauaa ae te maiu ae beritanaki ao ni kabwarabwaraaki n te Baibara aei e rangi ni kainnanoaki, ma i aani bukina aika kakaokoro, a bati aika noria bwa e a boni kangaanga otaia n te iango ae te maiu n aki toki. E riki anne ibukina bwa akea temanna ae e a tia n rinanon te maiu anne, ae e na karakina arona nakoira.

A a rangi ni maan aomata n tautoronaki n te bure ao n te mate ao n rinanon te maraki, te rawawata, ao te riribai, ngaia are a a bati aika kakoauaa ae bon aei aron te maiu. Ma tiaki anne ae kantaningaia ara tia Karikiriki ae Iehova ae te Atua, ibukia aomata.

Ibukini buokara ni kakoauaa ae a na boni koro bukin ana berita nako te Atua, e kamataataa ni kangai ni kaineti ma ana taeka: “E na aki okirai ni matebuaka, ma e na boni kakororaoi baike I rangi ni kimwareirei iai, ao e na boni kakororaoa te baere I kanakoa bwa e na karaoia.”—Itaia 55:11.

E kabwarabwaraaki Iehova n te Baibara bwa te Atua ae “aki kona ni kewe.” (Tito 1:2) Kioina ngkai e a tia ni beritani baika raraoi aikai ibukin taai aika imwaira, ti boni wanawana ngkana ti iango ni kangai: A na kona aomata ni maiu n aki toki n te aonnaba ae Bwaretaiti? Tera ae ti riai ni karaoia bwa ti aonga ni kakabwaiaaki n ana berita te Atua? N iteraniba aika imwina ao ko na nori rongorongo aika ibuobuoki aika kaekai titiraki aikai.