Ang maayong balita sang Ginharian sang Dios ginabantala subong sa bug-os nga duta, suno gid sa gintagna ni Jesus. (Mateo 24:14) Ginasugiran kita sang libro sang Daniel sa Biblia nga ini nga ginharian isa ka gobierno sang Dios. Ang kapitulo 2 sina nga libro nagaunod sang tagna parte sa pagbuslanay sang gamhanan nga mga gobierno, ukon ginharian, halin sa dumaan nga Babilonia asta sa panahon naton subong. Ang bersikulo 44 nagasiling parte sa palaabuton:

“Ang Dios sang langit magatukod sing isa ka ginharian nga indi gid malaglag. Ini nga ginharian indi pag-ihatag kay bisan sin-o nga tawo. Dugmukon sini kag laglagon ining tanan nga ginharian, kag ini lamang ang magapabilin sing dayon.”

Ini kag ang iban pa nga mga tagna sa Biblia nagasugid nga buslan sang Ginharian sang Dios ang tanan nga paggahom sang tawo kag magadala ini sang paghidait kag paghiusa sa mga tawo sa duta. Ano ang aton kabuhi kon maggahom na ang Ginharian? Ari ang pila ka promisa nga matuman sa indi madugay.

• WALA NA SING INAWAY

  Salmo 46:9: “Ginapauntat [sang Dios] ang mga inaway sa bug-os nga duta. Ginabali niya ang pana kag ginautod ang bangkaw; ginasunog niya ang mga kangga sang mga hangaway.”

  Imadyina ang kalibutan kon ang tanan nga pagkabutang kag ikasarang nga ginagamit subong sa paghimo sang mga armas gamiton na para makabenepisyo ang mga tawo sa baylo nga patyon sila! Matuman gid ina nga promisa kon maggahom na ang Ginharian sang Dios.

• WALA NA SING BALATIAN

  Isaias 33:24: “Wala sing pumuluyo nga magasiling: ‘Nagamasakit ako.’”

  Imadyina ang kalibutan nga wala na sing nagaantos sa balatian sa tagipusuon, kanser, malaria, ukon iban pa. Indi na kinahanglan ang mga ospital kag mga bulong. May perpekto na nga panglawas ang tanan nga nagaistar sa duta.

• WALA NA SING KAKULANG SING PAGKAON

  Salmo 72:16: “Mangin bugana ang mga uyas sa duta; sa putukputukan sang kabukiran magahapayhapay ini.”

  Ang duta magapatubas sang pagkaon para sa tanan, kag ang tanan makatigayon sini. Wala na sing gutom kag malnutrisyon.

• WALA NA SING KASAKIT, PAGLALAW, KAG KAMATAYON

  Bugna 21:4: “Pahiran [sang Dios] ang tagsa ka luha sa ila mga mata, kag wala na sing kamatayon, ukon paglalaw ukon paghibi ukon kasakit pa. Ang mga butang sang una nagtaliwan na.”

   Nagakahulugan ina sang perpekto nga kabuhi nga wala sing katapusan sa paraiso nga duta! Amo ina ang ginpromisa sang aton mahigugmaon nga Manunuga, si Jehova nga Dios.

Daw imposible bala nga matabo ini? Bisan pa ginahandum gid sang kalabanan nga tawo ang kabuhi nga ginsaad kag ginasugid sang Biblia, madamo ang nabudlayan sa pagpati nga mahimo kita magkabuhi sing wala katapusan. Indi ini katingalahan, kay wala pa gid sing tawo nga nakaeksperiensia sini nga makasugid sa aton.

Ang katawhan naulipon sa sala kag kamatayon kag nakaeksperiensia sang kasakit, pag-antos, kag kabudlayan sa malawig nga tion amo nga madamo nga tawo ang nagbaton nga normal ukon natural na lang ini sa kabuhi. Pero lain gid ini sa katuyuan sang aton Manunuga, si Jehova nga Dios, para sa mga tawo.

Para magsalig pa gid kita nga matuman gid ang tanan niya nga ginpromisa, ang Dios nagsiling: “Indi ini magbalik sa akon nga wala sing katumanan, kundi tumanon sini ang akon luyag, kag pat-od nga magamadinalag-on ini sa ginsugo ko nga himuon sini.”—Isaias 55:11.

Ginasugid sang Biblia nga si Jehova isa ka Dios nga “indi makabutig.” (Tito 1:2) Bangod ginpromisa niya ining matahom nga mga butang sa palaabuton, maalamon gid nga binagbinagon naton ini: Posible gid bala nga mabuhi ang mga tawo sing wala katapusan sa Paraiso nga duta? Ano ang dapat naton himuon para mabaton ang mga promisa sang Dios? Sa masunod nga artikulo sini nga publikasyon, makita mo ang mga impormasyon nga makabulig sa imo nga masabat ina nga mga pamangkot.