كيەلى كىتاپتاعى ورىندالاتىن ۋادەلەر
يسا پايعامبار الدىن الا ايتقانداي، قۇدايدىڭ پاتشالىعى تۋرالى ىزگى حابار بۇكىل جەر بەتىندە ۋاعىزدالىپ جاتىر (ماتاي 24:14). دانيال پايعامباردىڭ جازباسىنان قۇدايدىڭ وسى ۇكىمەتى جايلى بىلەمىز. سونداي-اق بۇل جازبانىڭ 2-تاراۋىندا بىرىنەن كەيىن ٴبىرى پايدا بولاتىن بابىلدان باستاپ ٴبىزدىڭ كۇنىمىزگە دەيىنگى پاتشالىقتار مەن ٸرى مەملەكەتتەر جايلى ايتىلعان. ال اقىر سوڭىندا نە بولاتىنى تۋرالى سول تاراۋدىڭ 44-تارماعىندا جازىلعان:
«سول پاتشالاردىڭ كۇندەرىندە كوكتەگى قۇداي ەشقاشان جويىلمايتىن پاتشالىق ورناتادى. بۇل پاتشالىق باسقا حالىقتىڭ قولىنا وتپەيدى. ول سول پاتشالىقتاردىڭ ٴبارىن قيراتىپ، ٶزى ماڭگى تۇرادى».
وسى جانە كيەلى كىتاپتىڭ باسقا دا پايعامبارلىقتارىنان قۇدايدىڭ پاتشالىعى ادامداردىڭ بارلىق ۇكىمەتتەرىنىڭ ورنىن باساتىنىن جانە جەردى رەتكە كەلتىرىپ، تۇراقتىلىق ورناتاتىنىن كورەمىز. وسى پاتشالىقتىڭ تۇسىندا ٶمىرىمىز
قانداي بولادى؟ قازىر قۇدايدىڭ جۋىردا ورىندايتىن كەرەمەت ۋادەلەرى جايلى بىلەيىك.-
سوعىس بولمايدى
ٴزابۇر 46:9: «[قۇداي] كۇللى جەرجۇزىندەگى سوعىستاردى توقتاتادى، ساداقتى سىندىرىپ، نايزانى دا بىت-شىت قىلادى، سوعىس اربالارىن وتقا جاعىپ قۇرتادى».
قارۋ-جاراق شىعارۋعا جۇمسالاتىن كۇش پەن قىرۋار قاراجات ادامداردى ٶلتىرۋ ٷشىن ەمەس، ولاردىڭ يگىلىگى ٷشىن قولدانىلسا، دۇنيەدەگى جاعداي الدەقايدا جاقسارار ەدى عوي، سولاي ەمەس پە؟! مۇنداي دۇنيەجۇزىلىك بەيبىتشىلىكتى قۇداي پاتشالىعى عانا ورناتادى.
-
اۋرۋ بولمايدى
يشايا 33:24: «ەشكىم: «مەن ناۋقاسپىن»،— دەمەيتىن بولادى».
ادامدار جۇرەك اۋرۋى، قاتەرلى ىسىك نە بەزگەك سياقتى دەرتتەن جاپا شەكپەيتىن، اۋرۋحانالار مەن ٴدارى-دارمەكتەر اتىمەن بولمايتىن كەزدى ەلەستەتىپ كورىڭىزشى. بولاشاقتا ٴدال وسىنداي زامان ورناپ، ەشبىر ادام اۋرۋ دەگەندى بىلمەيتىن بولادى.
-
اشتىق بولمايدى
ٴزابۇر 72:16: «جەر بەتىنە استىق مول شىعادى، تاۋلاردىڭ باسىندا دا اعىل-تەگىل بولادى».
جەر ادامداردىڭ بارلىعىنا جەتەتىندەي ٶنىم بەرەدى، ٵربىر ادامدا اس-اۋقات جەتكىلىكتى بولادى. ازىق-تۇلىك تاپشىلىعى مەن اشتىق مۇلدەم ۇمىتىلادى.
-
قايعى-مۇڭ مەن ٶلىم بولمايدى
ايان 21:4: «قۇداي ولاردىڭ كوزىندەگى ٵربىر جاستى ٴسۇرتىپ تاستايدى، ەندى قايتىپ ٶلىم، جوقتاۋ، زار ەڭىرەۋ مەن اۋرۋ بولمايدى. بۇرىنعى جايتتار قۇرىپ جوق بولدى».
ادامدار كەمەلدى بولىپ، جەر بەتىندەگى جۇماقتا ماڭگى ٶمىر سۇرەدى. سۇيىسپەنشىلىگى مول جاراتۋشىمىز ەحوبا بىزگە ٴدال وسىنداي بولاشاقتى ۋادە ەتىپ وتىر.
قۇداي وتىرىك ايتا المايدى
جوعارىدا ايتىلعان ۋادەلەر ورىندالماس ارمانداي كورىنە مە؟ كيەلى كىتاپتا سۋرەتتەلگەن جارقىن بولاشاق باسىم كوپشىلىكتىڭ اڭسارى بولعانمەن، ولار ماڭگى ٶمىر ٴسۇرۋ دەگەندى اقىلعا سيدىرا الماي جاتادى. بۇلاي بولۋى تۇسىنىكتى دە، سەبەبى ادامزات تاريحىندا ەشكىم ماڭگى ٶمىر ٴسۇرىپ كورگەن ەمەس.
ادام بالاسى كۇنا مەن ٶلىمنىڭ قۇلى بولعاندىقتان، كوز اشقالى بەرى اۋرۋ، قاسىرەت پەن باقىتسىزدىقتىڭ اشتىلىعىن كورىپ كەلەدى. سوندىقتان مۇنداي ٶمىردى ولار تابيعات زاڭدىلىعى دەپ پايىمدايدى. ٴبىراق جاراتۋشىمىز ەحوبا اۋەل باستا ادامزاتتىڭ مۇلدە باسقاشا ٶمىر سۇرگەنىن نيەت ەتكەن ەدى.
قۇداي ٶز ۋادەلەرىن مىندەتتى تۇردە جۇزەگە اسىراتىنىنا ٴبىزدى يلاندىرۋ ٷشىن بىلاي دەگەن: «مەنىڭ اۋزىمنان شىققان ٴسوزىم... ناتيجە بەرمەستەن وزىمە قايتا ورالمايدى. قايتا، مىندەتتى تۇردە ەركىمدى ورىندايدى، نە ٷشىن جىبەرگەن بولسام، سونى جۇزەگە اسىرادى» (يشايا 55:11).
كيەلى كىتاپتا ەحوبا «وتىرىك ايتا المايتىن قۇداي» دەلىنگەن (تيتكە 1:2). ول بولاشاقتا تاماشا جايتتاردىڭ ورىن الاتىنىن ۋادە ەتكەندىكتەن، ٴبىزدىڭ مىنا سۇراقتار جونىندە ويلانعانىمىز دۇرىس: ادامداردىڭ جەر بەتىندەگى جۇماقتا ماڭگى ٶمىر ٴسۇرۋى مۇمكىن بە؟ قۇدايدىڭ ۋادەلەرى جۇزەگە اسقانىن ٶز كوزىمىزبەن كورۋ ٷشىن نە ىستەۋىمىز كەرەك؟ كەلەسى ماقالالاردان ٴبىز وسى سۇراقتارعا جاۋاپ الامىز.