Siulittuutit eqquuttussat
Guutip naalagaaffia pillugu nutaarsiassaq nuannersoq nunarsuarmi tamarmi oqaluussissutigineqarpoq, Jiisusip siulittuineratorluinnaq. (Matthæusi 24:14) Danielimik allakkat Biibilimiittut naapertorlugit naalagaaffik taanna naalagaaffiviuvoq Guutimit toqqarneqartunik naalakkersuisulik. Kapitali 2-mi siulittuutigineqarpoq itsaq Babylonimiit ullumikkumut kingoraartaattunik naalagaaffissuaqartarumaartoq. Siunissaq pillugu versi 44-mi ima allassimavoq:
“Qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.”
Siulittuutip tamatuma allallu Biibilimeersut ersersippaat Guutip naalagaaffiata inuit naalakkersuisui tamaasa taarsissagai nunarsuarmilu pissutsit aaqqissallugit. Taava inuuneq qanoq issava? Neriorsuutit nuanningaartut uku qanittukkut eqquutissapput.
-
SORSUTTOQAQQISSANNGILAQ
Tussiaat 46:10: “[Guutip] nunarsuarmi tamarmi sorsunnerit soraarsikkumaarpai, pisissit nallorumaarpai qalugiusallu aserorterlugit, qamussuit sorsuutit ikikkarumaarpai.”
Takorlooruk aningaasat piginnaanerillu sakkuliornermut maanna atorneqartartut toqoraanermut atorunnaarlugit inunnut iluaqutissatut atorneqartalerpata qanoq issasoq! Neriorsuut tamanna Guutip naalagaaffiata aqutsinerani eqquutissaaq.
-
NAPPARSIMASOQAQQISSANNGILAQ
Esaja 33:24: “Innuttaasoq kinaluunniit oqassanngilaq: ‘Napparsimavunga!’”
Takorlooruk silarsuaq nappaateqarfiunngitsoq, uummallunneq, kræfti, malaria nappaatillu allat naalliuutaajunnaarsimasut. Napparsimmaviit nakorsaatillu atorfissaarutissapput. Peqqilluinnarneq – tassa nunarsuup inuisa siunissaat.
-
NERISASSAALEQISOQAQQISSANNGILAQ
Tussiaat 72:16: “Karrit naammangaartut nunami naasimassapput, qaqqat qaanni aalataarumaarput.” (Testamentitoqaq 1990-imi naqitigaq).
Nunarsuarmi nerisassanik naammattunik pilersuisoqassaaq, kikkullu tamarmik naammatsillutik nerisassapput. Kaattoqaqqissanngilaq.
-
ANNIAATIT, ALIASUNNERIT TOQULU PEERUTISSAPPUT
Saqqummersitat 21:4: ‘Guutip qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq.’
Tassa nunami paratiisiusumi inuuneq naammalluinnartoq naassaanngitsuussaaq! Taama Pinngortitsisitta asannittup, Jehovap Guutip, neriorsorpaatigut.
‘GUUTIUVOQ SALLUSUITSOQ’
Tamakku uppernarpat? Inuit amerlanerit inuuneq Biibilimi neriorsuutigineqartoq kissaatiginartikkaluarlugu assigiinngitsunik pissuteqarlutik naassaanngitsumik inuusinnaaneq paasiuminaatsippaat. Tamanna tupaallannanngilaq, inuummi kialluunniit inuuneq taamaattoq misiginikuunngisaannarpaa.
Inuit qangarsuarlili ajortimut toqumullu inussiaataasimallutillu anniaatinik, naalliuutinik ajornartorsiutinillu artorsartitaasimagamik inuuneq taamaattussaannartut isigilersimavaat. Inuunerli taamaattoq Pinngortitsisitta, Jehovap Guutip, inunnut siunertaanit allaanerulluinnarpoq.
Guutip neriorsuutimi tamakkua tamarmik eqquukkumaarnerannik erseqqissaaffiginiarluta oqaatsini pillugu ima oqarpoq: “Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.” – Esaja 55:11.
Jehova ‘Guutitut sallusuitsutut’ Biibilimi allaatigineqarpoq. (Titusi 1:2) Siunissaq pillugu nuannersunik tamakkorpassuarnik neriorsuuteqarmat silatusaarnerussaaq uku eqqarsaatigigutsigit: Ilumut inuit nunami paratiisiusumi neriorsuutigineqartumi naassaanngitsumik inuusinnaappat? Guutip neriorsuutai iluaqutigiumallugit sussaagut? Atuagassiami matumani quppernerni tulliuttuni apeqqutinut tamakkununnga akissutit iluaqutigissavatit.