Kala kya tangele Jezú m’ukulu, o njimbu yambote ya Utuminu wa Nzambi a mu i tula mwene mu ngongo yoso. (Matesu 24:14) O divulu dya Daniyele di tu tangela kwamba o Utuminu yú unguvulu wa Nzambi. Mu kibatulu kya 2 kya divulu didi, mwala kikanenu ki tanga ma-utuminu a-nda tumina mu ngongo tundé mu utuminu wa Babilonya yokulu katé mu izuwa yetu. O velusu ya 44 i tu tangela ihi ya-nda bhita ku hádya, ixi kiki:

“Maji, mu izuwa ya jisobha jenyiji, o Nzambi ya dyulu wa kà bheka-ku o utuminu ki u xikina dingi ku u jikinisa; o utuminu yú kà u ehela ku bhita dingi bhu maku ma miji yengi; wene kyá wa ká sasujula o ma-utuminu moso’ama anga a-bhwa-ku, maji o wene wa kà xalela ni kutumina mu thembu joso katé ku hádya ni hádya.”

O kikaneku kiki ni ikanenu ya kamukwá i tanga kwila o Utuminu wa Nzambi katula o ma-utuminu a ngongo, wene wa-nda bheka kutululuka ni wembu mu ngongo yoso. Kyebhi kya-nda kala o mwenyu kyoso Utuminu wa Nzambi ki wa-nda tumina o ngongo? Tanga ku lwiji o ima ya-nda dikumbidila ku hádya.

Kiki kilomboloka kwila athu a-nda kala ni mwenyu mu palayizu mu ixi mu mivu ni mixinda sé dizubhilu! Kiki kyene kya tange o Mubhangi wetu wa henda, Jihova Nzambi.

• KI BHWA-NDA KALA DINGI NGELA

  Jisálamu 46:9: “Ita [Nzambi] wa i swikika katé ku maxokolo a’xi; uta wa mufula wa u bhukula, dyonga wa di batula mu kaxi; o makalu a ita wa oha mu túbhya.”

  Xinganeka kyebhi kyeji kala o ngongo se kitadi yoso kyene mu ta mu kubhanga mauta ni jibomba phala kujibha na-ju, a ki tele mu kubhanga imbamba i bheka mbote ku athu! O Utuminu wa Nzambi wa-nda tena kubhanga kiki.

• KI BHWA-NDA KALA MA-UHAXI

  Izaya 33:24: ‘Ki bhwa kà kala mukwa-bhata, wila: nga kata, lémbwa.’

  Xinganeka ixi mwa kambe muthu wa mu tala hadi mukonda thulu ya kate, wala ni kijimbu mu izavu, mba kusaluka (malarya) mba hanji mukonda dya ma-uhaxi a mukwá. Athu ka-nda bhinga ididi ya kusakela mba-phe milongo. Athu oso mu ngongo hádya a-nda kala ni sawidi yambote.

• KI BHWA-NDA KALA NZALA

  Jisálamu 72:16: “Mu ngongo mu kale nzungule ya masa katé ni ku thandu dya milundu.”

   O mavu a-nda bhana idima soko phala o mundu woso, athu oso a-nda zediwa. Ki bhwa-nda kala muthu wa-nda bhela mukonda dya nzala.

• KI BHWA-NDA KALA DINGI NDOLO, MUKÔNDO MBA KUFWA

  Dijingunwinu 21:4: “[Nzambi] u a kondona o masoxi moso ku mesu mâ! Ki ku kala dingi kùfwa, nè ngó mukôndo, mba kudila, mba kukata. Mukonda ima ya dyangèle-ku, ya bhiti.”

O kwila yiyi nzoji ngó? Athu avulu a xikina kwila o Bibidya ia kanena ima yambote ya-ndala athu, maji kwala we athu avulu kejiya se o kukala ni mwenyu wa kalela-ku, kukala kyebhi. Kiki kidi, mukonda ki bhwala muthu mu ngongo, wa kexile kyá ni mwenyu wa kalela-ku phala a tene ku tu jimbulula o maka enyá.

Athu mu ngongo ene mu a bhikisa kyavulu mu mivu yavuu kwala o kituxi, ni kufwa, a kalakala kyavulu, a a talesa hadi ni ku a zukutisa. Mukonda dya kiki, a xikina kwila o mwenyu wene mwene yú kifwa ejidila kyá. Maji kiki ki kyene kya-ndalele o Mubhangi wetu, Jihova Nzambi kyoso kya bhange o athu.

Phala ki tu kale ni jiphata mu yoso ya tu tangela Nzambi, mwene wexi: “Kyene ki kya kà vutuka kya hatu kokwami maji kya kà bhanga kyoso kya ngi wabhela eme, kale kyoso ki nga ki tumukixina kyene ki bhita.”—Izaya 55:11.

O Bibidya i tanga kwila Nzambi “ka moneka makutu.” (Tito 1:2) Kuma mwene wa kanena o ima yoso yiyi kwila ya-nda bhita ku hádya, kima kyambote kwijiya se: O kwila athu mu ngongo a tena mwene kukala ni mwenyu wa kalela-ku mu Palayizu mu ixi? Ihi i twa tokala o kubhanga phala tu mone o mabesá a-nda bhana Nzambi? O jimbandu jala ku pholo mu kadivulu kaka, ja-nda kukwatekesa kwijiya o itambwijilu ya ibhwidisu yiyi.