တၢ်အၢၣ်လီၤအီလီၤလၢ ကဟဲလၢထီၣ်ပှဲၤထီၣ်နီၢ်ကီၢ်
ဒ်ယ့ၣ်ၡူးတဲပာ်စၢၤဝဲအသိး တၢ်သးခုကစီၣ်လၢ ဘၣ်ဃးဒီး ယွၤအဘီအမုၢ်န့ၣ် ဘၣ်တၢ်စံၣ်တဲၤတဲလီၤအီၤလၢ ဟီၣ်ခိၣ်ဒီဘ့ၣ်လီၤ. (မးသဲ ၂၄:၁၄) လံာ်ဒၤနံးယ့လး ပာ်ဖျါထီၣ်ဝဲလၢ ပှၤလၢဒုးအိၣ်ထီၣ် ဘီမုၢ်အံၤန့ၣ် မ့ၢ်ဝဲကစၢ်ယွၤလီၤ. တကးဒံးဘၣ် ဒၤနံးယ့လး အဆၢဒိၣ် ၂ န့ၣ် တဲပာ်စၢၤဝဲဘၣ်ဃးဒီး ဟီၣ်ခိၣ်အဘီမုၢ်တဖၣ် ကဒိၣ်စိဒိၣ်ကမီၤအဂ့ၢ်လီၤ. ဘီမုၢ်တဖၣ်န့ၣ် စးထီၣ်အသးလၢ ဘၤဘူၤလိၣ် ဒီးတုၤလီၤလၢပစိၤခဲအံၤန့ၣ်လီၤ. ဘၣ်ဃးဒီး တၢ်ကမၤအသးခါဆူညါန့ၣ် အဆၢဖိ ၄၄ တဲဝဲလၢ–
“မူခိၣ်အကစၢ် ကပာ်လီၤဘီမုၢ်တဘီမုၢ် လၢအတဟးဂီၤဘၣ် လီၤထူလီၤယိာ်ဘၣ်. ဒီးဘီမုၢ်န့ၣ် တအိၣ်လီၤတဲာ်ဘၣ်လၢ ပှၤအဂၤတကလုာ်အဂီၢ်ဘၣ်. ကမၤလီၤကလဲ, ဒီးကမၤလၢာ်ကွံာ် ဘီမုၢ်ခဲလၢာ်လီၤ. မ့မ့ၢ်အဝဲန့ၣ် ကအိၣ်လီၤထူလီၤယိာ်လီၤ.”
လံာ်စီဆှံတဆၢအံၤ ဒီးအဂၤတဖၣ်န့ၣ် တဲပာ်စၢၤဝဲလၢ ယွၤအဘီအမုၢ် ကပၢက့ၤတၢ်လၢ ဟီၣ်ခိၣ်ဘီမုၢ်တဖၣ်အလီၢ် ဒီးကဒုးအိၣ်ထီၣ်ဝဲ တၢ်ဘံၣ်တၢ်ဘၢနီၢ်ကီၢ် လၢပှၤဟီၣ်ခိၣ်ဖိအဂီၢ်လီၤ. ယွၤအဘီအမုၢ် မ့ၢ်ပၢတၢ်န့ၣ် တၢ်ကမၤအသးဒ်လဲၣ်. ခဲအံၤ ပကကွၢ်သကိး လံာ်စီဆှံ အတၢ်အၢၣ်လီၤအီလီၤတနီၤလီၤ.
-
တၢ်ဒုးတၢ်ယၤတအိၣ်လၢၤဘၣ်
စံးထီၣ်ပတြၢၤ ၄၉:၉ “[ယွၤ] ဒုးအိၣ်ကတီၢ် တၢ်ဒုးတၢ်ယၤတဖၣ် တုၤလၢဟီၣ်ခိၣ်အကတၢၢ်လီၤ. မၤကၢ်ချံၣ်ဧိၤပျၢ်ဧိၤ, ဒီးဒီၣ်တဲာ်ကွံာ်ဘီဧိၤနးဧိၤ, ဒီးဆူးကွံာ်လ့ၣ်ကဟၣ်လၢ မ့ၣ်အူလီၤ.”
ဆိကမိၣ်ကွၢ် ပှၤမ့ၢ်တသူကျိၣ်စ့ မ့တမ့ၢ် အတၢ်ကူၣ်ဘၣ်ကူၣ်သ့လၢ ကတ့ထီၣ်ဝဲ တၢ်စုကဝဲၤလၢ ကမၤသံတၢ်အဂီၢ်လၢၤဘၣ် ဒီးမ့ၢ်သူက့ၤဝဲဒ်သိး ကမၤစၢၤပှၤဂၤအဂီၢ်န့ၣ် ဟီၣ်ခိၣ်တဘ့ၣ်အံၤကမၤအသးဒ်လဲၣ်. ဖဲယွၤအဘီအမုၢ် ပၢတၢ်အခါန့ၣ် တၢ်အၢၣ်လီၤအီလီၤ လၢထးအံၤ ကဟဲလၢထီၣ်ပှဲၤထီၣ်ဝဲလီၤ.
-
တၢ်ဆူးတၢ်ဆါတအိၣ်လၢၤဘၣ်
ယၡါယၤ ၃၃:၂၄ “ပှၤအိၣ်ဝဲဆိးဝဲတဖၣ်န့ၣ်တစံး, ယမၤတကဲဘၣ်န့ၣ်ဘၣ်.”
ဆိကမိၣ်ကွၢ် လၢဟီၣ်ခိၣ်ဒီဘ့ၣ်န့ၣ် ပှၤတတူၢ်ဘၣ် သးတၢ်ဆါ, ခဲစၢၣ်, တၢ်ညၣ်ဂိၢ် မ့တမ့ၢ် တၢ်ဆူးတၢ်ဆါ လၢအဂၤတဖၣ်လၢၤဘၣ်အဃိ ပတလိၣ်ဘၣ် ကသံၣ်ကသီဒီး တၢ်ဆါဟံၣ်လၢၤဘၣ်. ပကအိၣ်ဒီး တၢ်အိၣ်ဆူၣ်အိၣ်ချ့လၢ အလၢအပှဲၤလီၤ. အဝဲအံၤမ့ၢ်ဝဲ ယွၤအတၢ်တိာ်ပာ်လၢ ကဟဲကဲထီၣ်အသးလၢ ဟီၣ်ခိၣ်ဒီဘ့ၣ်န့ၣ်လီၤ.
-
တၢ်အီၣ်တၢ်အီကအိၣ်လၢလၢပှဲၤပှဲၤ
စံးထီၣ်ပတြၢၤ ၇၂:၁၆ “ဘုတစှီၤကအိၣ်လၢ ဟီၣ်ခိၣ်အပူၤလၢကစၢၢ်ခိၣ်.”
ဟီၣ်ခိၣ်ဒီဘ့ၣ် ကပှဲၤဝဲဒီး တၢ်အီၣ်တၢ်အီလီၤ. တၢ်သၣ်ဝံၤလီၤဒိ ဒီးတၢ်အီၣ်လီၤထုး တအိၣ်လၢၤဘၣ်.
-
တၢ်သူၣ်အုးသးအုး, တၢ်ဟီၣ်တၢ်ယၢၤ ဒီးတၢ်သံတအိၣ်လၢၤဘၣ်
လီၣ်ဖျါ ၂၁:၄ “ယွၤကထွါကွံာ်အမဲာ်ထံခဲလၢာ်လၢအမဲာ်, ဒီးတၢ်သံတအိၣ်လၢၤဘၣ်, ဒီးတၢ်သူၣ်အုးသးအုးတအိၣ်လၢၤဘၣ်, ဒီးတၢ်ဟီၣ်တၢ်ယၢၤတအိၣ်လၢၤဘၣ်, ဒီးတၢ်ဘှံးသူၣ်ဘှံးသး တအိၣ်လၢၤဘၣ်. အဂ့ၢ်ဒ်အံၤ, တၢ်အိၣ်လၢ အခီၣ်ထံးတဖၣ်ပူၤကွံာ်လံ.”
ယဟိဝၤယွၤ အၢၣ်လီၤအီလီၤဝဲလၢ ဟီၣ်ခိၣ်ပၤရဒံစူးအပူၤန့ၣ် ပကအိၣ်မူဘၣ် လီၤထူလီၤယိာ်လီၤ.
“ယွၤလၢအကတိၤတၢ် ကဘျံးကဘၣ်တသ့ဘၣ်တဂၤ”
တၢ်အၢၣ်လီၤအီလီၤလၢ ကစၢ်ယွၤအၢၣ်လီၤဝဲတဖၣ်န့ၣ် မ့ၢ်အကဟဲလၢထီၣ်ပှဲၤထီၣ် သပှၢ်ကတၢၢ်ဧါ. ပမ့ၢ်ကွၢ်န့ၣ် ပှၤအါဂၤ ကအဲၣ်ဒိးအိၣ်မူဘၣ်လၢ ဟီၣ်ခိၣ်ပၤရဒံစူးအပူၤလီၤ. ဘၣ်ဆၣ် လၢတၢ်ဂ့ၢ်အါမံၤအဃိ ဘၣ်ဃးဒီး ပကအိၣ်မူဘၣ် လီၤထူလီၤယိာ်န့ၣ် ပှၤအါဂၤကနာ်ဝဲအဂီၢ် ကီဝဲလီၤ. အဂၤတမံၤန့ၣ် ပတထံၣ်ဘၣ် ပှၤဟီၣ်ခိၣ်ဖိအိၣ်မူဘၣ် လီၤထူလီၤယိာ် နီတဂၤဒံးဘၣ်.
ပှၤဟီၣ်ခိၣ်ဖိတဖၣ် ဘၣ်သံဒီးကဲထီၣ်တၢ်ဒဲးဘးအကုၢ် ဒီးထံၣ်ဘၣ်ဝဲ တၢ်သူၣ်အုးသးအုး, တၢ်နးတၢ်ဖှီၣ် ဒီးတၢ်ကီတၢ်ခဲအဂၤတဖၣ် ဖးယံာ်လံအဃိ ပှၤအါဂၤတူၢ်ဘၣ်ဝဲလၢ တၢ်အိၣ်မူန့ၣ် မ့ၢ်ဒၣ်ဒ်န့ၣ်လီၤ. ဘၣ်ဆၣ် နမ့ၢ်ကွၢ်ကဒါက့ၤလၢ ယဟိဝၤယွၤ အတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် တမ့ၢ်ဒ်န့ၣ်ဘၣ်.
ဒ်သိးပကနာ် ကစၢ်ယွၤ အတၢ်အၢၣ်လီၤအီလီၤတဖၣ်အဂီၢ် အဝဲတဲဘၣ်ပှၤလီၤတံၢ်လီၤဆဲးလၢ ယတၢ်ကတိၤန့ၣ် “တဟဲက့ၤကဒါက့ၤဆူယအိၣ် ကလီကလီဘၣ်. မ့ၢ်အကမၤထီၣ်တၢ်လၢအဘၣ်ယသး ဒီးကဒုးကဲထီၣ်တၢ်လၢ ယမၢအမၤတၢ်န့ၣ်လီၤ.”—ယၡါယၤ ၅၅:၁၁.
လံာ်စီဆှံပာ်ဖျါထီၣ်န့ၢ်ပှၤလၢ ယဟိဝၤယွၤ မ့ၢ်ယွၤလၢအ “ကတိၤတၢ်ကဘျံးကဘျၣ် တသ့ဘၣ်.” (တံတူး ၁:၂) ကစၢ်ယွၤ အၢၣ်လီၤအီလီၤဝဲလၢ ခါဆူညါန့ၣ် အကဟ့ၣ်လီၤပှၤ တၢ်ဆိၣ်ဂ့ၤဒီဒူၣ်လီၤ. လၢတၢ်န့ၣ်အဃိ ပဝဲတဂၤစုာ်စုာ် ပကြၢးဃုသ့ၣ်ညါအါထီၣ်လၢ ပှၤဟီၣ်ခိၣ်ဖိတဖၣ် အိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရဒံစူးအပူၤန့ၣ် ကသ့နီၢ်ကီၢ်ဧါ. ဒီးဒ်သိးပကဒိးန့ၢ်ဘၣ် ကစၢ်ယွၤ အတၢ်ဆိၣ်ဂ့ၤလၢ ခါဆူညါအဂီၢ် ပကဘၣ်မၤဒ်လဲၣ်. တၢ်သံကွၢ်ခံဖျၢၣ်အံၤ အတၢ်စံးဆၢန့ၣ် နကထံၣ်ဘၣ်အီၤလၢ တၢ်ဂ့ၢ်လၢခံတခါအပူၤလီၤ.