E nsangu zambote za Kintinu zisamunuanga mu nza yawonso, nze una Yesu kasakula. (Matai 24:14) Nkand’a Daniele, ukutuzayisanga vo e Kintinu kiaki i luyalu lwa Nzambi. Muna kapu kia 2 kia nkanda wau muna ye ungunza usonganga ndandani a tuyalu yovo yintinu ya wantu, tuka muna luyalu lwa Babele yankulu yamu lumbu yeto. E tini kia 44 kiasakula dina dibwa kuna ntwala vo:

“O Nzambi ezulu otongeka kintinu, kina ke kibangalakeswa ko yakwele mvu, ngatu vingilwa untinu wandi kwa nkangu akaka; kansi kikosomona yo sukisa yintinu yayi yawonso, kitongama mpe yakwele mvu.”

O ungunza wau ye ungunza wankaka wa Nkand’a Nzambi, wasakula vo Kintinu kia Nzambi kivinga vana fulu kia tuyalu twawonso twa wantu, kitwasa ngemba ye luvuvamu kwa wantu ova ntoto. Aweyi kikala e zingu muna Kintinu kia Nzambi? Tala nsilu miambote milungana ke kolo ko.

• E VITA KE IKALA DIAKA KO

  Nkunga 46:9: “[Nzambi] osima vita yakuna nsuk’a nza; Ta ketolola yo butuna dionga; O makalu, mau keyoka.”

  Yindula una wadi kala e nza kele vo e nzimbu zawonso ye ngangu zisadilwanga owau mu vanga nkele zisadilu muna mambu metwasa wete dia nkangu ke mu sadilwa ikubavonda ko! O nsilu wau ulungana kieleka muna Kintinu kia Nzambi.

• MAYELA KE MEKALA DIAKA KO

  Yesaya 33:24: “O ntungi kevova ko vo, yela nyela.”

  Yindula e nza ina ke ikala ye muntu ko oyela kimbevo kia ntima, câncer, malária yovo kimbevo kiankaka. Ke vekala mfunu a tupitalu ko ngatu nlongo. Kuna sentu o wantu ova ntoto bekala ye mavimpi mambote.

• VEKALA YE MADIA MAFWANA

  Nkunga 72:16: “O ulolo wa masa ukala muna nsi, yakuna ntandu a miongo.”

  O ntoto uyima madia mafwana mu kuma kia wantu awonso. Wantu awonso bekala ye madia. Ke vekala diaka nzala ko ngatu wantu bayela e kimbevo kia nzala.

• E MPASI, NTANTU YE LUFWA KE LUKALA DIAKA KO

  Lusengomono 21:4: “[Nzambi] okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.”

   Ediadi disongele vo wantu bevua zingu kiakwele mvu ye kialunga muna paradiso ova ntoto. Owau i nsilu a Yave wa Nzambi, wa Mvangi eto anzolwa.

Nga mambu mama mawonso lungana kikilu melungana? Kana una vo wantu ayingi bekwikilanga vo e zingu ye nsilu miyikwanga muna Nkand’a Nzambi milungana, akaka bemonanga vo diampasi mu bakula e ngindu za zinga yakwele mvu. Ediadi ke diasivi ko kadi ke vena muntu ko wazinga kala yakwele mvu katusasila e diambu diadi.

Wantu bebundunuanga muna sumu ye lufwa, se kolo kiayingi besadilanga mu mpasi, ntantu ye lubangamu, muna kuma kiaki ayingi bemonanga vo e mpila zingu kiaki ke kiambi kwandi ko. Kansi e mpila zingu kiaki, ke kiau ko kina Yave wa Nzambi wa Mvangi eto kakana mu kuma kia wantu.

Muna kutusadisa kimana twakala ye ziku muna mawonso kasila o nsilu, Nzambi ovovanga mu kuma kia diambu diandi vo: “Ke dikumputukila nkatu ko, divanga kaka edi nzolele, disikila mun’edi ntwikidi dio.”—Yesaya 55:11.

Yave oyikilwanga muna Nkand’a Nzambi vo Nzambi ona “kalendi vuna ko.” (Tito 1:2) Wau vo osianga nsilu miami miawonso miambote mu kuma kia kusentu, diambote twakiyuvula diambu edi: Nga wantu balenda zinga kikilu yakwele mvu muna paradiso va ntoto? Adieyi tufwete vanga kimana twabaka nluta wa nsilu a Nzambi? Muna malongi malende ma nkanda wau, osolola mambu ma mfunu oma mevana mvutu za yuvu yayi.