Badi bayisha lumu luimpe lua Bukalenge bua Nzambi pa buloba bujima anu mukavua Yezu muambe. (Matayi 24:14) Bible udi wamba mu mukanda wa Danyele ne: Bukalenge ebu mmbulamatadi mulombola kudi Nzambi. Mu nshapita 2 wa mukanda eu mudi dîyi dia buprofete didi dileja dilondangana dia mbulamatadi kampanda ya bukole ya bantu, anyi makalenge, kumbukila ku bukalenge bua Babilona too ne matuku etu aa. Mvese wa 44 udi umanyisha malu adi ne bua kuenzeka wamba ne:

“Nzambi wa mu diulu neajadike bukalenge bukuabu buikala kabuyi mua kubutudibua nansha kakese. Bukalenge ebu kabuakuya kudi tshisamba tshikuabu to. Nebuzaze makalenge aa onso ne nebuatuishe ku ndekelu, ne buobu nkayabu nebushalaku kashidi.”

Dîyi dia buprofete edi ne makuabu adi mu Bible adi aleja ne: Bukalenge bua Nzambi nebupingane pa muaba wa makokeshi onso a bantu ne nebutuadile bantu ba pa buloba ditalala ne bulongame. Malu neikale bishi mu Bukalenge ebu? Tumonayi imue ya ku milayi mimpe yakumbana mu matuku makese emu.

• KAKUAKUIKALA KABIDI MVITA TO

  Misambu 46:9: “[Nzambi] udi ujikija mvita pa buloba buonso bujima. Udi utshibula buta bua mikete ne usunsula difuma; udi wosha matempu a basalayi ne kapia.”

  Ela meji muikala malu pa buloba bobu bangate makuta ne mamanya bidibu benza nabi bingoma bua kuenza nabi bintu bikuabu bidi mua kuambuluisha bantu pamutu pa kubashipa! Mulayi eu neukumbane mu Bukalenge bua Nzambi.

• MASAMA KAAKUIKALAKU TO

  Yeshaya 33:24: “Muntu nansha umue udi musombele mu ditunga kakuamba ne: ‘Ndi nsama.’”

  Fuanyikija buloba buikala kabuyi ne muntu udi usama masama a muoyo, a kansere, a malariya, anyi masama makuabu kayi onso. Katuakuikala kabidi dijinga ne mpitadi ne manga to. Bantu nebikale ne makanda a mubidi mapuangane.

• BANTU KABAKUPANGILA BIAKUDIA TO

  Misambu 72:16: “Nekuikale ntete ya bungi pa buloba; neyivulangane bikole pa nsongo ya mikuna.”

  Buloba nebupatule biakudia bikumbane bua muntu yonso, ne bantu bonso nebikale nabi. Nzala ne didia dibi nebijimine.

• KAKUAKUIKALA BINTU BIDI BISAMA, TUNYINGANYINGA, NE LUFU TO

  Buakabuluibua 21:4: “[Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi. Malu a kale mmajimine.”

   Bidi biumvuija ne: bantu nebikale ne muoyo mupuangane kashidi mu mparadizu pa buloba. Ke tshidi Yehowa Nzambi, Mufuki wetu udi mutunange, mulaye.

Malu onso aa ntshilota anyi? Nansha mudi bantu ba bungi mua kuitaba ne lukasa luonso ne: nsombelu udibu balaye mu Bible udi usankisha menemene, kadi kudi malu adi asaka ba bungi ba kudibu bua kumona muoyo wa kashidi bu bualu budi bubapitshila mutu. Kabiena bitukemesha to, bualu kakuena muntu ukadi mupete muoyo wa kashidi bua kutuambila mudiwu to.

Kukadi bidimu bipite bungi bidi bukua bantu ku bupika bua mpekatu ne lufu ne bidibu benza mudimu mukole mu dikenga ne ntatu mishilashilangane. Bualu ebu mbufikishe bantu ba bungi ku ditaba nsombelu eu ne ku dimumona bu ne: ke yonso udiku. Kadi ki mmuvua Yehowa Nzambi Mufuki wetu mulongolole malu to.

Bua kutuambuluisha bua kumona muikala malu onso adi Nzambi mulaye ne bua kukumbana, Nzambi udi ushindika bua dîyi diende wamba ne: “Kadiakupingana kundi kakuyi bipeta, kadi nedikumbaje bushuwa bualu buonso budi bunsankisha, ne diodi nedikumbaje bushuwa bualu bundi ndituma bua kuenza.”​—Yeshaya 55:11.

Bible udi wamba mudi Yehowa muikale Nzambi “udi kayi mua kushima” to. (Tito 1:2) Bu mudiye mulaye malu mimpe onso aa bua matuku atshilualua, mbimpe tudiebeje petu ne: Bidiku mua kuenzeka bulelela bua bantu basombe kashidi mu mparadizu pa buloba mudiye mulaye anyi? Ntshinyi tshitudi ne bua kuenza bua kupeta malu adi Nzambi mulaye au? Mu biena-bualu bidi bilonda ebi, neupete malu mimpe adi andamuna nkonko eyi.