Mujimbu wamwaza waWangana waKalunga vali nakuwambulula hamavu hosena, ngana muze apolofwetele Yesu. (Mateu 24:14) Mukanda waNdanyele uze watwama muMbimbiliya wamba ngwawo ou Wangana wapwa fulumende yaKalunga. Mukapetulu 2 wamukanda kana, mwatwama upolofweto wahanjika hajifulumende chipwe ngwetu hamawangana akushikulu, kuputukila kuwangana waMbavilone swi nakumawangana aliko makumbi ano. Kaha vesi 44 yahanjika havyuma vize navikasoloka kulutwe kutalisa kumawangana kana ngwayo:

“Kalunga wamwilu mwakahakako wangana uze kaveshi kukanongesako. Wangana kana kaveshi kukauhana kuvatu vekako. Naukachika mawangana osena awa nakuwanongesa, kaha ukiko naukapwangako haya myaka yosena.”

Ou upolofweto kana naupolofweto weka wauvulu uze watwama muMbimbiliya wamba ngwawo Wangana waKalunga naukashisa mawangana osena aliko, kaha ukiko naukalingisa vatu vakatwame mukuunda hano hamavu. Uno kuyoya nachikapwa ngachilihi muWangana kana? Talenu vyuma vyamwaza vinakavangizaho vatushika vize navitesamo kalinwomu.

• JIJITA KAJESHI KUKAPWAKO

  Mukanda waSamu 46:9 wamba ngwawo: “[Kalunga] mwakumisa jijita hamavu hosena. Mwahokwojola mata amanana nakuchika makunga. Mwocha matemba ajita nakakahya.”

  Achishinganyekenu omu kaye nakakapwa kachi nge jimbongo nauhashi wakutunga vitwa vyajita vanavyalumuna nakupwa vyuma vize navinganyalisa vatu keshi kuvizachisa hakuvajihako! Lushiko kana nalukatesamo muWangana waKalunga.

• MISONGO KAYESHI KUKAPWAKO

  Mukanda waIsaya 33:24 wamba ngwawo: “[Kakweshi] kukapwa mutu mwakamba ngwenyi: “Nguli nakukola.”

  Shinganyekenu muli mulifuchi lize kamweshi mutu anakuviza musongo wamuchima, nakasa, chipwe musongo wachishika, namisongo yeka yakutekeleka. Kakweshi kukasakiwa vipatela navitumboko. Vatu vaze navakatwamanga hamavu navakapwa vakulikangula kumujimba.

• VYAKULYA NAVIKALISALA

  Mukanda waSamu 72:16 wamba ngwawo: “Hamavu nahakapwanga mbuto jamanona jakulisala. Hajipili hosena nahakapwanga mbuto jamanona jajivulu.”

  Hamavu nahakapwanga kulya chachivulu chavatu vosena. Vatu kaveshi kukafwa zala chipwe kuviza musongo wazalako.

• KUKOLA, NAKULISHONA, NAKUFWA KAVYESHI KUKAPWAKO

  Mukanda waKusoloka 21:4 wamba ngwawo: “[Kalunga] mwakahunda masoji osena kumeso avo, kufwa kacheshi kukapwako chekako, kaha nawa kakweshi kukapwa cheka kulishona, chipwe miteto, chipwe kukolako. Vyuma vyakulivanga vinafumuko lyehi.”

   Echi chalumbununa nge vatu navakapwa vakulikangula nakuyoya lika mupalachise hano hamavu. Omu mukiko Tengi yetu, Yehova Kalunga atushika.

Uno vyuma kana navikatesamo tahi? Numba tuhu vatu vavavulu vetavila ngwavo kuyoya chize vasoneka muMbimbiliya chapwa chamwaza, oloze vatu vamwe kavachitavilako. Katwatela kulikomokela hachuma kanako, mwomwo kakwatwama mutu numba umwe ayoyaho lyehi ngana, uze nahase kutulweza omu chapwako.

Vatu vatwama muundungo washili, nakufwa kaha nawa vanayandenga kumisongo nakuukalu wakulisezaseza, ngocho echi chinalingisa vatu vamwe vetavile kuyoya echi chiliko. Oloze kwakusukusuku navyuma ajina kukalingila vatu Tengi yetu, Yehova Kalunga.

Hakusaka mangana tumone kulema chavyuma vyamwaza atushika Kalunga, twatela kufwelela mazu enyi akwamba ngwawo: “Kaweshi kukakinduluka kuli ami mavokovokoko, oloze nawakatesamo vyuma vize ngunevwila kuwaha, kaha nawakalinga mwosena muze ngunawatumu kulinga.”—Isaya 55:11.

Mbimbiliya yavuluka Yehova ngwayo apwa Kalunga “ou ahona kwonga.” (WaChituse 1:2) Hakuwana nge Yehova atushika vyuma vyamwaza kulutwe, ngocho nachipwa chamangana kuli etu kulihulisa ngwetu: Uno chikupu vatu navakatwama haya myaka yosena mupalachise yahano hamavu yize vatushika tahi? Vyuma muka twatela kulinga mangana tunganyale kujishiko jaKalunga? Muchihande chinakavangizaho mumangazini yino, nachimikafwa muwane mujimbu wauvulu omu vanakumbulula vihula kana.