Nsañu yayiwahi yaWanta waNzambi anakuyishimwina mwahita iseki dejima, neyi chochashimwiniyi Yesu. (Matewu 24:14) Mukanda waDanyeli watuleja nawu iwu Wanta hinfulumendi yaNzambi. Mukapetulu 2 kaniwu mukanda mwekala wuprofwetu washimuna jinfulumendi jawantu hela mawanta awantu añovu kufuma tuhu mumpinji yaweni Babiloni kushika nikulelu. Hakushimuna yuma yikamwekana kumbidi, vasi 44 yahosha nawu:

“Nzambi wamwiwulu wamba kaloñesha wanta wakubula kukisika haya nyaka, wantowu hiyamba kawushiyila antu acheñuku; wakahumonaña mawantawa ejima puchi puchi, nakuyinoñesha, wakemana mbe haya nyaka.”

Iwu wuprofwetu niwukwawu washimunawu muBayibolu watulejaña nawu Wanta waNzambi wakasinsa mawanta ejima awantu nawa wakaleta kuwunda kudi antu hamaseki. Chihandilu chikekala  ñahi muniwu Wanta? Iyi diyuma yimu yayiwahi yakela Wanta.

Dikwila nawu chihandilu chikekala chachiwahi muparadisa hamaseki! Diyuma yatushiikayi Nleñi yetu, Yehova Nzambi.

• KWAKEKALA NJITA WANYI

  Masamu 46:9: “[Nzambi] wakumishaña majita mwakumina iseki dejima; diyi wakotolaña wuta wamukunji, wakotolaña iyoña hakachi kotu; wochaña nimakalu anjita mukesi.”

  Toñojokenu kaayi chikanateli kwikala neyi mali ejima iyanakuzatishawu hakutuña mata ninyitenda nzumbu ayizatisha kukwilila yuma yinateli kukwasha antu kubadika kujahañana nachu! Ichi chikaninu chikashikijewa muWanta waNzambi.

• KWAKELA KUKATA WANYI

  Isaya 33:24: “Mwenimbu hakahosha nindi Ami nakataku.”

  Tonojokenu kaayi chikanateli kwikala neyi antu aleka kukata yikatu yidi neyi muchima, kansa, malaria hela yikatu yikwawu. Kwakekala wanyi yipatela niyitumbu. Antu akekala akola kumujimba kumbidi hamaseki.

• KWAKEKALA NZALA WANYI

  Masamu 72:16: “Hanu hamaseki hansa jampidi jamaneni hakavula kabaka, Kusoña kwaku kwakanyinkesha.”

  Iseki dakasoña yakuda yayivulu nankashi nawa muntu wejima wukekala nayakuda. Kwakela nzala hela chipilu wanyi.

• KWAKEKALA WANYI KUKATA, KUNEÑA NIKUFWA

  Chimwekeshu 21:4: “[Nzambi] wakakombola madilu ejima kumesu awu, kufwa hikwakekalaku cheñiku, nawa hikwakekala cheñi kudishona, kudila hela kukataku. Yuma yakusambila yinahiti dehi.”

Komana iyi yuma yayiwahi yikamwekana? Hela chakwila antu amavulu etejaña nawu yuma yatushiikawu yashimunawu muBayibolu yikashikijewa, ilaña chayikalilaña kukuhwelela nawu twakashakamaña haya nyaaka. Tukuhayama wanyi, muloña kwosi muntu washakamahu dehi haya nyaaka kulonda yatuleji chichekala.

Antu anekali anduñu yanshidi nikufwa nawa anakabakani nayikatu, makabi niyuma yatama hadi mpinji yayilehi chakwila antu amavulu anakumona yuma neyi kwiji dichiyekala hela dichitwatela kuhanda. Ilaña chinambukiku chikupu nankeñelu yaNleñi yetu Yehova Nzambi kumuchidi wamuntu.

Hakwila twiluki netu yuma yashiikayi yikashikijewa, Nzambi washimwini kutalisha hezu dindi dahosheliyi nindi: “Hidakafunta kudami makasakasaku dakela munakeña dakakoña chachiwahi mudimu wadu wunaditemesheleli.”—Isaya 55:11.

Yehova amutena muBayibolu nawu Nzambi “wabulaña kutwamba.” (Titusa 1:2) Chineli washiika yuma yejimiyi kumbidi, dichi twatela kudihula netu: Komana mwalala antu akashakamaña haya nyaaka muParadisa yakanawu hamaseki? Yumanyi yitwatela kwila kulonda twakadiluñishi yikaninu yaNzambi? Mafu analondelihu munonu mukanda, anashimuni nsañu yakula awa malwihu.