Masoko akanaka o Umambo hwa Mwari ari kucumaehwa pasi pese, inga zvakanangwa ndi Jesu. (Mateu 24:14) Mu bhuku ra Dhaniyeri, Bhaibheri rinonanga kuti Umambo uhu i utongi hwa Mwari. Cipauko co cipiri co bhuku ra Dhaniyeri cinonanga ngo pamusoro po kuvepo no kuparajwa ko utongi kana kuti umambo huno simba maningi, kuvhira ku Bhabhironi ro kare mbhera wari. Yecibhuya ngo zvinozoitika kumbejiyo, vhesi 44 inoti:

“Mu mukuvo wo majimambo aya, Mwari wo mugore anozozisa umambo hucikazopejwi, umambo hucikazotohwi ngo vandhu vamweni. Hunozokwiya-kwiya no kupeja humambo humweni hwese; asi ihwona hunozogara mbhera narini.”

Ciporofita ici no zvimweni zvinonangwa mu Bhaibheri, zvinokhombija kuti Umambo hwa Mwari unozofakeya Umambo hwese hwo vandhu. Perapo, unozoita kuti vandhu vagare ushoni pasi pano. Upenyu unozova wakadini izvi pazvinozoitika? Kuti muzive mupinguro wakona, vonanyi zvigondiso zvinoshamaisa zvinozokwanirisika sambiri pano.

• AKUZOVIZVE NO HONDO

  Nduyo 46:10: “[Mwari] anopeja hondo mbhera ku magumo o nyika, anogura-gura mbita, wophwanya-phwanya mukhondo, anokhandira ngoro pa muriro.”

  Nyamasi uno, vandhu vanomosha mare no uzivi kuti vaite nvhuti kuti vauraye vandhu. Umambo hwa Mwari paunozotonga nyika ino, izvi narini azvizoitikizve. Pfuma yese no uzivi zvinozoshandiswa kuitira kubesera vandhu.

• AKUZOVIZVE NO NDHENDHA

  Isaia 33:24: “Apana na umwe wo vagari vo guta angazonanga kuti: ‘Ndiri kuhwaja.’”

  Amborangariranyi kugara mu nyika yo kuti apana mundhu anozotambujika ngo ndava yo ndhendha jo mwoyo, kanseri, febhri, marariya kana ndhendha imwenivo hayo. Apana mundhu anozoda mutombo kana shipitari. Vandhu vese vanozova no uhomi hwaushoni kamare.

• AKUZOVI NO NJARA

  Nduyo 72:16: “Munda ibare mbeu jakawanda, musonjoti izungunyike panyezuru po matundhu.”

  Nyika inozobara zvokuha zvakawanda maningi, zvinozokwana vandhu vese. Akuzovizve no njara no kutama kuha zviro zvinovaka muviri.

• KUSURUVARA, KUTAMBUJIKA NO KUFA ZVINOZOPERA

  Apokaripsi 21:4: “Iyena anozopukuta musoji jese mumeso mavo, akucazovizve no kufa, kusuruvara, kucema no kuhwajihwa. Zviro zvokare zvapera.”

  Izvi zvinoreva kuti upenyu unozova wakakwana no ucina magumo. Nyika inozova paradhiso. Ici icigondiso co Musiki wedu ano rudo, Jehovha Mwari.

Imwimwi munorangarira kuti izvi zvakanaka maningi zvokuti azvizokwanirisiki? Vamweni vanorangarira kuti zvigondiso zviri mu Bhaibheri zvinoshamaisa maningi. Pikija zvakadaro, ngo ndava yo zviro zvakasiyana-siyana, vazinji vanovona zvecinesa kutenda kuti tingaponadi kwenda no kwenda. Azvizivi kushata kurangarira kudaro, ngokuti atizivi kumboziva mundhu wakambopona kwenda no kwenda kuti ativerengere.

Vandhu vese vanoshaisha vogumira pa kufa. Kusiyapo zvondhozvo, vandhu varoveja kupona vacitambujika zvokuti avacatoneseki kupona kudaroko. Asi Musiki wedu, Jehovha Mwari, aacaidepi kuti itusu tigare tecitambujika.

Kuti atikhohwese kuti zvese zvaanonanga zvinokwanirisika, Mwari wakananga kudari ngo pamusoro po zvigondiso zvake: “Ngokudarovo kunoitika no izwi rinobuda mu muromo wangu: arihwiriri kondiri ricina mucero; ngo kusiana, irona rinoita kuda kwangu, rinobudiririsa basa rondakaritumira.”—Isaia 55:11.

Bhaibheri rinonanga kuti Jehovha Mwari ‘aanyepi.’ (Tito 1:2) Iyena wakagondesa zviro zvakanaka maningi kuitira kumbeji. Ngo iyo ndava, zvaizova zvaushoni kuima, torangarira kudari: Kunanga kuti vandhu vangaponadi kwenda no kwenda mu paradhiso pasi pano? Tinodikana kuitenyi kuti tivone kukwanirisika ko cigondiso ici? Mu mapheji anoteverari munozowana mupinguro wo muvhunjo iji.