Ditaba tše dibotse tša Mmušo wa Modimo di bolelwa lefaseng ka moka, bjalo ka ge Jesu a porofetile. (Mateo 24:14) Puku ya Beibele ya Daniele e re botša gore Mmušo woo ke pušo ya Modimo. Kgaolo 2 ya puku yeo e bolela ka boporofeta bjo bo bontšhago tatelano ya mebušo e megolo ya batho go tloga ka Babilona ya bogologolo go ba go fihla le mehleng ya rena. Ge temana ya 44 e bolela ka seo se tlago go direga, e re:

“Modimo wa legodimo o tla hloma mmušo wo o ka se kego wa fedišwa. Mmušo woo o ka se ke wa fetišetšwa go batho ba bangwe. O tla pšhatlaganya mebušo ye ka moka wa e fediša gomme wona o tla ema go iša mehleng ya neng le neng.”

Boporofeta bjo le diporofeto tše dingwe tša Beibele di bontšha gore Mmušo wa Modimo o tlo tšeela mebušo ya batho legato gomme wa dira gore batho ba phele ka khutšo mo lefaseng. Bophelo bo tlo ba bjang ka tlase ga Mmušo woo? A re kweng ka tše dingwe tša ditshepišo tšeo di tlo diregago e se kgale.

• GO KA SE SA BA LE DINTWA

  Psalme 46:9 e re: “[Modimo] o fediša dintwa go fihla pheletšong ya lefase. O robaganya bora gomme a ripaganya lerumo; dikoloi tša ntwa o di tšhuma mollong.”

  Nagana gore lefase le be le tla ba bjang ge nkabe tšhelete le bokgoni bjo ga bjale bo dirišetšwago go hlama dibetša di be di ka dirišetšwa go hola batho go e na le go ba bolaya! Tshepišo yeo e tlo direga ge go buša Mmušo wa Modimo.

• GO KA SE SA BA LE MALWETŠI

  Jesaya 33:24 e re: “Ga go na modudi yo a tla rego: ‘Ke a babja.’”

  Nagana ka lefase leo go tla bego go se na motho yo a swerwego ke bolwetši bja pelo, kankere, malaria le malwetši a mangwe. Go ka se sa ba le dipetlele le dihlare tša kalafo. Batho bao ba holofeditšwego go tlo phela mo lefaseng nakong e tlago, ba tlo phela gabotse mmeleng.

• GO KA SE SA BA LE TLHAELELO YA DIJO

  Psalme 72:16 e re: “Go tla ba le mabele a mantši mo lefaseng; dintlheng tša dithaba go tla ba le motlalo wa mabele.”

  Lefase le tla tšweletša dijo tše di lekanago batho ka moka. Go ka se sa ba le tlala le phepompe.

• GO KA SE SA BA LE BOHLOKO, MANYAMI LE LEHU

  Kutollo 21:4 e re: “[Modimo] o tla phumola megokgo ka moka mahlong a bona gomme lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona. Dilo tša pele di fetile.”

   Seo se bolela gore batho ba tla be ba se sa na sebe le gore ba tla phela ka mo go sa felego lefaseng la paradeise. Seo se tshepišitšwe ke Mmopi wa rena yo lerato, e lego Jehofa Modimo.

Na dilo tše ka moka di kwagala di makatša? Le ge batho ba bantši ba dumela gore bophelo bjo bo tshepišitšwego bjo bo hlaloswago ka Beibeleng bo tloga bo kgahliša, eupša ka mabaka a itšego ba thatafalelwa ke go dumela gore ba tla phela ka mo go sa felego. Seo ga se makatše ka ge go se gwa ka gwa ba le motho yo a ilego a phela bophelo bjo bjalo yo a ka re hlalosetšago ka bjona.

Ke kgale batho ba tlaišwa ke sebe, lehu, bohloko le masetlapelo mo ba feleleditšego ba dumela gore ke ga tlhago gore ba phele ka tsela ye. Eupša seo se fapane kgole le seo Mmopi wa rena, Jehofa Modimo, a bego a se rerile bakeng sa batho.

E le gore Modimo a re thuše gore re be le tumelo dilong tšohle tšeo a re tshepišitšego tšona, o ile a re kgonthišetša mabapi le lentšu la gagwe gore: “Le ka se boele go nna le le feela, eupša le tla dira seo se nkgahlago, la atlega ka seo ke le rometšego sona.”​—Jesaya 55:11.

Jehofa o hlaloswa ka Beibeleng e le Modimo “yo a ka se kego a aketša.” (Tito 1:2) Ka ge Jehofa a re tshepišitše go tlo re direla dilo tšeo tše di kgahlišago nakong e tlago, e tla ba gabohlale gore re ipotšiše gore: Na go tloga go kgonega gore batho ba phele ka mo go sa felego lefaseng la Paradeise leo le tshepišitšwego? Re swanetše go dira’ng gore re tle re thabele dilo tšeo Modimo a di tshepišitšego? Matlakaleng a latelago a makasine wo, o tla hwetša tsebišo yeo e thušago go araba dipotšišo tšeo.