Omaulo Maakafuiswapo
Onondaka onongwa Mbouhamba wa Huku mbukahi nokuiviswa mouye watyo auho, ngetyi Jesus apopile okuti matyikalingwa. (Mateus 24:14) Mombimbiliya omukanda wa Daniele wati: Ouhamba oo utuminwa na Huku. Okapitulu kavali komukanda oo, muvasiwa omulao upopia konthele youtumini wo vanthu, okupolelela koutumini wo Vambambilonia alo mononthiki mbetu. Omukanda wa Daniele 2:44 upopia okuti:
“Huku yo keulu makavialeka ouhamba umwe uhakahanyuako nalumwe. Ouhamba oo kamaukapita pomaoko elongo ekuavo. Maukahanyako omauhamba atyo aeho nokuenyimako. Iya ouhamba watyo oo, ngao ukakalako apeho.”
Eulo eli nomakuavo Ombimbiliya, apopia okuti Ouhamba wa Huku maukapinga-ko omautumini ovanthu, aukaetela ombembwa ovanthu pano pohi. Oñgeni ovanthu mavakakala tyina vamatuminwa Nouhamba wa Huku? Tala ovipuka vimwe oviwa mavikafuiswapo.
Otyo tyilekesa okuti matukakala nomuenyo apeho! Ohi maikakala omphangu yombembwa! Otyo, otyo Omutungi wetu woluembia, Jeova Huku, alaa.
-
KAMAKUKAKALA VALI OVILWA
Salmo 46:9: “Huku makamanako ovita alo kuna kuaoyela oohi. Uhanya ononkhondyi nokutyopa-tyopa omaonga. Omatemba ovita weepaka otupia.”
Pahe soka oñgeni ouye maukala tyina onombongo nounongo upeselwa pala okulinga omauta wamaundapeswa vala pala okukuatatesako ovanthu! Onondaka ombu mambukafuiswapo Mouhamba wa Huku.
-
KAMAKUKAKALA VALI OMAUVELA
Isaías 33:24: “Nawike kombanda yohi makati: ‘Ame navela.’”
Soka mouye omu ovanthu vahamono ononkhumbi mbutuka komauvela ngetyi: Okuvela omutima, nomauvela okutumba ononthungu, nomalalia, nomauvela omakuavo vali. Kamakukakala vali onosipitali novihemba. Ovanthu mavakakala pano pohi, mavakakala nekongoko likahi nawa.
-
KAMAKUKAKALA VALI ONDYALA
Salmo 72:16: “Makukakala ovilia ovinyingi kombanda yohi. Alo umwe kononthongo-nthongo mbo nomphunda makukakala okulia okunyingi.”
Ohi maikaava okulia kutuuka pala ovanthu vatyo aveho. Ovanthu kamavakahoka vali mokonda yondyala.
-
KAMAKUKAKALA VALI OMALUIHAMO, ONONKHUMBI NONONKHIA
Apocalipse 21:4: “[Huku] makasekuna ononkhuka momaiho avo, ononkhia, okulila, nonongembia kamavikakalako vali. Mokonda ovipuka ovio aviho mavikalamba.”
‘MATYIKAFUISWAPO NAWA-NAWA’
Ovipuka ovio aviho oviwa unene, ñgeno vifuiswepo ine? Namphila ovanthu ovanyingi vetavela okuti omilao vio Mbimbiliya konthele yomuenyo oviotyotyili, mahi no ngotyo ovanyingi kavetavela okuti nthiki imwe matukakala-ko apeho. Otyo katyituhuvisa mokonda nkhele katunemone omunthu wakala-ko monkhalelo oyo iya etupopila-tyo.
Ovanthu aveho ovakuankhali, vankhia, vamona ononkhumbi, nomaluihamo nomauvela, novitateka ovikuavo vali. Iya mokonda yotyo ovanthu pahe vetyiliya onkhalelo oyo yomuenyo. Mahi otyo hatyo-ko Omutungi wetu Jeova Huku ahandela ovanthu.
Opo Huku etukuateseko okuyumba onthumbi mondaka yae ngwe wati: ‘Ondaka yange kamaikondoka kuaame tyehena etyi yalinga, mahi, tyotyili mailingi etyi nahanda, nokufuisapo nawa etyi neitumina.’ — Isaías 55:11.
Ombimbiliya ipopia okuti Huku: “Kapondola okukemba.” (Tito 1:2) Tyotyili Huku walaa ovipuka ovinyingi komutwe-wandyila. Otyiwa tulilongese omapulo aa: Okuti ovanthu vapondola umwe okukala-ko apeho Momphangu Yombembwa pano pohi? Oityi tuna okulinga opo tupole ouwa komilao via Huku? Monthele mailandulako, movasi omakumbululo omapulo oo.
Hamwe Noove Uhanda
OMAPULO OMBIMBILIYA AKUMBULULWA
Ouhamba wa Huku oityi?
Tala omokonda yatyi Ouhamba wa Huku wavilapo vali koutumini wovanthu.
OMUTALA WOMULAVI
Ouhamba wa Huku
Otyo Jesus apopila vali unene Ouhamba tyipona otyipuka otyikuavo.
