Киристе куд загъта, уотӕ Хуцауи Паддзахади туххӕй хуарз хабар игъустгонд цӕуй ӕгас зӕнхӕбӕл дӕр (Матфеййи 24:14). Данели киунугӕй базонӕн ес, еци Паддзахадӕ Хуцауӕй ке ӕй. Еци киунуги дуккаг сӕри ци пахампарадӕ ес, уоми финст ӕй, рагон Вавилони дзамантӕй нӕ рӕстӕгмӕ цӕхуӕн хъаурӕгин паддзахӕдтӕ, кенӕ хецауӕдтӕ адтӕй, уой туххӕй. Еци паддзахӕдтӕбӕл уой фӕсте ци ’рцӕудзӕй, уой туххӕй финст ӕй 44 стихи:

«Еци паддзӕхти рӕстӕги уӕларвон Хуцау исфедар кӕндзӕй, ка некӕд ниппурхӕ уодзӕй, уӕхӕн паддзахадӕ. Еци паддзахадӕ ӕндӕр адӕни къохмӕ лӕвӕрд не ’рцӕудзӕй. Е ниппурхӕ кӕндзӕй еугур еци паддзахӕдтӕ, ӕхуӕдӕг ба уодзӕй ӕносмӕ».

Библий аци ӕма ма ӕндӕр пахампарӕдтӕ ӕргом кӕнунцӕ, зӕнхон хецауӕдтӕ Хуцауи Паддзахадӕй ӕййивд ке ’рцӕудзӕнцӕ, ӕма адӕн ӕ дӕлбарӕ фӕрнӕй ӕма амондгунӕй ке цӕрдзӕнцӕ. Цума уӕд цард цӕхуӕн уодзӕй? Ци дессаги цард нӕмӕ ӕнгъӕлмӕ кӕсуй, уой фӕдбӕл ӕркӕсӕн Библийӕй цалдӕр скъуддзагемӕ.

• ТУГЪДТИТӔ НӔБАЛ УОДЗӔЙ

  Псалом 46:9: «[Хуцау] зӕнхи кӕрӕнтти уӕнгӕ уорамуй тугъдтитӕ. Сӕттуй саздӕхътӕ, дууӕ дехи кӕнуй арцитӕ ӕма тохӕн уӕрдунтӕ содзуй».

  Абони тохӕндзаума ӕргъуди кӕнунбӕл ӕма е ’скӕнунбӕл хъӕбӕр берӕ ’хца харз кӕнунцӕ. Фал расагъӕс кӕнӕ, еци ’хца адӕни марунмӕ нӕ, фал сӕ пайдайӕн ку харз кодтайуонцӕ, уӕд цард цӕхуӕн адтайдӕ! Уӕхӕн дессаги цард уодзӕй, адӕн Хуцауи Паддзахади дӕлбарӕ ку цӕронцӕ, уӕд.

• НЕЗТӔ НӔБАЛ УОДЗӔЙ

  Исай 33:24: «Уоми цӕрӕг адӕнӕй еу дӕр нӕбал зӕгъдзӕй: „Ӕз сӕйгӕ дӕн“».

  Дӕ цӕститӕбӕл рауайун кӕнӕ, цард цӕхуӕн уодзӕй, адӕн зӕрди незӕй, раккӕй, сӕкӕрнезӕй ӕма ӕндӕр уӕхӕн незтӕй ку нӕбал гъезӕмарӕ кӕнонцӕ, уӕд. Нӕбал гъӕудзӕнцӕ сӕйгӕдӕнттӕ ӕма хуастӕ. Уӕхӕн дессаги федӕн ӕнгъӕлмӕ кӕсуй зӕнхӕбӕл цӕрӕг адӕнмӕ.

• СТОНГ НЕКЕБАЛ УОДЗӔЙ

  Псалом 72:16: «Зӕнхӕбӕл хуар уодзӕй фӕндон, хуӕнхти цъоппитӕбӕл зӕу-зӕу кӕндзӕй».

  Зӕнхӕ тиллӕг алке фагӕ дӕр дӕтдзӕй. Стонг ӕма хуӕруйнаггъӕуагӕ некебал уодзӕй.

• НӔБАЛ УОДЗӔЙ РИСТ, МАСТ ӔМА МӔЛӔТ

  Раргомадӕ 21:4: «[Хуцау] син ниссӕрфдзӕй сӕ цӕстисугтӕ, ӕма нӕбал уодзӕй нӕдӕр мӕлӕт, нӕдӕр маст, нӕдӕр гъарӕнгӕ, нӕдӕр рист. Раздӕр ци адтӕй, е фӕййевгъудӕй».

 Е уобӕл дзорӕг ӕй, ӕма адӕн исуодзӕнцӕ ӕнхӕст ӕма дзенети ӕносмӕ цӕрдзӕнцӕ. Уомӕй нин зӕрдӕ ӕвӕруй нӕ уарзӕгой Сфӕлдесӕг, Йеговӕ Хуцау.

Куд дӕмӕ кӕсуй, ци бакастан, етӕ исӕнхӕст уодзӕнцӕ? Кӕд адӕнӕн сӕ фулдӕр хъӕбӕр бӕллунцӕ, Библий ци зӕрдӕвӕрдти туххӕй финст ес, уони сӕхе цӕститӕй фӕууинунмӕ, уӕддӕр беретӕй цӕхуӕндӕр гъуддӕгти туххӕй нӕ феруагӕс кӕнуй, адӕймаги бон ӕносмӕ цӕрун ке ӕй, е. Ӕма е дӕссаг дӕр нӕй, уомӕн ӕма ӕносмӕ некӕдма неке цардӕй, ӕма е куд ӕй, уой неке бон ӕй радзорун.

Адӕн ӕнцӕ тӕрегъӕд ӕма мӕлӕти цагъартӕ. Берӕ ӕнзти дӕргъи рист, маст ӕма аллихузи бӕллӕхти фудӕй гъезӕмарӕ кӕнунцӕ, ӕма сӕмӕ уотӕ кӕсун райдӕдта, цума уотӕ гъӕуама уа. Адӕн нур куд цӕрунцӕ, уой рабарӕн дӕр нӕййес, не Сфӕлдесӕг Йеговӕ Хуцауи фӕндонмӕ гӕсгӕ куд гъӕуама цардайуонцӕ, уой хӕццӕ.

Хуцау ӕ зӕрдӕвӕрдтӕ ке исӕнхӕст кӕндзӕй, уобӕл цӕмӕй ма дузӕрдуг кӕнӕн, уой туххӕй ӕхуӕдӕг уотӕ загъта: «Мӕнӕй ци дзурд рацӕуа, е... цалинмӕ не ’сӕнхӕст уа, уӕдмӕ мӕмӕ фӕстӕмӕ не ’рбаздӕхдзӕй, фал искӕндзӕй, ци мӕ фӕндуй, уой, ӕма исӕнхӕст кӕндзӕй, ке туххӕй ӕй рарвистон, еци гъуддаг» (Исай 55:11).

Библи Йегови хонуй, «ӕ бон сайун кӕмӕн нӕй, еци Хуцау» (Титмӕ 1:2). Хуцау нин дессаги гъуддӕгтӕй зӕрдӕ байвардта, ӕма хуарз уайдӕ ку расагъӕс кӕнианӕ: цума уомӕн гӕнӕн ес, цӕмӕй адӕймаг ӕцӕгӕйдӕр ӕносмӕ зӕнхӕбӕл цӕра? Цӕмӕй еци цард нӕхе цӕститӕй фӕууинӕн, уой туххӕй нӕ ци кӕнун гъӕуй? Аци фарстатӕбӕл дзуапп иссердзӕнӕ иннӕ статьяй.