Jesuspa nisqanman hinam Diospa munaychakuyninmanta enteron allpa pachapi Diospa runankuna willakuchkanku (Mateo 24:14). Daniel qillqapi nisqanman hinam Diosqa tukuy imata munaychakuspan hanaq pachamanta kamachimunqa. Iskay kaq capitulonpim willawanchik Babilonia nacionta munaychakuq runakunamanta hinaspa kunan tiempopi kamachikuqkunamantapas, 44 versiculopiñataqmi willawanchik runakunapa munaychakusqanwan ima pasananta. Chaypim nin:

“Hanaq pacha Diosmi hatarichinqa wiñaypaq mana tuñichiy atina munaychakuyta, chay munaychakuypa hawanpiqa manam hukqa munaychakunqachu. Aswanqa chay munaychakuymi llapallan munaychakuykunata ñutupaspan wiña-wiñaypaq takyanqa”, nispa.

Bibliapi Danielpa willakusqan hinaspa wakin willakuykunapas ninmi runakunapa munaychakusqanta Dios chinkachispan payllaña kamachiwananchikta, chay pasakuptinqa allinñam kawsakusun. Qatiqninpiyá yachaykusun imanasqa allinña hinaspa hawkaña kawsakunanchikmanta.

• MANAÑAM GUERRAQA KANQACHU

  Salmo 46:9 nin: “[Diosmi] guerrakunata kay pachapi kuchun-kuchun chinkarachin, flechapa arconkunatawan lanzakunatam pakiparun, guerrapaq carretakunatam kañarun”, nispa.

  Armakuna ruwanankupaq servichikusqanku qullqita runakunataña yanapanankupaq kamachikuqkuna servichikuptinkuqa ¡mayna allinchá kanman! Diosña kamachiwaspanchikqa nisqanman hinam guerrakunata chinkachinqa.

• MANAÑAM PIPAS UNQUNQAÑACHU

  Isaias 33:24 nin: ‘Manañam mayqannikichikpas “unquchkanim” ninkichikñachu’, nispa.

  ¡Mayna allinchá kanman cancerwan, uma nanaywan hinaspa ima unquywanpas pipas manaña unquptinqa! Chayna kaptinqa manañam kanmanñachu hospitalpas nitaq hampikunapas. Diosña kamachimuptinqa lliwmi manaña unquspa kawsakusunchik.

• MANAÑAM PIPAS YARQAYMANTAQA KANQACHU

  Salmo 72:16 nin: ‘Kay pachapim achka-achka kawsaykuna qispinqa. Muqu chakrakunapim sumaqllataña kawsaykuna aywityanqa’, nispa.

  Kay pachapim kawsayqa allinta qispinqa, hinaspapas lliwpaqmi haypanqa.

• MANAÑAM PIPAS WAÑUNQACHU NITAQ ÑAKARINQACHU

  Apocalipsis 21:4 nin: “Diosmi llapa runakunapa wiqinta pichanqa, manañam kanqachu wañuypas, llakikuypas, waqaypas nitaq nanaypas. Ñawpaq kaqkunaqa tukurunñam”, nispa.

   Runakunaqa manaña huchayuq kasqankuraykum kay pacha sumaq huerta kaptin wiñaypaq kawsakunqaku. Chaytam kuyawaqninchik Jehova Dios ruwanqa.

Wiñaypaq kawsakuyta munaspankupas runakunaqa ninkum wiñaypaq kawsakuyta mana atisqanchikta. Chaynataqa ninku llapallanchik wañusqanchikraykum.

Ñawpaqmantaraqmi lliw runakuna ñakarinchik hinaspa wañunchik, chaymi yaqa lliw runakuna ninku: “Chaynamiki kawsakuyninchikqa”, nispa. Ichaqa Diosqa manam munarqachu pipas ñakarinanchiktaqa.

Nisqankunamanta mana iskayrayananchikpaqmi Diosqa kaynata niwanchik: ‘Manam yanqapaqchu willakusqayqa kanqa, aswanqa munasqaytam ruwanqa, munasqayman hinam kamachisqayta ruwanqa’, nispa (Isaias 55:11).

Bibliaqa niwanchikmi Diosqa “mana llullakuq” kasqanta (Tito 1:2). Mana llullakuq Dios chaykunata niwasqanchikraykum sunqunchikpi tapukunanchik: “¿Atichwanchu kay pacha sumaq huerta kaptin wiñaypaq kawsakuyta? ¿Imatam ruwananchik Diospa nisqankuna cumplikusqanta qawanapaq?”, nispa. Qatiqnin yachachikuykunam chaykunamanta rimachkan.