Te tutu aereia nei te tuatua meitaki o te Patireia o te Atua i te ao katoa mei ta Iesu i totou. (Mataio 24:14) Akakite mai te puka o Daniela e ko teia Patireia, e kavamani na te Atua. I roto i te pene 2, te akakite ra i tetai totou no runga i tetai au kavamani a te tangata me kore patireia mei te tuatau mai o Babulonia ki teia rā. Te akakite katoa maira eaa te ka tupu a te tuatau ki mua, karanga ra te irava 44:

“E i te au rā o taua au ariki ra, e akatupu ei te Atua no te rangi i tetai basileia, te ka kore rava e akakoreia e tuatau ua atu: kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.”

Akakite teia totou e tetai atu au totou Pipiria, e ka takore te Patireia o te Atua i te au kavamani a te tangata e ka riro na te reira e apai mai i te au no te tangata i te enua nei. Eaa te tu o te oraanga i raro ake i te tutara a teia Patireia? Teia tetai au taputou te ka akatupuia a te tuatau ki mua.

• KARE E TAMAKI AKAOU

  Salamo 46:9: Ka “akakore aia [te Atua] i te tamaki e tae rava akenei ki te openga enua; kua aati aia i te ana, e kua tipupu i te korare: e kua taʼuia te kariota ra i te ai.”

  Akamanako ana mei teaa te tu o te oraanga i te enua nei me akapouia te moni ei angai i te tangata kare ki runga i te au apinga tamaki! Ka tupu teia taputou me tutara te Patireia o te Atua.

• KARE E MAKI AKAOU

  Isaia 33:24: “Kare oki to reira e karanga e, Kua maki au.”

  Akamanako ana i tetai ao e kare te tangata e tuia e te maki pukuatu, te cancer, te maki mariri e te vai atura. Kare e anoano akaouia tetai are maki e te au vairakau. Ka meitaki te oraanga—ka tupu teia ki te au tangata a te tuatau ki mua.

• KARE E ONGE AKAOU

  Salamo 72:16: “E manga sitona okotai rima i ki i te enua nei, i runga i te take o te au maunga ra.”

  Ka maata te kai na te katoatoa. Kare e tangata e pongi akaou.

• KA KORE TE MAMAE, TE MII E TE MATE

  Apokalupo 21:4: “E nana [na te Atua] e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”

   Ka mutu kore te oraanga o te tangata i roto i tetai enua parataito! E taputou tera na Tei Anga ia tatou ko te Atua ko Iehova.

E tika ainei teia au taputou? Kua āriki te maataanga o te tangata e ko te au taputou i roto i te Pipiria no te oraanga, e mea umuumuia te reira. Inara manako tetai pae e e ngatā i te irinaki i teia. Kare e akaapaanga no te mea kare e tangata i kite mei teaa te tu o te reira tu oraanga.

E tuikaa te tangata ravarai no te ara e te mate e kua tupu te mamae e te taitaia kia ratou no tetai tuatau roa. I reira kua manako ratou e, ko te tu rai teia o te oraanga. Inara kare ko teia ta Tei Anga ia tatou ko Iehova i akakoro no te tangata.

Ei tauturu ia tatou kia āriki i tana au taputou, kua akapapu mai te Atua na roto i teia au tuatua e: “Koia katoa taku tuatua no roto i toku nei vaa; kare e oki puapinga kore ua mai kiaku nei, e tupu ra tei akakoroia e au ra; e manuia oki te mea i akaue atu ei au ra.”—Isaia 55:11.

Akataka mai te Pipiria ia Iehova ei Atua tei “kore e tika kia pikikaa.” (Tito 1:2) I te mea kua taputou mai aia i teia au mea no te tuatau ki mua, e mea puapinga kia akamanako tatou e: Ka ora ainei te tangata e tuatau ua atu i roto i tetai enua Parataito? Eaa ta tatou ka rave e puapingaia ai mei te taputou a te Atua? I roto i te au kapi ka aru mai, ka kite koe i tetai au manako ei pau i teia nga uianga.