Mphangwa zadidi za Mulungu ziri kumwazwa pa dziko yonsene yapantsi ninga pidalonga Yezu. (Mateu 24:14) Bhibhlya pa bukhu ya Dhanyeli isalonga kuti Umambo unoyu ndi utongi wa Mulungu. Pa kapitulu 2 ya bukhu ya Dhanyeli pana profesiya inalonga pya kuoneka na kufudzwa kwa maumambo peno mautongi amphambvu kutomera mu ndzidzi wa Bhabhilonya wakale mpaka lero. Thangwi ya pinthu pinafuna kucitika ntsogolo lemba ya Dhanyeli 2:44 isalonga:

“Mu ntsiku za amambo anewa, Mulungu wakudzulu anadzakhazikisa umambo wakuti nkhabe kudzafudzwa. Pontho umambo unoyu nee unadzaperekwa kuna mbumba inango. Iwo unadzanyedza, mbufudza maumambo anewa onsene, pontho iwo basi unadzakhala kwenda na kwenda.”

Profesiya ineyi na maprofesiya anango a m’Bhibhlya asapangiza kuti Umambo wa Mulungu unadzafudza mautongi onsene a anthu. Buluka penepo Umambo unoyu unadzaphedza anthu toera kukhala na umaso wadidi pa dziko yapantsi.  Anthu anadzakhala tani Umambo wa Mulungu ungadzatonga dziko yapantsi? Toera kudziwa ntawiro wa mbvundzo unoyu, onani mapikiro mangasi a Mulungu akuti anadzakwanirisika thimize pano.

• NKHABE KUDZAONEKABVE NKHONDO

  Masalmo 46:9: “Iye asamalisa nkhondo pa dziko yonsene yapantsi. Iye asakhumula mauta mbagwanda-gwanda madipa; iye asapisa pa moto ngolo za nkhondo.”

  Nyerezerani basi kukhala mu dziko yakuti nkhabe munthu anafuna kuthabuka na utenda wa ntima, kanseri, malarya peno ntundu unango wa utenda. Nkhabe munthu anadzafuna mitombwe peno maxipitari. Anthu onsene anadzakhala na ungumi wadidi.

• MAUTENDA ANADZAMALA

  Izaiya 33:24: “Nee munthu m’bodzi anakhala pa dziko yapantsi anadzalonga kuti: Ndiri kubva kupha.”

  Anthu asaphatisira kobiri izinji, pontho asaphatisira udziwisi toera kusasanya mpfuti mbapha nazo andzawo. Umambo wa Mulungu ungadzatonga dziko yapantsi pyenepi nee pinadzacitikabve. Mpfuma na udziwisi, pyonsene pinadzaphatisirwa toera kuphedza anthu.

• NKHABE MUNTHU ANAFUNA KUTHABUKA NA NJALA

  Masalmo 72:16: “Panadzakhala cakudya cakunjipa pa dziko yapantsi; pontho padzulu pa mapiri panadzabuluka cakudya cizinji kakamwe.”

  Dziko yapantsi inadzabala cakudya cakunjipa cakuti cinadzakwana kuna anthu onsene. Nee kunadzaonekabve njala peno mautenda anakhala na anthu thangwi yakusoweka kwa cakudya.

• NKHABE KUDZAONEKABVE NYATWA, KUBVA KUPHA PENO KUFA

  Apokalipse 21:4: “Iye anadzapukuta misozi yonsene m’maso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pyakale pyamala.

  Pyenepi pisabveka kuti anthu anadzakhala na umaso waungwiro, pontho nee anadzafa. Dziko yapantsi inadzakhala paraizu. Pyenepi ndi pidapikira Nciti wathu waufuni Yahova Mulungu.

Kodi mapikiro anewa anadzakwanirisikadi? Anthu azinji asaona kuti mapikiro anewa a m’Bhibhlya ndi adidi kakamwe. Mbwenye kuna anango pisanentsa toera kukhulupira kuti anthu anakhaladi na umaso kwenda na kwenda. Pyenepi si pyakudzumatirisa tayu, thangwi ife nkhabe dziwa munthu adakhala kale na ntundu unoyu wa umaso.

Anthu onsene asathabuka na madawo mbafa, pontho thangwi yakunjipa kwa nyatwa, anango asadzanyerezera kuti nyatwa zisacita khundu ya umaso. Mbwenye si pyenepi tayu pikhafuna Nciti wathu Yahova Mulungu, mu ndzidzi udacita iye anthu.

Toera kutipasa cinyindiro cakuti iye anakwanirisa pyonsene pidalonga iye, Mulungu alonga mafala awa thangwi ya mapikiro ace: “Iwo nee anabwerera kuna ine mbadzati kukwanirisa cifuniro cawo, mbwenye iwo anacita pyonsene pinafuna ine, mwakukhonda penula, iwo anadzacita mwakubverana na pikhafuna ine.”—Izaiya 55:11.

Bhibhlya isalonga kuti Yahova ndi Mulungu wakuti “nkhabe kulonga uthambi.” (Tito 1:2) Iye apikira kuti anadzacita pinthu pizinji kakamwe pyadidi ntsogolo. Na thangwi ineyi, mphyadidi kubvundzika: Kodi mphyakukwanisikadi kuti anthu akhale na umaso wakwenda na kwenda Mparaizu pa dziko yapantsi? Tisafunika kucitanji toera tione kukwanirisika kwa mapikiro anewa a Mulungu? M’matsamba anatowera a revista ino munagumana mitawiro ya mibvundzo ineyi.