Mba pasen loho u dedoo u Tartor u Aôndo ne sha tar cii, er Yesu tsengaôron nahan. (Mateu 24:14) Takerada u Bibilo u Daniel la, kaa a vese ér Tartor ne ka gomoti u Aôndo a ver yô. Ityough ihiar ki takerada u Daniel la, ôr kwagh u ugomoti mba uumace shin ityartor igen i i hemen hii sha Babilon u tsuaa la zan zan ar sha ayange ase ne yô. Ki ngur ôron kwagh u una va er ken hemen yô, ivur u sha 44 la kaa ér:

“Man sha ayange a utor mbara, Aôndo u Sha Una ver tartor ugen u ua gba mayange ga yô, man shi tahav mbu u kpaa mbua hingir sha ikev i ma ikur igen ga, kpa ua hembe ityartor igen ne cii avur avur, ua tim i, kpa u yô, ua lu gbem sha won.”

Kwaghôron u profeti ne man akaaôron a profeti agen tsengapasen er Tartor u Aôndo ua va kar a tile sha ityough ki ityartor i uumace la cii shi ua tile dông shi ua na akaa a lu zan a uumace sha inja sha inja shin tar ne yô. Uma una lu nena sha hemen u Tartor laa? Ka uityendezwa mbagenev mba doon tsung mba ica a gba ga tsô vea kure sha mi vough je ne.

• ITYAV MBIA KERA LU GA

  Pasalmi 46:9: “[Aôndo] er ityav mbi bee zan zan ar hen ikighir i tar je, A sombo ada, A kever iwange, A nande akekeautya sha usu.”

  Nenge er ior vea lu eren tom a inyaregh man kwaghfan ve hegen sha gbenda u ua wase mbagenev, a lu sha u varen ikyav mbi tswamev ga ve tar ma u doo sha shono! Ityendezwa ne ia kure sha mi zum u Tartor u Aôndo ua hii u hemen shin tar la.

• ANGEV MBUA BEE

  Yesaia 33:24: “Ma or u nan tem ker kpaa nana kera kaa er: Kwagh nyoon mo, ga.”

  Gbidye ase kwar nenge tar u u lu a or gban angev mbu ishimaa ga shin kyansa shin malalia gayô iangev mbigenev ga la. Kwagh a kera gba sha ayouacii man mcimbim ma menan ga. Ior a lu gbong gbong, kape m lu u ior mba vea lu shin tar ken hemen la una lu je la.

• KWAGHYAN UNA VA KERA BAN GA

  Pasalmi 72:16: “Iyiav mbi̱ ngee shin tar sha ityouv mbi iwoov je kpaa.”

  Tar ua va na kwaghyan mgbeghaa sha ci u hanmaor, shi hanmaor nana lu a ian i zuan a mi. Ijen man u or yan kwaghyan u injaa yinan nan la una bee.

• ICAN MAN IJUNGWEN KUA KU VEA VA KERA LU GA

  Mpase 21:4: “[Aôndo] una ese ve mliam sha ashe kera cii, ku ua kera lu ga, shin ijungwen shin mliam shin ican kpaa ia kera lu je ga, gadia akaa a tse la kar kera.”

   Kwagh ne tese ér orumace una va lu uma gbem sha won shi una lu vough ken paradiso shin tar! Ka kwagh u Orgban wase, Yehova Aôndo, a tendezwa ér una va er a vese je ne.

Uityendezwa mban doo gande u lun minii? Er ior kpishi vea lumun inyigh i môm ér ityendezwa i va lun uma i i er kwagh u i ken Bibilo la ka kwagh u saren tsung nahan kpa, atôakaa kposo kposo na yô, ior mbagenev kpishi taver ve u lumun a kwagh u va lun uma gbem sha won la. Kpa kwagh ne cier se iyol ga, sha ci u orumace môm u nan vande lun ken imba mlu ne u nana ôr se kwagh na je kpa nan ngu ga.

Uumace cii mba ikpan i isholibo man ku shi mba eren tom u nyoon iyol man u sha ican man u u lu a mtaver ker kpishi yô ica gba hegen, nahan ior kpishi lumun ér gba u kwagh a lu nahan ken uma shi kwagh ne ka kwagh u sha gbaaôndo je. Kpa kwagh ne ka kwagh u Orgban wase, Yehova Aôndo yange washima sha ci u uumace la ga cii.

Er Aôndo a soo ér una wase se se lu a vangertiôr ser uityendezwa nav cii vea kure sha mi yô, a ôr kwagh ne sha kwaghôron na wang nahan ér: “Una hide her a Mo gbilin ga, kpa una er kwagh u M we ishima yô, ikyôr ia lagh un sha kwagh u M tindi un u eren yô.”—Yesaia 55:11.

I ôr kwagh u Yehova ken Bibilo ér ka Aôndo “u A eren aie ga” yô. (Titu 1:2) Er Aôndo a er uityendezwa mba doon tsung, mba ve cii vea va kure sha mi ken hemen yô, a doo u se er kwagh sha kwaghfan, sha u pinen mbampin mba dondon mban: Ka mimi je uumace vea fatyô u lun uma gbem sha won ken Paradiso shin tar u i tendezwa a mi laa? Ka nyi i gbe keng u se er ve se zua a iwasen ken uityendezwa mba Aôndo laa? Ken u upeeji mba magazin ne mba dondon mban, u zua a ngeren mba vea wase u u zuan a mbamlumun sha mbampin mban yô.