Mahungu nya yadi nya Mufumo wa Nungungulu ma ngu tshumayedwa mafuni gwatshavbo kha nga esi a ganedego Jesu. (Matewu 24:14) Libhuku la Dhaniyeli lari khilo Mufumo wowu mufumo wu emisidwego khu Nungungulu. Gipimo 2 nya libhuku leli, gi na ni siprofeto si yeyedzago gulandreyana nya mifumo nyo khaguri nya vathu gukhugeya ga mufumo wa Bhabhiloni kala matshigoni yathu. Na li gu ganeya khesi si na giregago, livhesi 44 lari khilo:

“Nungungulu wa ndzadzini a na emisa wumbe mufumo nya gu gima kha wu na khoziswa khu mambe mafumbu. A na pfhungumula ni gu mbembisa mifumo yatshavbo ya vafumeli vale, mufumo waye wu na tiya kala gupindruga.”

Giprofeto gegi nya Bhibhiliya ni simbe niso sari khiso Mufumo wa Nungungulu wu na tshikedza mifumo yatshavbo nya vathu, wu resa gurula ni gukhadzisega nya vathu omu mafuni. Wu na ba wu khade kharini womi Mufumoni wa Nungungulu? Wona situmbiso sesi nyo tsakise si na tadzisegago nya mba hweya!

• DZINYIMBI KHA DZI NA NGA MANEGA GAMBE

  Ndzimo 46:9: ‘[Nungungulu] a na vbedza mayunga kala mahegiso nya litigo, a na fanya wulaho, a fanyeledzela siholoma; a rinya niloni dzikareta nya nyimbi.’

  Nga dundrugeya khedzi litigo li na khalago khidzo tepo dzitsapawu ni wugengeyi si thumiswago gasi gu gira siphisa si na thumisedwago gu phasa vathu vbavbandze nya gu va songe! Gitumbiso gegi gi na tadzisega vbavbatshi nya Mufumo wa Nungungulu.

• MADWALI MA NA FUVA

  Isaya 33:24: “Mwalo ni moyo muvbanyi . . . a na gukhuye: “Eni nyi ngu dwala.”

  Nga dundrugeya mafuni gwatshavbo gu si manegi muthu a tshanisekago khu kotani nya madwali nya monyo, kankro, malaria, mwendro mambe madwali. Dzispitali ni mirendre kha si na nga vbwetega gambe. Hi na vbanya gwadi. Uwowo khuwwo wumindru nya vathu mafuni.

• KHA GU NA NGA MANEGA GAMBE DZINDZALA

  Ndzimo 72:16: ‘Tigoni gu na fumwa dzimbewu, dzi fenengedza kala vbatshani nya sigomo.’

  Mafu ma na fuma guhodza nyo eneye vathu vatshavbo nigu vatshavbo va na gu mana. Dzindzala ni madwali ma vangwago khu guhamugega nya guhodza nya gwadi kha si na nga manega gambe.

• WUVI, NI GUTSHANISEKA NI GUFA KHA SI NA NGA MANEGA GAMBE

  Gutuledwa 21:4: ‘Nungungulu a na va bavbula marongo mahoni gwawe, kholu gima kha gu na manega gambe gufa, gulila gu na vbela, ni gudilela ni wuvi, kholu dzitshanisa dza gale dzi vbindride.’

   Isoso so thula gu khiso hi na vbanya hi sifi nigu na hi vbelede mafuni momu! Khiso esi Muvangi wathu, Jehovha Nungungulu, a tumbisidego.

Ina satshavbo soso si na girega kamo? Ambari olu gutala nya vathu va nga hadzi tsakeya ngudzu womi wowu wu tumbiswago omu nya Bhibhiliya, khu sighelo nya singi si ngu va garadzeya gu khodwa gu khavo vathu va na vbanya kala gupindruga. Isoso kha si hi hlamadzisi kholu a mwalo muthu a vbanyidego womi wowo gasi a hi embeya edzi wu khadego khidzo.

Vathu vomo va tshaniswa khu gighoho ni gufa, ni gutshaniseka, ni sigaradzo khu myaga nya yingi nyo bwe nya vangi vakona va pimisa gu khavo khayo aya mavbanyelo yakona. Ganiolu isoso si hambanidego ngudzu ni esi Muvangi wathu, Jehovha Nungungulu, a nga ba a vbweta gu khuye vathu va vbanya khidzo.

Gasi gu hi phasa gu khodwa satshavbo a hi tumbisidego, Nungungulu ganede esi omu nya lito laye: ‘Magana ma dugago khu kanani gwangu, kha ma na bwelela mahala nyamba ninga mihandro yaye, aholu ma na tadzisa guhaladza gwangu, ni gu gira iso nyi ma rumedego iso.’ — Isaya 55:11.

Bhibhiliya ya gu rana Jehovha kha Nungungulu “a si liphigo.” (Tito 1:2) Kha nga olu a hi tumbisago silo sesi nya gu tsakise khu wumindru, hi na yeyedza wu wugengeyi khu gu hi dzi gira siwudziso sesi: Ina kamu si ngu kodzega gu vathu va vbanya kala gupindruga mafuni paradhesini umo hi tumbiswago? Ginani hi yedego gu gira gasi hi wuyedwa khu situmbiso sa Nungungulu? Umo nya dzipajina dzi landreyago nya revhista yeyi, u na mana mahungu ma na gu phasago gu hlamula siwudziso sesi.