Ja lekil rason sbʼaja sGobyerno ja Dyos wani cholxel bʼa yibʼanal ja Luʼumi, jastalni yala ja Jesús (Mateo 24:14). Ja libro bʼa Daniel wa xcholo ja Gobyerno it sbʼajni Dyos. Ja bʼa kapitulo 2 bʼa libro jaw wa xcholo kajkajil ja chonabʼik ma gobyernoʼik oj sjeʼ sbʼaji bʼa ti kʼejan man poko Babilonia man jtyempotik, sok ja bʼa bersikulo 44, wa xyala jastal oj chʼakuk:

«Ja bʼa skʼakʼujik ja mandaranumik jaw, ja Dyos bʼa satkʼinali oj ya kujlajuk jun gobyerno bʼa mini oj ajuk chʼayuk snajel. Ja gobyerno iti mini oj ajuk ekʼuk bʼa pilan chonabʼ. Oj swachʼtalaʼuk sok oj xchʼaysnajel spetsanil ja gobyernoʼik jaw, sok kechanta ni yeʼn oj kan kulan bʼa tolabida».

Ja it soka tuk tekstoʼik wa xyala ja sGobyerno ja Dyos ojni xchʼaysnajel spetsanil ja gobyernoʼik bʼa luʼum sok oj yijan lamanil sok mixa maʼ ay jas oj ekʼ sbʼaj ja bʼa Luʼumi. ¿Jastal maʼ oj ajyuk ja sakʼanil ja bʼa yibʼ skʼabʼ ja Gobyerno it? La kiltik jujuntik tsamal kʼapjelal bʼa ojxta kʼot smeranil.

• MIXA OJ AJYUK GUERRAʼIK

  Salmo 46:9. Ja Dyos «yeʼn wan yajel kʼot tikʼan ja kʼakʼaneli bʼa yibʼanal ja luʼumi. Ja Yeʼn wa sbʼija ja arco sok wa skʼoktalan ja lanza; ja Yeʼn wa stsika sok kʼakʼ ja karretaʼik bʼa kʼakʼaneli».

  ¿Pensaraʼan jastal maʼ oj ajyuk ja luʼumi ta yibʼanal ja jasunuk soka snajel skʼulajel yamkʼabʼalik bʼa kʼakʼanel jaʼ x-axi makunuk bʼa skoltajel ja ixuk winiki? Pe ja jastik it ojni ekʼuk ja bʼa sGobyerno ja Dyos.

• MIXA MAʼ OJ MALOʼAXUK

  Isaías 33:24. «Sok mini jun swinkil oj yale: ‹Maloʼayon›».

  ¿Pensaraʼan jastal maʼ oj ajyuk ja luʼumkʼinal ta mixa ayuk chamelik bʼa kaltsiltik, cáncer, diabetes sok tuk chamelik? Lek jachukxta, mi yajnaluk ospitalik mini aʼanik. Pes spetsanil ja swinkil ja Luʼumi mixa oj koʼuke chamel.

• MIXA OJ AJYUK WAʼIN

  Salmo 72:16. «Oj ajyuk jitsan sat jastik junuk ja bʼa luʼumi; sok ja bʼa sniʼ ja witsiki oj jelxuk ele».

  Ja Luʼumi oj bʼaʼalanuk lek sok ojni yaʼ bʼa jpetsaniltik. Mixa oj ajyuk waʼin.

• MIXA OJ AJYUK OKʼEL, WOKOL SOK CHAMELCHʼAKEL

  Apocalipsis 21:4. Ja Dyos wa xyala: «Mi xa ni oj to ocʼuque otro vuelta. Mi xa oj to tristeaxuque. Mi xa ni oj couc mas ja xchamelei. Mi oj ajyuc ja syajal ja scuerpoei. Mi ni maʼ oj chamuca porque ja svidae jastal ajyi, ecʼ ta ni juntiroa, stzʼacatal ja Diosi».

   Ja ixuk winik oj ajyuk jun tsamal sakʼanile bʼa tolabida bʼa jun kʼachinubʼ ja bʼa Luʼumi, bʼa mixa oj koʼuke chamel. Jani ja it ja jas skʼapunejkitik ja lekil jKʼulumantiki, ja jDyostik Jyoba.

¡Lekukxta meran ja it! Oja wal ja weʼn. ¡Bʼa mi oj skʼan-e ajyel sakʼan tolabida jitsan ixuk winik jastalni wa xyala ja Biblia! Pe jitsan jelni wokol skʼuʼane ja it, pes kibʼanaltik wala chamtik.

Ja ixuk winik kʼajyelexa soka mulali, ja chamelchʼakeli sok yijel wokol ja bʼa sakʼanile. Pe ja Dyos mini jachukuk ajyi ja spensar sbʼaja ixuk winik.

Bʼa oj jkʼuʼuktik lek ja jastik skʼapunej ja Dyos, ja bʼa Yabʼali, ja yeʼn yala jaman lek: «Jach oj kʼotuk ja kabʼal wa x-el ja bʼa jtiʼi. Mini oj kumxuk jmok ta mey slekilal, pe ojni lajxukyuj skʼulajel chikan jas wa xkʼana, sok ojni yil meran slekilal ja bʼa jas oj jek skʼulajel» (Isaías 55:11).

Ja Biblia wa xyala ja «Diosi, mi ni oj ecʼ ja jas yaluneja» (Tito 1:2). Yuja yeʼn skʼapunejkitik ja tsamal jastik it, la jpensaraʼuktik sbʼaja it: «¿Meran maʼ oj bʼobʼ ajyukotik sakʼan tolabida bʼa jun kʼachinubʼ ja bʼa Luʼumi? ¿Jasa tʼilan oj jkʼuluktik bʼa yajel el slekilal ja jas skʼapunej ja Dyosi?». Ja artikuloʼik jakumi oj skoltayotik sjakʼjel ja sjobʼjelik it.