A mahungu yo saseka ya Mufumo wa Nungungulu ma kari va chumayelwa misaveni yontlhe khwatsi hi lezvi Jesu a wulileko. (Matewu 24:14) A bhuku ga Dhaniyeli gi wula lezvaku a Mufumo lowo mufumo wu yimisilweko hi Nungungulu. A cipimo 2 ca bhuku legi, ci na ni zviphrofeto zvi kombako a kulandzelana ka mifumo yo kari ya vanhu kusukela ka mufumo wa Bhabhuloni kala masikwini ya hina. Na gi wulawula hi lezvi zvi to maheka, a vhesi 44 gi ngalo:

‘A masikwini ya tihosi leto, Nungungulu wa le tilweni i ta vhuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka gin’wani tiko. Wu ta pandza wu lovisa yontlhe mifumo leyi, wona wu ku tsondzoma kala kupindzuka.’

A ciphrofeto leci ca Bhibhiliya ni zvin’wani zvi wula lezvaku a Mufumo wa Nungungulu wu ta vhaleta mifumo yontlhe ya vanhu, wu tisa kurula ni kutshamiseka ka vanhu laha misaveni. A wutomi gi ta tshamisa kuyini Mufun’weni Nungungulu? Wona zvitsumbiso lezvi zvo tsakisa zvi to tatiseka ku nga hi kale!

• A TIYIMPI TI NGA TA HAVA KONA

  Lisimu 46:9: ‘[Nungungulu] i maha a tiyimpi ti khawula kala magumelweni ya misava, wa tshova wura, ni ku tsema tlhari gi pulakanyeka; a hisa tikareta ndzilweni.’

  Hi nga ehleketa hi lezvi a tiko gi to tshamisa zvona a cikhati leci a timali ni wutlhari lezvi zvi tirisiwako kasi ku maha zvibhamu zvi to tiriselwa ku vhuna vanhu wutshan’wini ga ku va daya! A citsumbiso leci ci ta tatiseka hasi ka Mufumo wa Nungungulu.

• A MABABYI MA NGA TA HAVA KONA

  Isaya 33:24: ‘A ku na muaki ni mun’we a ta ngaku: Ndza babya!’

  Hi nga alakanyela ku misaveni yontlhe ku nga ha hi na munhu a xanisekako hi kota ya mababyi ya mbilu, kankro, malaria, kutani mababyi man’wani. A zvipitali ni mimuri zvi nga ta ha laveka. Hi ta hanya khwatsi. Lego hi gona wumandziko ga vanhu vontlhe misaveni.

• A TINDLALA TI NGA TA HAVA KONA

  Lisimu 72:16: ‘A mavele ma ta pfuna nguvhu tikweni ni lomu hehla ka zvitsunga.’

  A misava yi ta pfuna zvakuga zvo enela vanhu vontlhe niku vontlhe va ta zvi kuma. A tindlala ni mababyi ma vangiwako hi kuvhumaleka ka zvakuga zva zvi nene zvi nga ta hava kona.

• A KUBAYISA, NI KUXANISEKA, NI KUFA ZVI NGA TA HAVA KONA

  Kuvhululelwa 21:4: ‘[Nungungulu] i ta kulula mihloti yontlhe mahlweni yabye. Ku nga ha ta va kona kufa, hambu ni hlomulo, kutani kurila ni kubayisa; hakuva a zvilo zvo sangula zvi hundzile.’

   Lezvo zvi wula ku hi ta hanya hi ngafi na hi mbhelele kwalaha misaveni! Hi zvalezvo a Muvangi wa hina, Jehovha Nungungulu, a tsumbisileko.

Xana zvontlhe lezvo zvi ta maheka hakunene? Hambu lezvi a kutala ka vanhu va nga wa ta gi tsakela nguvhu a wutomi legi gi tsumbisiwako lomu ka Bhibhiliya, hi zvigelo zvo tala zva va karatela a ku kholwa lezvaku a vanhu va nga hanya kala kupindzuka. Lezvo a zvi hlamalisi hakuva a ku na munhu a hanyileko wutomi lego kasi a hi byela lezvi gi nga tshamisa zvona.

A vanhu va kari va xanisiwa hi ciwonho ni kuva, ni kuxaniseka, ni zvikarato hi malembe yo tala laha ka kuza a votala va alakanya ku hi gona hanyela ga kona. Kanilezvi lezvo zvi hambene nguvhu ni lezvi a Muvangi wa hina, Jehovha Nungungulu, a nga lava ku a vanhu va hanyisa zvona.

Kasi ku hi vhuna ku kholwa zvontlhe lezvi a hi tsumbisako, Nungungulu i wulile lezvi hi mhaka yakwe: ‘Yi tava tano a mhaka ya mina yi humako non’wini wa mina; yi nga ta tlhelela ka mina mahala; kanilezvi yi ta maha lezvi ndzi zvi xuvako, yi ta hetisa lezvi ndzi yi rumeleko zvona.’ — Isaya 55:11.

Lomu ka Bhibhiliya, Jehovha i tlhamuselwa kota Nungungulu “loyi a nga hembiko”. (Titusi 1:2) Kota lezvi a tsumbisako zvilo zvontlhe lezvo zvo tsakisa xungetano hi wumandziko, zvi tava zvi nene a ku ti wutisa lezvi: Ina zva koteka hakunene ku a vanhu va hanya kala kupindzuka Paradhiseni laha misaveni? Zvini hi faneleko ku maha kasi hi kuma makatekwa ya Nungungulu? Ka mapajina ma landzelako ya revhista legi, u ta kuma mahungu ma to ku vhuna ku hlamula zviwutiso lezvo.