Te lek yachʼil kʼop yuʼun te Wentainel yuʼun te Diose yak ta cholel ta swolol Balumilal jich bitʼil la yal te Jesuse (Mateo 24:14). Te libro yuʼun Daniel ya scholbey skʼoplal te talem ta stojol Dios te Wentainel-abi. Te capítulo 2 yuʼun te libro-abi tey ya schol-a te ya xchiknaj ajwaliletik te ay yipik te jajch tal ta antiguo Babilonia jaʼto ta jkʼajkʼaleltik. Te versículo 44 tey ya yal-a te bin ya xkʼot ta pasel ta patile:

«Te yorahil te ajwaliletic ini te Dios ta chʼulchan ya me shach jchahp ban cʼalal ya scuentahin jtuhl ajwalil te mayuc bin ora ya xlaj, soc ma ba ya xʼacʼot hilel ta scʼab yan nación; ha ya swuyticlan soc ya slajinlan spisil te jchahp ban cʼalal scuentahinejic te ajwaliletic ini, pero sbahtel qʼuinal ya xhil stuquel».

Te albilkʼop ini sok yantikxan albilkʼopetik te ay ta Biblia jamal ya yalik te jaʼxanix ya xjil ta mantalteswanej te Wentainel yuʼun te Diose sok te jaʼ ya sjelolin jilel te ajwaliletik ta Balumilale. Jaʼme ya yakʼ lamalkʼinal ta Balumilal sok te bintik toj ta pasele. ¿Binwan yilel ya xkʼot te kuxlejalil te kʼalal jaʼ  yakix ta mantalteswanej-a te Wentainel yuʼun te Diose? Kiltik cheʼoxebuk te bintik tʼujbil yaloj Dios te yananix xbajt skʼotes ta pasel-ae.

• MAʼYUKIX GUERRAETIK

  Salmo 46:9. Te Diose «jcʼaxel ya yacʼ quehchajuc guerrahetic cʼalal ta stiʼil bahlumilal; ya swacʼ te tʼihmalteʼ soc te lanza, soc ya schicʼ ta cʼahcʼ te carretahetic yuʼun guerra».

  ¡Nopanax awaʼiy te binwan yilel te kuxlejalil te jaʼuk ya yichʼ tuuntesel te takʼin sok te spʼijil te ants winik ta swenta skoltayel-a te ants winiketike, ma jaʼuk te ya yichʼ spasel aʼtejibaletik yuʼun guerrae! Te kʼalal yakix ta mantalteswanej-a te Wentainel yuʼun te Diose yame xlaj skʼoplal te guerraetik jich bitʼil te albil skʼoplale.

• MAʼYUKIX CHAMEL

  Isaías 33:24. «Mayuc machʼa te nahinem ta Sión te hich ya yal: Ayon ta chamel».

  Nopanax awaʼiy te kʼalal maʼyukix-a te cancere, chamel yuʼun oʼtanil, azúcar chamel sok yantikxan-abi. Jich yuʼun ma puersaukix-a te hospitaletik sok te poxiletik. Jaʼme jich ya x-ayin skuxlejalik te machʼatik ya xnainik ta Balumilale, maba ya stsakotix ta chamel.

• MAʼYUKIX WIʼNAL

  Salmo 72:16. «Ayuc me bayel trigo [o weʼelil] ta lumqʼuinal, ta baba witsetic».

  Yame xbajt yakʼ bayal weʼelil te lumkʼinale sok pajalme ya yichʼ pukel. Yame xtupʼ te wiʼnale sok mame ayuk machʼa ya stsakotix ta chamel yuʼun te wiʼnale.

• MAʼYUKIX BIN KʼUX, MEL-OʼTAN SOK LAJEL

  Apocalipsis 21:4. «Sok yame xkustiklanbot yaʼlel sitik yuʼun te Diose, maʼyukix lajel, maʼyukix mel-oʼtan, okʼel sok te bin kʼux. Te bintik ay ta nailal chʼayix bael spisil».

  Yame xkʼatpʼujotik ta tojil ants winiketik sok yame xkuxinotik ta sbajtelkʼinal liʼ ta Balumilal te kʼalal pasbilix ta nichimal kʼinal-ae. Jaʼ te bintik jamal yaloj te Jehová te Jpaswanej kuʼuntike.

¿Yabal schʼuun awoʼtan te ya xkʼot ta pasel spisil te bintik la yichʼix alele? Bayal ants winiketik ya smulanik te kuxlejalil te ya yal te Bibliae, pero bayal machʼatik ma xkʼot ta yoʼtanik te bin-utʼil ay-a te kuxlejalil ta sbajtelkʼinale. Sok ma chajpuknax ta aʼiyel-a te bin yuʼun jich ya snopike, melel manix ayuk machʼa kuxinem ta sbajtelkʼinal-a.

Ayix bayal jaʼbil te mosoinbil yuʼun mulil sok lajel te ants winiketike, jaʼ yuʼun skuyojik te yuʼun-nanix jich-a te ay jwokoltik sok te ay bintik ya jmel koʼtantik yuʼune. Jkʼaxel ma pajaluk sok te bintik snopoj Dios ta stojol te ants winiketik ta sjajchibale.

Swenta ya kakʼbeytik yip te schʼuunel koʼtantik ta swenta te bintik jamal yaloj te Diose, jich ya yalbotik: «Hich ay te jcʼop te ya xlocʼ ta que: ma ba jochol ya suht tal ta jtojol, ha ya spas te bin ya scʼan coʼtan, soc ha ya scʼohtes ta pasel te bin scuentahil te la jticon bahele» (Isaías 55:11).

Te Biblia ya yal te «ma spas lot» te Diose (Tito 1:2). Jich bitʼil te jaʼ sjapojbotik spisil te utsilaletik-abi, jich yuʼun bayal skʼoplal te ya skʼan ya jnopilan ta koʼtantik te jojkʼoyeletik ini: «¿Yuʼun-nixbal ya xjuʼ xkuxinotik ta sbajtelkʼinal liʼ ta Balumilal te kʼalal pastajemix ta nichimal kʼinal-ae? ¿Bin ya skʼan ya jpastik yuʼun ya jmulanbeytik yutsilal te bintik jamal yaloj Dios te ya spase?». Yame atabey sujtib ta yantik artículo.