INEISO SANERARO ḆEPYUM KAKU! Manḇedaw koḇedi ḇyeasas fa ḇyuk kankenem fyoro ḇe ko ro supswan ine. Ḇape, snonkaku ḇebor sya sikyar mankun ḇa faro asas ine. Soḇe, ’Sifawi kaku na ras oso ido na simar. Iso sifawi monda ya.’ Ono sisya soḇe na snonkaku sya sikenem fyoro, ḇape ro supswan ine ḇa. Sikofen snar snonkaku nari sikenem fyoro ro nanki rofyor simar kwar. Moḇsa kwara rai?

Kokarem fakfuken ani ḇaim, mkorama kawos rosai Refo ikofen faro fakfuken rikior nane: Ro nyan moḇsa Allah ifrur snonkaku sya rai, na rosai kofawi ro kankenem koḇena ro ras ḇarpon iyama ya? Rosai Allah marisen Ḇyena faro supswan ma snonkaku sya? Rosai ḇefnai fa snonkaku sya simar?

Ro roi ḇekenem nakam Allah ifrur ro supswan ine, snonkaku sya siso ḇepyum syadi kaku. Rosai ḇefnai ya? Refo fyasnaḇair snar snonkaku si monda ḇeḇefrur imnis Allah nin Ḇyedi. (Kejadian 1:26, 27) Ine kyurfasna, snonkaku sya sna rari ma kakara Allah Ḇyena, imnis raris saswar ma nanapes.

Osower ido, Yahwe ḇyuk snonkaku sya kako fa sna samambraḇ fa skara ma sifrur snemuk. Snonkaku sya kako na smambir roi ḇeḇye ma ḇeḇyeḇa na, ma simarisen fa smambir kaku Allah. Iso ḇefnai fa na koḇesyowi kaku roi ifrur ro supswan ine raris komarisen faro seni ma musik na. Ḇefandun kaku iso, snonkaku sisyom Yahwe I ḇe Manḇedaw koḇedi. Ine nafrur fa snonkaku sya siḇesebur kuker roi ḇekenem na.

Kwarapan: Allah ḇyuk ḇe snonkaku sya kam samambraḇ ani ma na sifrur roi ḇeba syadi wer. Rosai ḇefrur fa Allah ḇyuk roi anna kam mboi kokenem taun riḇeḇeso monda? Ine kyurfasna Allah imarisen insama kokenem ro supswan ine isof fyoro.

Snonkaku sya skara Allah ifrur si fa sikenem fyoro ro supswan ine ḇa. Soḇe, supswan ine ḇyeḇefrur ḇe moḇ sḇarek fasaw monda. Supswan ima moḇ fa smam na mansei ḇeḇye fa ḇera ḇe nanki ma ikenem fyoro kuker Allah I. Roi ine nkaku ido, Allah iso ḇefrur roi ḇeḇarḇor ro  supswan ine. Ḇape, Allah imnis rarirya ḇa. Refo ikofen, ”Nyan Ḇyena kam nanapes. Allah ima idworen, inapes ḇesya kwar; Kyaku ma sneri inapes.”​—Ulangan 32:4.

Refo fyasnabos rosai Allah marisen Ḇyena faro supswan ine, ”Nanki ima Yahwe moḇ ḇyediri, ḇape supswan ine ḇyuk kwar ḇe snonkaku sya.” (Mazmur 115:16) Allah ifrur supswan fa ḇyemoḇ ḇebarek ḇepyum faro snonkaku, nari iko isof fyoro. Allah ifrur supswan ine kuker roi na ḇefrur kosma fainda ro kankenem koḇena isof fyoro.​—Kejadian 2:8, 9.

”Nanki ima Yahwe moḇ ḇyediri, ḇape supswan ine ḇyuk kwar ḇe snonkaku sya.” —Mazmur 115:16

Refo ikofenbos kaku rosai ḇefnai fa Allah ifrur snonkaku sya. Allah iwan snonkaku ḇerandak fa sfarbor ro supswan ma suḇepoik rona, ma supoik faro aiwan sya kam. (Kejadian 1:28) Inja, Yahwe ḇyuk fararur ḇe su fa sufaduru ma sufrur supswan ḇesiper ine ḇe yaf Eden ḇepyum kaku. Ine fakamaman ḇeba kaku susmana! Allah imarisen insama Adam ma Eva kuker romawa suḇesya sikenem fyoro ro supswan, ḇape ro nanki ḇa.

Inja, rosai ḇefnai fa komar ya? Refo ikofenḇair snar malaikat oso Allah ifrur ya, ḇarpurya sap i ḇe Setan roḇa Ibiris, ḇyesewar kaku fa ifrur napnap fararur Allah ifrur ro Eden ya. Rosai ifrur ya?

Setan dawninyan Adam ma Eva su fa suso i fa sumbroḇ Allah. Setan ikofen Allah idwarek roi ḇepyum ro su, iso hak suḇena fa sukinfir ro mankunsu roi ḇekaku ma ḇesasarna. Sukyar syadi Setan i, inja supampum Allah I. Roi susma yaiso, suḇe mansar binsar ma sumar, ine imnis kaku rosai Allah ikofenna. Kankenem fyoro ro Firdaus ḇepyum ya napromes monda.​—Kejadian 2:17; 3:1-6; 5:5.

Soasuser Adam ma Eva suḇena ḇa nawyae ko isof fafisu ine. Refo ikofen, ”Sasarya ssyunḇe supswan ine snar snonkaku oser [Adam], ma snar sasar ani, ifnai marmarya. Eḇedari marmarya iduḇ faro snonkakusyakam.” (Roma 5:12) Komar snar kona sasar ma marmar ro sinan ḇerandak koḇesuya, Adam ma Eva su, ḇape inema marisen Allah Ḇyena ḇa.

Ḇaḇembroḇ ro Eden ine nameruk Allah marisen Ḇyena faro snonkaku ma supswan ine ḇa. Saswar ma nanapes Allah Ḇyena inapes kaku inja nafrur fa ḇyuk nyan ḇesae insama komkei ro sasar ma marmarya. Manwawan Paulus ikofen, ”Snar marmar irya sasuref ro sasarya; ḇape kankenem ḇekain fyoro-fyoro fnoḇek Yesus Kristus Manseren koḇedi.” (Roma 6:23) Snar saswar Allah Ḇyedi, ”ḇyuk kwar Rumkun Mandos ḇyedi insa snonkaku ḇekyar faroi sya sroḇa, mboi sisma [kankenem fyoro].” (Yohanes 3:16) Yesus imarisen ḇyuk kankenem ḇyedi fa ḇyefarsarser. Rarirya, kosma kaḇer barakas ḇepromes anna snar Adam sasar ḇyena. *

Fyoro ḇa wer, Allah asas Ḇyena fa ifrur supswan ine ḇe firdaus ndarirya. Na barek rodiwa rofyor wasouser ananun Yesus ḇyenane, ”Mkosun ro kedwai ḇefyos ya, snar kedwai ḇeḇam ma nyan ḇemgkeiya dun faro [marmarya], ma kawasa sibor ssun ro i; snar kedwai ḇefyos ma nyan ḇemkei ḇa ḇeyun faro kankenem ya, kawasa ḇesma i sya sibor ḇaḇeri.” (Matius 7:13, 14) Inja, roi wakinfirna iso ḇefasnaḇair ras ḇarpon bedi. Rosai nari wafrurya?