Z’AVALE MBAMBA NGAKA’A JI! Nté wongan a ka’ale bia ényiñe ya nnôm éto, e si va. Ve jame da, abui bôte da yen ayaé ya buni jam ete. Ba jô na, ‘Môt ase a bili na a wu môs éziñ. Nne ényiñ é ne nalé, ane ô nyiñi ô su’ulane fe wu.’ Bôte bevok ba simesane na môt a ne fo’o nyiñe nnôm éto, ve sa ke si va. Ba jô na, asu ya na môt a nyiñe nnôm éto, da sili na a tate wu, éyoñ éte a ke yôp. Wo wo simesan aya?

Ôsusua na wo ve éyalan, bi tame tate fase biyalane Kalate Zambe a ve a lat a minsili milale mi: Avale môt a nga téban da liti bia jé a abim éyoñ a mbe na a nyiñ? Nsôñan ôvé Zambe a mbe a bili atata’a asu si a môta binam? Aval avé awu e nga nyiine be bone be bôt?

E bitétéa bise Zambe a nga té si va, môta binam a nga tébane ngum aval. Amu jé bia jô nalé? Kalate Zambe a liti na môta binam nnye étam a nga téban “éve’ela” Zambe. (Metata’a 1:26, 27) Nalé a tinan aya? Nalé a tinane na, bone be bôte be bili mam méziñ a mefulu ma lu’an a ma Zambe a bili, ane nye’an a nkômbane ya bo zôsô.

Nde fe, môta binam a nga vebane ngule ya fas a wô’ô mam, ô kô’ôlane mbamba ntaban a ngule ya yeme jôm é ne mvaé a ji é n’abé, a nkômbane ya bi mbamba élat a Zambe. Jôme te nje bi ne ngule ya bi ésemé éyoñe bia fas aval ane ñyeme yôp ô né, a vak éyoñe bia yene bitétéa bise bia bômane bia, a atyeñe nkômane biôm, mezik nge bia. Jame da dañ e ne na, fo’o ve môta binam nnye étam a ne ngule ya kañe Nté biôme bise. Mame mete mese ma liti na, beta mbi’ili a ne zañe môta binam a bitétéa bivo’o bise bi ne si va.

Bi tame fe fase jame di: Ye Zambe a nga ye ve môta binam abime mbamba mefulu di a ngule ya bo bitua bi mame bi nge a mbe a yeme na, a ye nyiñe fo’o ve bone mimbu? Nya ajôô a ne na, Zambe a nga ve môta binam mefulu mete mese a ngul éte na, a bu’uban a ényiñe ya melu mese e si va.

Bôt abui ba jô na, Zambe a nji té môta binam na a nyiñe si nnôm éto. Ba yemete na, si é nga kômebane mfa’a ya bo étaba’a asu mon éyoñ, vôme be ne ve’ele bone be bôt a yene za nnye a  yiane ke nyiñe nnôm éto yôp a Zambe. Ve nge nalé a n’été, ye nalé a nji tinane na, Zambe nnye a ne ntene ya mbia be mam bese a abé ese e maneya yametane si nga? Ôsimesan ôte ô nji lu’an a avale Zambe a né. Kalate Zambe a jô a lat Zambe na: “Mezene mé mese m’atôñe nya ntyi’ane mejôô: a ne Zambe ya zôsô a te mbia jam, a ne nya ntyi’ane mame a zôsô.”​—Deutéronome 32:4.

Kalate Zambe a kôme liti nsôñan Zambe a mbe a bili atata’a asu si éyoñ a jô na: “Yôp e ne yôpe Jehova; ve si nyô a veya je bone be bôt.” (Besam 115:16) Ôwé, Zambe a nga té si na é bo abeñe vôme ya yen a mis, abeñ étaba’a asu môta binam, a nga jalé fe je a mame mese me ne bo na bi bu’uban a ényiñe nnôm éto.​—Metata’a 2:8, 9.

“Yôp e ne yôpe Yéhôva; ve si nyô a veya je bone be bôt.”​—Besam 115:16

Kalate Zambe a kôme fe liti nsôñane Zambe asu môta binam. Ésaé a nga ve fam a minga ôsu é mbe na be ‘yiane si, a jôô je; a jôô fe . . . jôm ése é vee j’awulu si.’ (Metata’a 1:28) Avale mbamba jam ete na, be ba’ale étaba’a jap a mane yametane Paradis e si ése! Teke bisô, mbamba jam a mbe a yange’e Adam ba Eve a bone bap, a mbe ényiñe ya nnôm éto e si va, sa ke ma’ane m’éziñ e yôp été.

Nde ñhe, amu jé bia wu? Kalate Zambe a liti na éngele Zambe éziñ, nyi be nga su’ulane loone na Satan Diable, a nga jeñe na a ndaman nta’ane mame Zambe a nga mane bo afup Éden. Aval avé a nga bo de?

Satan a nga joñelô bebiaé b’ôsu bangan Adam ba Eve, asu na be tôñe nye éngana’a a nga bo Zambe. Éyoñe Satan a nga jô na Zambe a nyume be mbamba jam (fili ya top a bebien jam é ne mvaé a ji é n’abé), be nga ke ngame Satan a lume Zambe mvus. Asu’ulane y’été e mbe aya? Be nga su’ulane wu, fo’o ve ane Zambe a nga kate be. Be nga jañele ébotane ya nyiñe Paradis nnôm éto e si va.​—Metata’a 2:17; 3:1-6; 5:5.

Éngana’a Adam ba Eve be nga bo é nga soo mbia be mame be môta binam azukui den. Mejô me Zambe ma jô na: “Abé e nga zu si nyô amu môte wua [Adam], a awu e nga zu amu abé; a nalé awu e nga kui be bôte bese.” (Beromain 5:12) Bia wu amu bia bese bi nga nyoñ abé a awu be bebiaé bangan, sa ke amu na Zambe nnye a nga mane ‘ta’a mame’ nalé.

Éngana’a é nga boban afup Éden é nji tyame nsôñane Zambe y’atata’a asu si a môta binam. Amu Zambe a ne nye’an a nya zôsôô, mefulu mete me nga tindi nye na a kôme zene ya kôté bia éto ôlo ya abé a awu. Nlômane Paul ô nga tili na: “Amu ma’ane ya abé me ne awu; ve mveane zesé ya Zambe ô ne ényiñ ya melu mese be Christ Jésus Tate wongan.” (Beromain 6:23) Zambe ya nye’an a nga “lôm atyi’i Mone dé [Yésus Krist], ajô te bôte bese môt a buni nye a ye jañ, ve tabe ényiñ ya melu mese.” (Jean 3:16) Éyoñ a nga ve émien asu ntañ, Yésus a nga mane kôté mame mese me nga jañ amu Adam. *

Ana’ana, ngaka’a Zambe a nga bo na si ja ye mane bo Paradis ja zu tôéban. Wo fe ô ne bu’uban a bibotane mbamba be mame bete nge wo vô’ôlô mejô me Yésus ma: “Nyi’an mbé ô ne tyôtyoé: amu mbé ô ne anen, a zen é ne ndam, je ake vôm bôt be ajañ, a bôt be ake wôé abui. Amu mbé ô ne tyôtyoé, a zen é ne zôsô, je ake vôm bôt be anyiñ, a bôt be ayene je be ne tyôtyoé.” (Matthieu 7:13, 14) Ôwé, womien wo ye tyi’i aval avé ényiñe jôé ya melu ma zu ja ye bo. Wo ye ñhe bo aya?