AI RAOIROIRA TE KANTANINGA AEI! E berita ara tia Karikiriki bwa e na karekea nakoira te maiu n aki toki n te aonnaba aei. Ma a bati ake e kangaanga irouia bwa a na kakoauaa. A taku: ‘Ti na boni bane ni mate. Ti maiu ao ti na manga mate, anne aron te maiu.’ Ma iai aika a kakoauaa bwa iai te maiu n aki toki, ma tiaki n te aonnaba aei. A taku bwa e tii kona n reke te maiu n aki toki ngkana ko mate ao ko nako karawa. Tera am iango?

Imwain ae ko kaeka, e aera ko aki iangoa moa ana kaeka te Baibara nakon titiraki aika tenua aikai: Tera ae oti man aroni karikan te aomata, bwa e na abwakira raoi maiuna? Tera ana moani kantaninga te Atua ibukin te aonnaba ao aomata? E kangaa n reke te mate irouia aomata?

I buakoni baika maiu ni kabane ake e karikii te Atua n te aonnaba, ao bon tii te aomata ae rangi n okoro arona. N te aro raa? E kaotia te Baibara bwa e karikaki n ‘ai aron’ te Atua ao ni ‘katotongana.’ (Karikani Bwaai 1:26, 27) Tera nanon anne? Nanona bwa iai irouia aomata aroaro ao anua aika iai iroun te Atua, n aron te tangira ao te kaetitaeka ae riai.

A anganaki naba aomata te konabwai n iango ma te wanawana, ao n ataa kaokoron ae raoiroi ma ae buakaka, ao kan ataakin te Atua ao karekean te iraorao ma ngaia. Anne bukina ae ti kona ni kakaitau iai n tamaroan te iuniweeti aei, kamimin te karikibwai, ao te korobanna, te katangitang, ao te kario. Ae rianako riki, iai irouia aomata te konabwai ae okoro ae te kona n taromauria te tia Karikiriki. Man aroaro akanne ae a a rangi ni kaokoro iai aomata ma karikibwai riki tabeua aika maiu n te aonnaba.

Ngaia are iangoa aei: E na angania aomata aroaro aika tamaroa aikai te Atua, ao konabwai aika taraa n akea tiatianakia bwa a na karikirakei, ngkana e boni karikira bwa ti na maiu tii i nanon tabeua te ririki? E bon anganira te Atua aroaro ao konabwai aikai bwa ti aonga ni kimwareirei n aki toki n te aonnaba.

Ma a taku tabeman bwa tiaki ana kantaninga te Atua bwa a na maiu n aki toki aomata n te aonnaba. A taku bwa e karikaki te aonnaba bwa mwengara i nanon tabeua te tai, ike ti na kataaki iai ao n noraki bwa antai aika tau n nako karawa ao ni maiu n aki toki i rarikin te Atua. Ma ngkana e koaua anne, tiaki ngkanne e na bukinaki te Atua ibukini baika bubuaka ni kabane aika n te aonnaba? E na kauntaba  ngkanne anne ma anuan raoi te Atua. E kangai te Baibara ibukin te Atua: “Te kaetitaeka ae riai arona ni kabane. Te Atua ae kakaonimaki ngaia ae e aki kona n ribuaka, e raoiroi ao e eti.”—Te Tua-Kaua 32:4.

E katerea raoi te Baibara ana moani kantaninga te Atua ibukin te aonnaba n taeka aikai: “Ma karawa ngkanne, bon ana karawa Iehova, ma e angania natiia aomata te aonnaba.” (Taian Areru 115:16) Eng, e karika te aonnaba te Atua bwa mwengaia n aki toki aomata ae tamaroa, ao e kaonna ni baika ti kainnanoi bwa ti aonga ni kimwareirei ni maiu n aki toki.—Karikani Bwaai 2:8, 9.

“Ma karawa ngkanne, bon ana karawa Iehova, ma e angania natiia aomata te aonnaba.”—Taian Areru 115:16

E mataata naba n te Baibara ana kantaninga te Atua ibukia aomata. E tua nakoia te moan taanga bwa a na “kaona te aonnaba ao [n] taua arona, ao [n] taui aroia . . . maan ni kabane n te aonnaba.” (Karikani Bwaai 1:28) Ai kakabwaiaakira ngkai a na tararuaa ao ni karababaa mwengaia ae te Bwaretaiti ni kabutaa te aonnaba! Te bae mena imwaia Atam ma Ewa ao kanoaia, bon te maiu n aki toki n te aonnaba, ao tiaki i karawa.

E aera ngkanne ngkai ti mate? E kaotaki n te Baibara bwa iai ana anera te Atua are kinaaki imwina bwa te tia karitei ae Tatan te Riaboro, are kataia n urua ana babaire te Atua i Eten. N te aro raa?

E anai nanoia ara moani karo ake Atam ma Ewa Tatan bwa a na raonna ni karitei nakon te Atua. Ngke e bukibuki Tatan bwa te Atua e taua te bae raoiroi mairouia, ae te kona ni bairea ae eti ao ae kairua ibukia, ao a a irana naba Tatan ao ni kaitaraa te Atua. Tera mwina? Imwina riki ao a a mate n aron are e a kamani kauringia iai te Atua. A kabuaa te kantaninga ae te maiu n aki toki n te Bwaretaiti n te aonnaba.—Karikani Bwaai 2:17; 3:1-6; 5:5.

A a rotaki aomata n uaa ngkai man aia karitei Atam ma Ewa. E kangai Ana Taeka te Atua: “Aron rokon te bure irouia kaain te aonnaba mairoun te mwaane ae tii temanna [ae Atam] ao rokon te mate n te bure, ao e a ituia aomata ni kabane te mate.” (I-Rom 5:12) Ti mate ibukina bwa ti rotaki n te bure ao te mate mairouia ara moani karo, ao tiaki ibukina bwa e a kamani baireaki ke tao bon ana ‘babaire’ ae raba te Atua.

Ma e aki tukaki ana moani babaire te Atua ibukia aomata ao te aonnaba n te karitei are i Eten. E kairaki te Atua n ana tangira ae kororaoi ao n ana kaetitaeka ae riai bwa e na karekea angara ni kainaomataaki man tautoronakira n te bure ao n te mate. E kabwarabwaraa ni kangai te abotoro Bauro: “Boon te bure te mate, ma te bwaintituaraoi ae e anga te Atua, bon te maiu are aki toki rinanoni Kristo Iesu ae ara Uea.” (I-Rom 6:23) E tatangira te Atua n “anga Natina ae te rikitemanna [ae Iesu Kristo], bwa e aonga n aki kamaunaaki ane e onimakinna, ma e na reke irouna te maiu are aki toki.” (Ioane 3:16) Ngke e anga maiuna Iesu bwa te karea ni kaboomwi, e a kaoki iai bwaai nako ake e kabuai Atam. *

E nang kakororaoa ana berita te Atua ibukin te aonnaba ae te bwaretaiti. E kona n reke iroum te kakabwaia ae nang roko aei ngkana ko mutiakina ana kaungaunga Iesu ae kangai: “Riin n te mataroa ae wariki, bwa e raababa te mataroa ma ni mwawaawa te kawai ae tiki nakon te kamaunanakoaki, ao a mwaiti aika rin iai. Ma e wariki te mataroa ao e reme te kawai ae tiki nakon te maiu, ao a karako akana kunea.” (Mataio 7:13, 14) Eng, e boto kabwaiam nakon taai aika a na roko, man am rinerine. Tera ae ko na karaoia?