NAGSAYAAT DAYTA A NAMNAMA! Inkari ti Namarsua nga ikkannatayo iti biag nga agnanayon ditoy daga. Ngem adu ti saan a mamati iti dayta. ‘Matay amin a tao,’ kunada. ‘Paset dayta ti biag ti tao.’ Patien met ti dadduma a posible ti biag nga agnanayon, ngem saan a ditoy daga. Kunada a mapasamak dayta no mataykan ken mapankan idiay langit. Ania ti makunam?

Sakbay a sumungbatka, panunotem ti sungbat ti Biblia kadagitoy a tallo a saludsod: Ania ti ipakita ti pannakaparsua ti tao maipapan iti kapaut ti biagna? Ania ti orihinal a panggep ti Dios iti daga ken kadagiti tattao? Apay a matay ti tao?

Naidumduma ti tao iti amin a parsua ti Dios ditoy daga. Apay? Kuna ti Biblia a tao laeng ti naparsua a ‘kaladladawan’ ken ‘kalanglanga’ ti Dios. (Genesis 1:26, 27) Ania ti kayat a sawen dayta? Addaan ti tao kadagiti kababalin ken kualidad ti Dios, kas iti ayat ken kinahustisia.

Naikkan met ti tao iti abilidad nga agpanunot ken agrason, mangilasin iti naimbag ken dakes, ken addaan iti tarigagay a mangam-ammo ken makigayyem iti Dios. Isu a maapresiartayo ti kinapintas ti uniberso ken dagiti nakaskasdaaw a parsua, kasta met ti art, musika, ken daniw. Kangrunaanna, tao laeng ti makapagdaydayaw iti Namarsua. Dagita ti nakaidumaan ti tao kadagiti dadduma a sibibiag a parsua ditoy daga.

Gapuna, panunotem: Inikkan ngata ti Dios dagiti tattao kadagiti kasta a kualidad, agraman ti abilidad a mangpatanor ken mangpasayaat kadagita, no agbiagda laeng iti sumagmamano a tawen? Ti agpayso, inted ti Dios dagitoy a kababalin ken abilidad tapno naragsaktayo nga agbiag ditoy daga iti agnanayon.

Kuna ti dadduma a saan a pinarsua ti Dios ti tao tapno agbiag nga agnanayon ditoy daga. Ibagada a ti daga ket temporario laeng a pagyanan ti tao, a pakasubokan no asino ti maikari a mapan idiay langit ken agbiag nga agnanayon a kadua ti Dios. Ngem no agpayso dayta, saan ngata a ti Dios ti agparang a makimbasol iti amin a kinadakes ditoy daga? Maikontra unay dayta iti personalidad ti Dios. Kuna ti Biblia maipapan kenkuana: “Ta kinahustisia ti amin a dalanna. Matalek a Dios a nalinteg  ti amin nga aramidna; nalinteg ken naimbag.”​—Deuteronomio 32:4.

Kastoy ti ibaga ti Biblia maipapan iti panggep ti Dios iti daga: “Kukua ni Jehova ti langit, ngem intedna ti daga kadagiti tattao.” (Salmo 115:16) Wen, pinarsua ti Dios ti daga nga agbalin a napintas ken permanente a pagyanan ti tao ken pinunnona dayta kadagiti kasapulantayo tapno naragsaktayo nga agbiag nga agnanayon.​—Genesis 2:8, 9.

“Kukua ni Jehova ti langit, ngem intedna ti daga kadagiti tattao.”​—Salmo 115:16

Nalawag met ti kuna ti Biblia maipapan iti panggep ti Dios para iti tao. Imbilin ti Dios iti umuna nga agassawa: “Punnuenyo ti daga ken kultibarenyo, ket iturayanyo dagiti . . . sibibiag nga animal iti daga.” (Genesis 1:28) Pribilehioda nga aywanan ken palawaen ti Paraiso iti intero a daga! Ipakita dayta a ditoy daga ti nairanta a pagbiagan iti agnanayon da Adan ken Eva ken dagiti annakda, saan nga idiay langit.

Apay ngarud a mataytayo? Ipakita ti Biblia a maysa kadagiti espiritu nga annak ti Dios, a naawagan idi agangay kas ti rebelde a ni Satanas a Diablo, ti nangdadael iti urnos ti Dios idiay Eden. Kasano?

Sinulisog ni Satanas ti immuna a nagannaktayo a da Adan ken Eva nga agrebelde met iti Dios. Idi pinagparang ni Satanas nga adda nasayaat a banag nga ipapaidam ti Dios kadakuada​—ti kalintegan a mangikeddeng no ania ti naimbag ken dakes​—dimmasigda ken Satanas ket nagrebeldeda iti Dios. Ania ti resultana? Natayda kas imbaga idi ti Dios. Napukawda ti namnamada a biag nga agnanayon iti Paraiso a daga.​—Genesis 2:17; 3:1-6; 5:5.

Naapektaran ti amin a tao iti panagrebelde da Adan ken Eva. Kuna ti Sao ti Dios: “Babaen ti maysa a tao [ni Adan], simrek ti basol iti lubong ken ti ipapatay babaen ti basol, isu a matay ti amin a tao.” (Roma 5:12) Mataytayo ta natawidtayo ti basol ken ipapatay iti immuna a nagannaktayo, saan a gapu ta nasaksakbay nga inkeddeng wenno ‘implano’ ti Dios dayta.

Saan a nalapdan ti panagrebelde idiay Eden ti orihinal a panggep ti Dios para kadagiti tattao ken iti daga. Gapu iti ayat ken kinahustisia ti Dios, nangaramid iti pamay-an tapno mawayawayaantayo iti natawidtayo a basol ken ipapatay. Inlawlawag ni apostol Pablo: “Ta ti bayad ti basol ket ipapatay, ngem ti sagut ti Dios ket biag nga agnanayon babaen ken Kristo Jesus nga Apotayo.” (Roma 6:23) Gapu iti ayat ti Dios, “intedna ti bugbugtong nga Anakna [ni Jesu-Kristo], tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Babaen ti situtulok a panangidaton ni Jesus iti bagina kas subbot, insublina ti amin a napukaw gapu ken Adan. a

Asidegen a matungpal ti inkari ti Dios a paraiso a daga. Masagrapmo dayta a nagsayaat a namnama no tungpalem ti balakad ni Jesus: “Sumrekkayo iti akikid a ruangan, gapu ta ti akaba a ruangan ken nalawa a dalan ket agturong iti pannakadadael, ket adu ti sumrek iti dayta; idinto ta ti akikid a ruangan ken nailet a dalan ket agturong iti biag, ket manmano ti makasarak iti dayta.” (Mateo 7:13, 14) Wen, nakadepende kenka ti masakbayam. Ania ti aramidem?