NDITEKEMENA DIMPE DIA DIKEMA! Mufuki wetu mmulaye bua kutupesha muoyo wa tshiendelele, kadi anu pa buloba apa. Kadi bantu ba bungi kabena bitaba bualu ebu to. Badi bamba ne: ‘Muntu yonso udi ne bua kufua dimue dîba. Ke mudibi bilongolola nanku: muntu udi uledibua, pashishe ulua kufua.’ Bua bakuabu, muntu udi mua kuikala ne muoyo wa tshiendelele, kadi ki mpa buloba apa to. Badi bamba ne: muntu udi upeta muoyo wa tshiendelele anu padiye ufua ne uya mu diulu. Wewe udi wela meji kayi?

Bua kuandamuna lukonko elu, anji tangila mudi Bible wandamuna nkonko isatu eyi: Mushindu udibu benze muntu udi uleja ne: uvua ne bua kushala ne muoyo mutantshi bule kayi? Ntshinyi tshivua Nzambi mulongoluele buloba ne bantu ku ntuadijilu? Mmunyi muvua lufu lubuele mu bantu?

Mu bintu bionso bidi ne muoyo bidi Nzambi mufuke pa buloba, bantu bobu badi mushindu wa pa buawu menemene. Munyi? Bible udi uleja ne: anu bantu ke bavua Nzambi mufuke “mu tshimfuanyi” tshiende, ‘bafuanangane nende.’ (Genese 1:26, 27) Bidi biumvuija ne: bantu mbafukibue ne bikadilu ne ngikadilu bifuanangane ne bia Nzambi, bu mudi dinanga ne buakane.

Bantu bavua bafukibue kabidi ne bukokeshi bua kuela meji ne bua kumanya tshidi tshimpe ne tshidi tshibi, kabidi ne dijinga dia kumanya Nzambi ne kudia nende malanda. Ke bualu kayi tudi mua kuanyisha bunene bua diulu ne bionso bidimu ne buimpe bua bifukibua, kuanyisha kabidi bintu bimpe bidi bansenda benza, mijiki, ne tusala. Bualu bua mushinga kupita onso, bantu badi ne bukokeshi bua pa buabu bua kutendelela Mufuki wabu. Malu onso aa adi enza bua bantu bashilangane bikole menemene ne bifukibua bionso bidi ne muoyo pa buloba.

Nunku diebeja ne: Nzambi uvuaku mua kupesha bantu ngikadilu ya pa buayi eyi ne bukole budi bumueneka budi kabuyi ne mikalu bua kuyilubuluja ne kuyikolesha, bikalaye uvua musue bua tushale ne muoyo anu bua bidimu bikese anyi? Bulelela budi ne: Nzambi uvua mupeshe bantu ngikadilu ne bukokeshi bia pa buabi ebi bua tuikale ne muoyo pa buloba bua kashidi ne tuikale ne disanka.

Kadi bua bakuabu, Nzambi kavua musue bua bantu basombe pa buloba bua kashidi to. Badi bamba ne: buloba buvua buenza bua kuikala muaba uvua bantu mua kusomba bua tshipolo tshîpi, muaba uvuabu babatetela bua kumanya bavua bakumbane bua kuya mu  diulu bua kusomba ne Nzambi kashidi. Kadi biobi nanku, kabienaku mua kumueneka bu ne: Nzambi ke udi ukebesha malu mabi onso adi mavulangane lelu pa buloba anyi? Dîba adi si bidi bibengangana ne bumuntu buine bua Nzambi. Bible udi wamba bua bualu buende ne: “Bualu njila yende yonso mmiakane. Nzambi wa lulamatu utu kayi wenza bibi; yeye udi muakane ne mululame.”​—Dutelonome 32:4.

Bible udi uleja patoke tshivua Nzambi mulongoluele buloba ku ntuadijilu mu mêyi aa: “Diulu diodi ndia Yehowa, kadi buloba mmubupeshe bana ba bantu.” (Misambu 115:16) Bushuwa, Nzambi wakafuka buloba bua kuikalabu muaba muimpe udi bantu mua kusomba kashidi, ne wakabuwuja ne bintu bionso bitudi nabi dijinga bua kuikala ne nsombelu wa nsongo kashidi.​—Genese 2:8, 9.

“Diulu diodi ndia Yehowa, kadi buloba mmubupeshe bana ba bantu.”​—Misambu 115:16

Bible udi uleja kabidi patoke tshidi Nzambi mulongoluele bantu. Uvua mupeshe mulume ne mukaji ba kumpala mudimu wa ‘kuwuja buloba tente, kubukokesha, ne kukokesha bifukibua bionso bidi ne muoyo bidi bienda pa buloba.’ (Genese 1:28) Bavua ne diakalenga dia dikema dia kulama mparadizu uvuabu basombele ne kumualabaja pa buloba bujima! Bulelela, Adama ne Eva ne bana bavuabu ne bua kulela bavua batekemene bua kushala ne muoyo wa tshiendelele pa buloba, kadi kabavua batekemene difutu kampanda mu diulu to.

Kadi bua tshinyi tudi tufua? Bible udi uleja ne: umue wa ku banjelu ba Nzambi, wakaluabu kubikila ne: Satana Diabolo, wakamutombokela, kujingaye bua kupangisha tshivua Nzambi mulongolole mu Edene. Mushindu kayi?

Satana wakasaka bankambua betu, Adama ne Eva, bua kumulondabu mu buntomboji buende. Pavua Satana muambe ne: Nzambi uvua mubasokoke tshintu kampanda tshimpe, mmumue ne: bukenji bua kudijinguluila bobu nkayabu tshidi tshimpe ne tshidi tshibi, bakalonda tshivua Satana mubambile, kutombokelabu Nzambi. Ntshinyi tshiakabafikila? Ndekelu wa bionso bakafua anu muvua Nzambi mubadimuije. Bakajimija ditekemena divuabu nadi dia kushala ne muoyo kashidi mu mparadizu pa buloba.​—Genese 2:17; 3:1-6; 5:5.

Buntomboji bua Adama ne Eva mbulenge bantu bonso too ne lelu. Dîyi dia Nzambi didi diamba ne: ‘Mpekatu wakabuela mu ba pa buloba kupitshila kudi muntu umue [Adama], ne lufu luakabuela bua mpekatu, ne mushindu eu lufu luakatampakana kudi bantu bonso.’ (Lomo 5:12) Tudi tufua bualu tudi bapiane mpekatu ne lufu bia kudi bankambua betu ba kumpala, ki mbua bualu kampanda budianjila kutufundila kudi Nzambi budi butupitshila mutu to.

Buntomboji bua mu Edene kabuvua bupangishe tshivua Nzambi mulongoluele bantu ne buloba ku ntuadijilu to. Dinanga dia Nzambi dipuangane ne buakane buende biakamusaka bua kulongolola mushindu wa kutupikula ku mpekatu utuvua bapiane ne ku lufu. Mupostolo Paulo wakumvuija ne: “Difutu dia mpekatu ndufu, kadi dipa didi Nzambi ufila mmuoyo wa tshiendelele ku butuangaji bua Kristo Yezu Mukalenge wetu.” (Lomo 6:23) Ne dinanga dionso, Nzambi ‘wakafila Muanende mulela umuepele, bua muntu yonso udi uleja ditabuja kudiye kabutudibu, kadi apete muoyo wa tshiendelele.’ (Yone 3:16) Pavua Yezu mudifile ku budisuile bu mulambu wa kupikulangana nawu, wakapikula bionso bivua Adama mujimije. *

Mu katupa kîpi emu, mulayi wa Nzambi wa kuvuija buloba mparadizu newukumbane. Udi mua kusomba pa buloba bukudimuna mparadizu ebu anu wewe mutumikile didimuija dia Yezu edi ne muoyo mujima: “Buelelayi ku tshiibi tshikese, bualu tshiibi tshidi tshinene ne njila udi mualabale udi ufikisha ku kabutu, bantu ba bungi badi babuelelaku; kadi tshiibi tshidi tshikese ne njila udi mubumbakane udi ufikisha ku muoyo, bantu bakese badi bamupeta.” (Matayi 7:13, 14) Bushuwa, matuku ebe atshilualua adi mu bianza biebe. Newenze tshinyi?