VYUMA VYAMWAZA TWATALILILA: Tengi yetu atushika kuyoya haya myaka yosena hano hamavu. Oloze vatu vamwe vachiwana kupwa chachikalu kwitavila vyuma kana. Kaha veji kwambanga ngwavo: ‘Vatu kaveshi kuhasa kuyoya chakuhona kufwako mwomwo kuyoya nakufwa chatambukila hamwe.’ Veka nawa veji kwambanga ngwavo tunahase kuyoya haya myaka yosena olozenyi keshi hano hamavuko. Kaha nawa ngwavo kuyoya chahaya myaka yosena chapwa kuvanga kaha nge mutu nafu nakuya mwilu. Enu mwashinganyeka ngachilihi?

Shimbu kanda mukumbulule, vangilenu kutala omu Mbimbiliya yakumbulula vihula vino vitatu. Uno kuliko unjiho umwe wasolola nge mutu vamutengele mangana ayoyenga lika tahi? Vyuma muka ajinyine Kalunga hakutenga mavu navatu? Uno kufwa chejile ngachilihi kuvatu?

Havyuma vyosena vyakuyoya vize atenga Kalunga hano hamavu, vatu vakiko kaha atenga mujila yakulipwila. Mujila muka? Mbimbiliya yahanjika ngwayo vatu vakiko kaha vatenga “muchifwanyisa” chaKalunga, ‘vakulifwana’ naikiye. (Kuputuka 1:26, 27) Uno mazu kana alumbununa ika? Alumbununa nge vatu veji kusololanga vilinga vimwe atwama navyo Kalunga vyakufwana nge zangi nachiyulo.

Kaha nawa, vatu vavatengele nauhashi wakushinganyeka kanawa mangana vatachikize vyuma vyamwaza nevi vyavipi nakupwa namuchima wakufwila kupwa nausoko wamwaza naKalunga. Shikaho tweji kusakwililanga Kalunga havyuma vyosena vize atenga, nakulivwisa kuwaha vyuma vyakufwana nge kufunjejeka, nakwimba myaso nakuhanjika tushimutwiji. Chikumanyi, vatu vavahana lisesa lyakulemesa Tengi yavo. Vilinga kanevi vikiko vyalingisa vatu kupwa vakulipwila chikuma kuhambakana vyuma vyeka vyakuyoya hano hamavu.

Achishinganyekenu, uno Kalunga atengele vatu nakuvahana vilinga vyakulipwila vyosenevi tunavuluka mangana vayoye myaka yayindende tahi? Kalunga ahanyine vatu vilinga vyakulipwila mangana valivwise kuwaha kuyoyela hano vene hamavu haya myaka yosena.

Vatu vamwe vamba ngwavo, Kalunga katengele mavu ngwenyi vatu vatwamengaho haya myaka yosenako, oloze apwa chihela chakwesekelaho vatu vaze navatamo kuvasakula mangana vakaye mwilu nakutwama naKalunga. Nge mazu kana amuchano, kaha kacheshi kulumbununa nge Kalunga ikiye anakuneha vyuma vyavipi nakuyanda chosena hano hamavu nyi? Kushinganyeka kana, chalimbalaka nomu  ajina Kalunga. Mbimbiliya yahanjika hali ikiye ngwayo: “Jijila jenyi josena jakwoloka. Apwa Kalunga wakushishika uze keshi kuhengesa chiyuloko. Apwa wakwoloka, wakusungama.”—Lushimbi lwamuchivali 32:4.

Mbimbiliya yahanjika hatoma kujina chaKalunga kutalisa kumavu ngwayo: “Melu apwa aYehova, oloze mavu awahana kuli vana vavatu.” (Samu 115:16) Chikupu vene, Kalunga atengele ano mavu kupwa limbo lyetu lyamwaza, nakuhakaho vyuma vyosena vize vyasakiwa mangana tulivwise kuwaha kuyoya haya myaka yosena.—Kuputuka 2:8, 9.

“Melu apwa aYehova, Oloze mavu awahana kuli vana vavatu.”—Samu 115:16

Mbimbiliya nawa yalumbununa hatoma kujina chaKalunga kutalisa kuvatu. Kalunga alwezele valunga napwevo vakulivanga ngwenyi: ‘Vazalise hamavu, nakuwalamanga, kaha vapwenga nawata . . . havyuma vyakuyoya vyosena vyakutambuka hamavu.’ (Kuputuka 1:28) Ocho kutokwa kana vapwile nacho chakulama nakulingisa mavu osena kupwa palachise! Chikupu vene vaAlama naEve vapwile nakutalilila kuyoya haya myaka yosena hano mavu hamwe kaha navana vavo keshi mwiluko.

Jino tweji kufwilanga ika? Mbimbiliya yasolola nge kwapwile mwanaKalunga umwe wakushipilitu uze alikangile, kaha vamuvuluka jino ngwavo Satana Liyavolo, ikiye aputukile kuluwanganyisa vyuma vize alongesele Kalunga kutalisa kumilemba yaEtene. Mujila muka?

Satana akunywile visemi jetu vatete, vaAlama naEve mangana navakiko valikange kuli Kalunga. Omu Satana ahanjikile kuli vakiko ngwenyi Kalunga apwile nakuvaswekela vyuma vyamwaza, chasoloka nge apwile nakwamba ngwenyi Kalunga kavahanyine lisesa lyakutachikiza vyuma vyamwaza nevi vyavipiko. Ngocho vakundwijile makuli aSatana nakulikanga kuli Kalunga. Vyuma muka vyafuminemo? Kutwala muze, vafwile ngana muze avahuhumwine Kalunga. Kaha vajimbalishile kuyoya chavo chamuPalachise hano hamavu.—Kuputuka 2:17; 3:1-6; 5:5.

Kulikanga chaAlama naEve chakwata nahakuyoya chavatu vosena makumbi ano. Mazu aKalunga amba ngwawo: “Shili yengilile mukaye kuhichila muli mutu umwe [Alama] nakufwa nawa kuhichila mushili, ngocho kufwa chatanda kuli vatu vosena.” (Wavaka-Loma 5:12) Tweji kufwanga mwomwo twaswana shili kufuma kuli visemi jetu vatete vaAlama naEve, keshi nge Kalunga ikiye ajinyine ngwenyi tufwengangako.

Kulikanga chamuEtene kachahonesele vyuma ajinyine Kalunga kutalisa kuli vatu namavuko. Zangi nachiyulo chaKalunga chakwoloka vyamulingishile awane jila yakutusokwelamo kufuma kushili nakukufwa. Kaha kaposetolo Paulu alumbunwine ngwenyi: “Fweto yashili kufwa, oloze wana uze Kalunga eji kuhananga ukiko vene kuyoya chahaya myaka yosena kuhichila muli Kulishitu Yesu Mwata wetu.” (Wavaka-Loma 6:23) Kalunga wazangi “ahanyine Mwanenyi umwe kaha wakulipwila [Yesu Kulishitu], mangana ngwenyi weshowo mwamufwelela vakahone kumunongesa, oloze akapwe nakuyoya chahaya myaka yosena.” (Yowano 3:16) Yesu asokwele vyuma vyosena vize Alama engishile muundungo hakuhana kuyoya chenyi kupwa wana wandando yakusokola. *

Kalinwomu lushiko lwaKalunga lwakufwila kuneha palachise hano hamavu lutesemo. Munahase kukalivwisa kuwaha kuyoya kanechi chamwaza nge namukavangiza mazu aYesu akwamba ngwenyi: “Ingililenu kuchikolo chachindende, mwomwo chikolo chachinene najila yakuhweka vili nakutwala kukunonga, kaha vaze vali nakuyamo vanapu vavavulu. Oloze chikolo chachindende najila yakupalakanya vili nakutwala kukuyoya, kaha ava vali nakuyiwana vanapu vavandende kaha.” (Mateu 7:13, 14) Chikupu vene, kuyoya chenu chakulutwe chapendamina havyuma namusakula kulinga oholyapwa. Vyuma muka muli nakufwila kulinga?