LULAVELELO LUA CILI NI VATI? Sakatanga Uetu na likuminia ku mi hana muono ua ya ya-ye, hano ha mavu. Vunoni, vavengi ce ku va kaluuila ku ivuisisa. Ve ku handeka nguavo ‘Tu vose tangua tu-tsa.’ Nguavo ‘ku semuka na ku-tsa ca kala ha vantu.’ Vamo ve ku singanieka nguavo citava ku yoya miaka yose, vunoni kati ha mavu. Nguavo muntu ue ku tambula lika muono ua ya ya-ye mu nima ya ku-tsa na ku ya muilu. Amba yeni co?

Ntsimbu kanda mu handeke viose-ovio, aci talenu vikumbululo via Mbimbiliya ku vihula vino vitatu: Vuno cifua ci va tangelamo muvila ua muntu ce ku muesa nga miaka ingahi na pande ku yoya ni? Vutumbe vuka Njambi ua tangelele mavu na vantu? Vati ku-tsa ca heta ku vantu vose ha mavu?

Ha viuma viose via tangele Njambi ha mavu, vantu va lifuila cikuma-kuma. Vati omuo? Mbimbiliya ya muesa ngecize vantu lika va va tangele “mu ciseteko na cifua” ca Njambi. (Njenisisi 1:26, 27) Vika ca lomboloka? Eci ca lomboloka ngecize vantu va kala na vifua vie ku solola vifua via Njambi, ngeci mua cilemo na ku muesa vuoloke.

Etu vantu tua kala na vuhasi vua ku singanieka na ku hilula. Vunoni kati ovio lika, tue ku tepesa via cili ku via vipi kaha tua kala na cizango ca ku pua kavusamba ka Njambi. Ngeci tue ku komoka viuma via ku tanga kaha tua lema ku panga viuma, ku imba na ku muesa vutongue. Ku vueza kuli evi viose, vantu lika va tonda ku lemesa Sakatanga uavo. Evi vifua viaco, via tepesa cikuma vantu ku nkala cuma ca kala ha mavu.

Aci singaniekenu: Vuno nga Njambi ue ku tangele vantu na vifua via cili na vuhasi vua ku komouesa linga va vi pangese mu miaka ingahi lika ni? Vusunga ni ovu, Njambi ua tu tangele na vifua na vuhasi vua ku lifuila cikuma linga tu yoye muono ua ku tovala hano ha mavu.

Vamo ve ku handeka nguavo, Njambi ka tu tangelele ku yoya miaka yose hano ha mavu. Kuli vakevo nguavo, etu vantu hano ha mavu tua pua lika tu vangendzi, ha ku muena lika veya va na fuila ku ka yoyela muilu hamo na Njambi miaka yose. Kaha aci singaniekenu, evi vihandeka viaco nga via puile vusunga. Vuno kati ku vangeya Njambi ngue ikeye ue ku koka tuyando tuose tua sula ha mavu ni?  Mua vusunga vene. Muomu ci ka pua ku hilika Njambi na vifua vieni. Mbimbiliya ya handeka via Njambi nguayo: ‘Vinjila vieni viose vikevio vuoloke, Njambi mukua vucili kaha kesi na vupi, mukua vuoloke na mukua ku viuka ikeye.’—Ndeutelonomi 32:4.

Mbimbiliya ya muesa vuino vutumbe vuka Njambi ua tangelele mavu na mezi aa: “Melu akeo melu a Yehova; Vunoni mavu na a hie kuli vana va vantu.” (Visamo 115:16) Cili, Njambi ua tangele mavu a pue limbo lia ku vuaha lia vantu, ngeci ua sulisile na viose vi tua tonda linga tu yoye muono ua ku tovala miaka yose.—Njenisisi 2:8, 9.

“Melu akeo melu a Yehova; Vunoni mavu na a hie kuli vana va vantu.”​—Visamo 115:16

Mbimbiliya ya muesa naua vutumbe vua tangelele Njambi vantu. Ua sikile va yala na mpuevo va katete ngueni “sulisenu mavu naua, na ku a ononuesa; kaha sikenu . . . viuma viose via muono vienda hano ha mavu.” (Njenisisi 1:28) Ca puile ku vezika kuli vakevo ku niunga na ku hamesa cize citungu ci hete mua lenga mavu! Mua vusunga, Andama na Eva na vana va ve ku semene va lavelele ku yoya miaka yose ha mavu, kati muilu houe.

Kaha vika honi tue ku tsila? Mbimbiliya ya muesa ngecize, kua kala umo kangelo uva tumbula ku pua Satana Ndiavu ua tengulukilile Njambi, ua tondele ku tangula vutumbe vua Njambi mu citungu ca Endene. Mu njila ika?

Satana ua lingisile visemi vetu va katete va Andama na Eva ku lipandakana kuli ikeye mu ku alulukila Njambi. Omo Satana ua vangeyele Njambi ngueni ua kele na ku va vingilika viuma via cili—va Andama na Eva va pande ku litumbikila masiko a via cili na via vipi—va mu tavele na ku alulukila Njambi. Vika viezilemo? Mu nima ya miaka, va tsile ngue muze mua va nanguile Njambi. Va zimbalesele vuana vua ku yoya miaka yose ha mavu.—Njenisisi 2:17; 3:1-6; 5:5.

Lisino lia va Andama na Eva na lelo lino lia kuata ku vantu vose. Mbimbiliya nguayo: “Ngoco vene ngue hali yala umo lika, [Andama] vupi vua kovelele hano ha mavu, na ku-tsa ha vupi; kaha ngecize ku-tsa ci na hete ku vantu vose muomu va na lingi vupi:” (Loma 5:12) Tu vose tue ku-tsa muomu tua suana vupi, ku visemi vetu va ku livanga, kati ngue cimo ku imbilikiya ni cizango ca Njambi houe.

Lisino li va muesele va Andama na Eva mu citungu ka lia tanguile vutumbe vua Njambi ku vantu na mavu. Njambi mu cilemo ceni ca ku tantuluka na vuoloke, ua sokolola njila ya ku tu patula ku vupi na ku-tsa. Kapostolo Paulu ua lomboluelele ngueni: “Muomu fueto ya vupi, ku-tsa; vunoni vuana vua Njambi, muono ua miaka yose ua ya-ye muli Kilistu Yesu muangana uetu.” (Loma 6:23) Ku cilemo ceni, Njambi “ua hele Muaneni umo lika, linga uose a mu tsiliela kati a ka nonge, vunoni a kale na muono ka ue ku hua ua ya-ye.” (Yoano 3:16) Mu ku lihana ivene ku cizango ca vutuntu ku pua nkombelo, Yesu ua kulile ni ku hiluisa vivezikiso viose via zimbalesele Andama na Eva. a

Vuovuno Njambi a ka puisamo cikulaheso ceni ca ku puisa ano mavu citungu. Ou muono ua ku lutue ua ndzolela ua mi lavelela nenu. Taveni mezi a handekele Yesu ngueni: “Kovelenu mu mbelo ya indende, muomu mbelo ya kama na njila ya zandzavala ya ya ku ku-nonga, kaha va vengi va li na ku kovelamo. Muomu mbelo ya indende na njila ya lisuata, ya ya ku muono, kaha va vandende lika va i uana.” (Mateo 7:13, 14) Mua vusunga, mu hasa ku lihanguila muono uenu ua ku lutue. Vati mu lingamo?