E TAPUTOU MEITAKI TIKAI TEIA! Kua taputou mai Tei Anga e ka oronga mai aia i te ora mutu kore no tatou i runga nei i te enua. Inara e manganui te kare e irinaki ana i te reira. Karanga ratou e ‘Ko tetai tuanga rai ïa o te oraanga, ka mate tatou.’ Manako tetai pae e ka rauka te ora mutu kore, kare ra i runga nei i te enua. Akakite ratou e ka rauka te ora mutu kore i runga i te rangi me mate tatou. Eaa ra toou manako?

I mua ake ka pau ei koe i teia uianga, akara ana i te au pauanga mei roto i te Pipiria no teia au uianga e toru: Akapeea te tu i angaia ai te tangata te akaari mai anga eaa te roa o tona oraanga? Eaa te akakoroanga o te Atua no te enua e te tangata? Eaa te tangata i mate ei?

I roto i te au mea ta te Atua i anga i te enua nei, ko te tangata te mea tuke. Akapeea ra? Akakite mai te Pipiria e ko te tangata anake tei angaia mei to te Atua “tu” e ‘kia aite ki tona uaorai tu.’ (Genese 1:26, 27) Eaa te aiteanga o te reira? Kua angaia te tangata kia akatupu i te au tu o te Atua, mei te aroa e te tu tika.

Pera katoa, ka rauka i te tangata i te akamanako e te iki i ta ratou ka rave. Ka rauka katoa ia ratou te kite teiea te mea meitaki e te kino e kia anoano i tetai pirianga kia Iehova. No reira tatou i umere ei i te au mea tana i anga i te rangi e te enua, te au tutu peniia, te au imene e te au peʼe. Tei maata atu, kua angaia te tangata kia akamori i te Atua. Ko te tu teia i tuke ei te tangata mei te au manu.

Akamanako ana: Ka oronga ainei te Atua i teia au tu manea no te tangata, e kia rauka ia ratou i te akamaata atu i te reira, inara ka ora ratou no tetai nga mataiti ua? Ko te tika, kua oronga te Atua i teia au tu umere no te tangata kia mataora to tatou oraanga i te enua nei e tuatau ua atu.

Karanga tetai pae e kare te Atua i akakoro i te tangata kia noo i te enua nei e tuatau ua atu. Akakite ratou e kua maaniia te enua ei ngai timataanga, kia kiteia koai te aronga ka tau kia noo ki runga i te rangi e te Atua. Inara me e tika tera, kare ainei te reira i te akaapa anga e na te Atua i akatupu i te kino i runga nei i te enua? E tuke teia ki te au tu o te Atua. Karanga ra te Pipiria no runga  iaia e: “Ko tei tau katoa tona au aerenga; e Atua tuatua-mou, e te kino kore ra, e tuatua-tika tana, e te tiratiratu!”—Deuteronomi 32:4.

Te akakite maira te Pipiria i to te Atua akakoroanga no te enua na roto i teia au tuatua: “Te au rangi ra, na Iehova ïa au rangi; kareka te enua nei, kua oronga mai aia na te tamariki a te tangata nei.” (Salamo 115:16) Ae kua anga te Atua i te enua kia manea, kia nooia e te tangata e kua akaki aia ki te au mea katoatoa kia mataora tatou e tuatau ua atu.—Genese 2:8, 9.

“Te au rangi ra, na Iehova ïa au rangi; kareka te enua nei, kua oronga mai aia na te tamariki a te tangata nei.”—Salamo 115:16

Akakite katoa mai te Pipiria i to te Atua akakoroanga no te tangata. Akakite aia ki te nga tokorua mua e kia “akaki i te enua nei, e e akavi; e kia mana korua . . . ki rungao i te au mea ora katoa e totoro aere ua ki rungao i te enua nei.” (Genese 1:28) E tikaanga manea teia no raua kia akono e kia akariro i te ao katoa ei kainga Parataito! E mea papu e ka rauka ia Adamu e Eva e ta raua uanga, te ora mutu kore i te enua nei kare i runga i te rangi.

Eaa i reira tatou ka mate ei? Akakite ra te Pipiria no runga i tetai angera a te Atua tei akarongo kore, koia te Tiaporo ko Satani, tei meameaau i te akanoonooanga a te Atua i Edene. Eaa tana i rave?

Kua akavare a Satani i to tatou nga metua mua, ko Adamu e Eva, kia piri kiaia e kia patoi i te Atua. Akakite a Satani e te tāpu ra te Atua i tetai apinga meitaki mei ia raua—te tikaanga kia iki i te mea meitaki e te mea kino—kua akarongo raua kia Satani e kua kopae raua i te Atua. Eaa tei tupu? Kua mate raua mei ta te Atua i taputou. Kua ngere raua i te akameitakianga kia noo ki runga i te enua Parataito e tuatau ua atu.—Genese 2:17; 3:1-6; 5:5.

Kua riro te meameaau a Adamu e Eva i te takino i te oraanga o te tangata e tae mai ki teia rā. Karanga te Tuatua a te Atua e: “No te tangata okotai ra [ko Adamu] i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Mate tatou no te mea kua iri mai te ara e te mate a Adamu e Eva ki runga ia tatou, kare no te mea kua ‘akakoroia’ e te Atua kia tupu.

Kare te meameaau anga i Edene i akakore i te akakoroanga o te Atua no te tangata e te enua. Kua riro te tu aroa e te tu tika o te Atua ei akaora mai ia tatou mei te ara e te mate. Kua akamārama te apotetoro ko Paulo e: “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.” (Roma 6:23) No Tona aroa kua oronga mai te Atua “i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Kua oronga puareinga ua a Iesu i tona oraanga ei oko, e kua rauka akaou mai te au mea ta Adamu i kopae. a

Kare e roa atu, ka tupu te taputou a te Atua no runga i tetai enua parataito. Ka rauka te ora mutu kore me akorongo meitaki tatou kia Iesu: ‘E tomo kotou na te ngutupa o iti; te atea maata nei te ngutupa, e te pararauare nei te ara, e tae atu ei ki te mate; e manganui te na reira i te tomo. Te kokota ua nei te ngutupa, e te piri oki o te ara, e tae atu ei ki te ora, e tokoia ua ake tei kite atu i te reira.’ (Mataio 7:13, 14) Ae, toou ora tei runga i taau ka iki. Eaa i reira taau ka rave?