INEYI NDI PIKIRO YADIDI KAKAMWE! Nciti wathu apikira kuti anatipasa umaso wakukhonda mala pano pa dziko yapantsi. Mbwenye anthu azinji nee asatawira kuti pyenepi pinadzacitikadi. Iwo asalonga kuti ‘anthu onsene anadzafa.’ Pontho anango asalonga kuti ‘umaso ndi tenepo.’ Anangombo asatawira kuti mphyakukwanisika anthu kukhala m’maso kwenda na kwenda, mbwenye tayu pano pa dziko yapantsi, iwo asalonga kuti munthu anakhala na umaso wakukhonda mala basi ene angafa mbaenda kudzulu. Imwembo ndi api maonero anu?

Mbamudzati kutawira mbvundzo unoyu, tendeni tione kuti Bhibhlya isalonganji thangwi ya mibvundzo iyi mitatu: Kodi njira idacitwa anthu isapangiza kuti iwo acitwa toera akhale m’maso mu pyaka pingasi? Mulungu pakutoma akhafunanji kuna anthu na dziko yapantsi? Thangwi yanji tisafa?

Anthu acitwa mwakusiyana kakamwe na pinthu pyonsene pidacita Mulungu pa dziko yapantsi. Munjira ipi? Bhibhlya isapangiza kuti ndi anthu basi adacitwa ‘mwakulandana’ na Mulungu peno ‘ninga iye.’ (Genesi 1:26, 27) Pyenepi pisabvekanji? Pyenepi pisabveka kuti anthu ali na makhaliro akulandana na a Mulungu ninga ufuni na ulungami.

Kusiyapo pyenepi, anthu acitwa na luso yakudzindikira pinthu pyadidi na pyakuipa. Pontho tacitwa na luso yakufuna kudziwa Mulungu na kuntumikira. Na thangwi ineyi, ife tisadzumatirwa na kukula kwa dziko, kubalika kwa pinthu pidacita Mulungu, kuphatanizambo kubalika kwa pinthu pidacitwa na anthu, nyimbo na mapoezia. Anthu ndiwo basi anakwanisa kulambira Mulungu ule adacita pinthu pyonsene. Pyenepi ndipyo pinapangiza kuti anthu ndi akusiyana kakamwe na pinthu pyonsene pidacita Mulungu pa dziko yapantsi.

Nyerezerani basi: Mbidakhala kuti Yahova aticita toera tikhale m’maso mu pyaka pingasi basi, kodi iye mbadaticita na luso ineyi yakupangiza makhaliro anewa na kuakulisa? Undimomwene ndi wakuti Yahova atipasa makhaliro na maluso anewa toera titsandzaye na umaso pa dziko yapantsi kwenda na kwenda.

Anango asalonga kuti Mulungu cipo afuna kuti anthu akhale m’maso kwenda na kwenda pa dziko yapantsi. Iwo asalonga kuti anthu ndi alendo pa dziko yapantsi peno kuti Mulungu asaayesera toera kuona khala athema peno nkhabe kuenda kudzulu kakhala na iye kwenda na kwenda. Khala pyenepi ndi undimomwene nee musaona kuti Mulungu mbadakhala  na mulando thangwi ya uipi na nyatwa zidadzala pa dziko yapantsi? Pyenepi nee pisabverana na makhaliro ace. Thangwi Bhibhlya isalonga tenepa thangwi ya iye: “Mulungu wakukhulupirika, wakuti cipo asacita pinthu pyakukhonda kulungama; iye ndi wadidi na wakulungama.”—Dheuteronomyo 32:4.

Bhibhlya isapangiza pakweca kuti thangwi yanji Mulungu acita dziko yapantsi. Iyo isalonga: “Kudzulu ndi kwa Yahova, mbwenye dziko yapantsi iye aipereka kuna ana a anthu.” (Masalmo 115:16) Mulungu acita dziko yapantsi toera ikhale mudzi wathu wakubalika kwenda na kwenda. Iyo iri na pyonsene pinafuna ife toera tikhale na umaso wadidi na wakukhonda mala.—Genesi 2:8, 9.

“Kudzulu ndi kwa Yahova, mbwenye dziko yapantsi iye aipereka kuna ana a anthu.”—Masalmo 115:16

Bhibhlya isapangizambo pakweca kuti thangwi yanji Mulungu acita anthu. Iye apanga banja yakutoma kuti “dzadzani dziko yapantsi mbamuitsalakana; tsalakanani . . . pinyama pyonsene piri na umaso pa dziko yapantsi.” (Genesi 1:28) Onani basi, iwo mbadakhala akutsandzaya kakamwe thangwi yakutsalakana dziko yapantsi mbacitisa dziko yonsene kukhala Paraizu! Natenepa Mulungu akhafuna kuti Adhamu na Eva pabodzi na anawo akhale kwenda na kwenda pa dziko yapantsi tayu kudzulu.

Mphapo thangwi yanji anthu asafa? Bhibhlya isalonga kuti anju m’bodzi wakukhonda bvera wakuti mukupita kwa ndzidzi adzadziwika na dzina ya Sathani Dyabo ayesera kugudjula pinthu pidacita Mulungu m’munda wa Edheni. Iye acita tani pyenepi?

Sathani anyengerera anyakubala athu akutoma Adhamu na Eva toera akhale kukhundu yace mbasandukira Mulungu. Sathani apanga Adhamu na Eva kuti Mulungu akhaabisira pinthu pyadidi pyakuti ndi ufulu wakusankhula okhene pinthu pyadidi na pyakuipa. Natenepa, iwo asankhula kukhala kukhundu ya Sathani mbapasira nkhodolo Mulungu. Mphapo ninji pidacitika? Mukupita kwa ndzidzi iwo afa mwakubverana na pidaapanga Mulungu. Iwo aluza nkhombo yakukhala na umaso wakwenda na kwenda Mparaizu pa dziko yapantsi.—Genesi 2:17; 3:1-6; 5:5.

Kukhonda bvera kwa Adhamu na Eva kusabweresa nyatwa kuna anthu onsene. Bhibhlya isalonga: “Ninga mudapita madawo pantsi pano thangwi ya munthu m’bodzi basi, mbakupitambo kufa thangwi ya madawo, natenepa kufa kwamwazika kwa anthu onsene thangwi anthu onsene adawa.” (Aroma 5:12) Mulungu “nee akhafuna” kuti anthu akhale na madawo mbafa. Adacitisa kuti anthu akhale na madawo mbatoma kufa ndi anyakubala athu akutoma.

Kukhonda bvera kwa Adhamu na Eva nee kwacinja cifuno ca Mulungu kuna anthu na dziko yapantsi. Ufuni ukulu wa Mulungu na ulungami wace pyankulumiza toera kusaka njira yakutipulumusa ku madawo na kufa. Mpostolo Paulu alonga: “Thangwi madawo asatibweresera kufa, mbwenye Mulungu asatipasa muoni wa umaso wakukhonda mala kubulukira mwa Mbuyathu Yezu Kristu.” (Aroma 6:23) Thangwi ya ufuni, Mulungu ‘apereka mwanace m’bodzi ekha [Yezu Kristu] toera munthu anan’khulupira akhonde kufudzwa mbwenye agumane umaso wakukhonda mala.’ (Juwau 3:16) Mwakufuna kwace Yezu apereka umaso wace ninga ntsembe yaciomboli toera anthu akhale pontho na pyonsene pidaluza Adhamu. a

Thimize pano pidapikira Mulungu kuti anadzacinja dziko yapantsi mbidzakhala paraizu pinadzacitikadi. Imwe munadzakhala mparaizu pa dziko yapantsi mungabvera uphungu uyu wa Yezu: “Pitani na pansuwo ung’ono, thangwi nsuwo ukulu na nseu ukulu usatsogolera anthu toera kufudzwa, mbwenye ndi azinji anapita na nsuwo unoyu; m’mbuto mwace, nsuwo unatsogolera ku umaso ndi ung’ono, nseu wacembo ndi ung’ono, mbwenye ndi anthu akucepa anaugumana.” (Mateu 7:13, 14) Toera mukhale mparaizu pisanyindira cisankhulo cinacita imwe. Kodi imwe munacita cisankhulo cipi?