DATI NA WAN MOI HOWPU! Wi Mekiman pramisi fu gi wi têgo libi, leti dyaso na grontapu. Ma furu sma no man bribi a sani dati. ’Ala sma musu dede wan dei. Na so a libi de.’ Tra sma feni taki wi man libi fu têgo, ma a no dyaso na grontapu. Den e taki dati a wan-enkri fasi fa sma kan kisi têgo libi, na te den dede èn den go na hemel. San yu e denki?

Fosi yu piki na aksi dati, dan a bun fu luku fa Bijbel e piki den dri aksi disi: Te wi e luku a fasi fa libisma meki, dan o langa wi ben musu libi? San Gado ben abi na prakseri biginbigin gi grontapu èn gi libisma? Fa a du kon taki libisma e dede?

Fu ala den libisani di Gado meki na grontapu, libisma na den moro apartiwan. Fa so? Bijbel e sori taki libisma wawan meki fu „gersi” Gado èn fu „de leki” en (Genesis 1:26, 27). San dati wani taki? Disi wani taki dati libisma man sori den srefi fasi di Gado abi, soleki lobi nanga retidu.

Boiti dati, libisma man denki, den man sabi san bun èn san no bun, èn den abi na angri fu kon sabi Gado èn fu anbegi en. Dati meki wi kan sori warderi gi a bigi universum èn gi den moi sani di Gado meki. Wi kan warderi moi sani tu soleki skedrei, poku, nanga puwema. Boiti dati, libisma wawan man anbegi a Mekiman. Den fasi disi e meki taki libisma de heri tra fasi leki ala tra libisani na grontapu.

Sobun, aksi yusrefi: ’Efu Gado ben meki libisma fu libi fu wan syatu pisi ten nomo, dan a ben o meki wi nanga someni moi fasi? A ben o gi wi a koni fu du someni moi sani?’ Fu taki en leti, Gado gi libisma den koni nanga den fasi disi so taki wi kan nyan bun fu a libi fu têgo dyaso na grontapu.

Ma son sma e taki dati Gado noiti no ben wani taki libisma libi fu têgo na grontapu. Den e taki dati Gado poti wi na grontapu fu libi wan pisi ten nomo, so taki a man si suma warti fu libi fu têgo na hemel makandra nanga en. Ma efu dati ben de so, dan na Gado ben o de frantwortu gi ala ogridu na grontapu, a no so? A sani dati no kan kwetikweti, fu di Gado no de so. Bijbel e taki fu en: „Ala ten a e du san reti. A de wan Gado di de fu frutrow. A no e du kruktudu. A de wan reti-ati sma èn a abi wan krin ati.”​—Deuteronomium 32:4.

 Bijbel e sori krin san Gado ben abi na prakseri gi grontapu biginbigin. A e taki: „Hemel na fu Yehovah, ma grontapu a gi na libisma” (Psalm 115:16). Iya, Gado ben wani taki grontapu ben musu de wan moi presi pe libisma ben o man tan fu ala ten. Boiti dati, a poti ala sani na tapu di wi abi fanowdu fu man libi koloku fu têgo.​—Genesis 2:8, 9.

„Hemel na fu Yehovah, ma grontapu a gi na libisma.”​—Psalm 115:16

Bijbel e sori krin tu san Gado abi na prakseri gi libisma. A ben taigi a fosi trowpaar: „Meki pikin èn kon furu, teleki unu kon lai na grontapu èn basi . . . ibri meti di e kroipi na gron” (Genesis 1:28). Dati na wan moi grani di den ben abi fu meki a heri grontapu kon tron wan paradijs! A no de fu taki dati a howpu di Adam, Eva, nanga den bakapikin di den ben o kisi ben abi, no ben de fu libi na hemel, ma fu libi fu têgo na grontapu.

Ma fu san ede wi e dede? Bijbel e sori taki wan fu den engel fu Gado pruberi fu gens den sani di Gado ben seti na ini Eden. Bakaten a kon na krin taki na engel disi ben de Satan Didibri di ben opo ensrefi teige Gado. Fa a pruberi fu gens Gado?

Satan kori wi fosi papa nanga mama, Adam nanga Eva, fu opo densrefi teige Gado makandra nanga en. Satan taigi den taki Gado ben kibri wan sani gi den di ben o tyari wini kon gi den. A ben wani meki den bribi taki Gado no ben wani gi den a reti fu bosroiti gi densrefi san bun èn san no bun. Adam nanga Eva bosroiti fu teki a sei fu Satan èn den drai baka gi Gado. San ben de a bakapisi? Baka wan pisi ten den dede, soleki fa Gado ben warskow den. Den lasi a howpu di den ben abi fu libi fu têgo na ini wan paradijs na grontapu.​—Genesis 2:17; 3:1-6; 5:5.

Te na a dei fu tide a bosroiti di Adam nanga Eva teki abi krakti tapu ala libisma. Gado Wortu e taki: „Wán man [Adam] meki sondu kon na grontapu èn sondu tyari dede kon. Dati meki ala sma e dede” (Romesma 5:12). Wi e dede fu di wi kisi sondu nanga dede fu wi fosi papa nanga mama. Wi no e dede fu di Gado ben seti sani so. Gado noiti no ben o du so wan sani.

Aladi Adam nanga Eva ben opo densrefi teige Gado na ini Eden, toku den sani di Gado ben abi na prakseri gi grontapu, no kenki. Fu di Gado lobi wi trutru èn fu di a e du san reti ala ten, meki a seti sani fu puru wi na ini katibo fu sondu nanga dede. Na apostel Paulus ben taki: „A pai fu sondu na dede, ma a kado di Gado e gi sma na têgo libi nanga yepi fu Krestes Yesus wi Masra” (Romesma 6:23). Fu di Gado lobi wi, meki a „gi en wan-enkri Manpikin [Yesus Krestes], so taki ala sma di e bribi na ini en no sa dede, ma sa kisi têgo libi” (Yohanes 3:16). Yesus ben de klariklari fu gi ensrefi leki lusu-paiman, so taki wi kan kisi ala den sani baka di Adam ben lasi. a

Heri esi, grontapu o tron wan paradijs soleki fa Gado pramisi. Yu kan kisi a grani tu fu libi na ini a paradijs efu yu e du a sani disi di Yesus ben taki: „Pasa go na ini a smara doro. A pasi di e tyari sma go na dede, bradi èn a bigi. Furu sma e waka a pasi dati. Ma a doro di e tyari sma go na libi, pikin èn a pasi fu en smara. Wan tu sma nomo e feni en” (Mateyus 7:13, 14). Iya, den bosroiti di yu e teki now o abi krakti tapu yu libi bakaten. San yu o du?