FUTURU NEʼEBÉ KAPÁS! Ita-nia Kriadór promete katak nia sei fó ita moris rohan-laek iha mundu. Maibé ema barak sente susar atu fiar ida-neʼe. Sira hatete: ‘Ikusmai ema hotu sei mate, mate mak parte ida husi ema nia moris.’ Ema balu fiar katak ita bele duni moris ba nafatin, maibé laʼós iha mundu neʼe. Sira hatete katak ita bele hetan moris rohan-laek se ita mate ona no bá lalehan. Ita rasik hanoin oinsá?

Antes hatán pergunta neʼe, haree toʼok Bíblia nia resposta ba pergunta tolu tuirmai: Saida mak ita bele aprende husi dalan neʼebé Maromak kria ema? Tuir loloos, saida mak Maromak nia hakarak ba ema no mundu? Tanbasá mak ikusmai ema mate?

Husi kriatura hotu neʼebé Maromak kria iha mundu, ema mak úniku. Tanbasá? Bíblia hatete katak só ema deʼit mak Maromak kria tuir ninia “ilas”. (Génesis 1:26, 27) Neʼe katak sá? Neʼe katak ema bele haleno Maromak nia hahalok diʼak, hanesan domin no justisa.

Maromak mós kria ema ho kbiit atu hanoin, iha morál, no hakarak atu iha relasaun diʼak ho Maromak. Tan neʼe mak ita bele hafolin universu neʼebé furak, natureza, arte, múzika, no poezia. Laʼós neʼe deʼit, ema mós iha kapasidade atu adora Kriadór. Buat sira-neʼe hatudu katak ema la hanesan duni ho kriatura seluk neʼebé moris iha mundu.

Entaun, hanoin toʼok: Se Maromak nia planu mak atu ema moris ba tinan 70 ka 80 deʼit, tanbasá mak nia kria ita ema ho kapasidade atu haburas matenek no hahalok diʼak oioin neʼebé la iha limitasaun? Tuir loloos, Maromak fó buat sira-neʼe hotu mai ita atu ita bele goza moris iha mundu ba nafatin.

Ema balu hatete katak Maromak lakohi ema moris ba nafatin iha mundu. Sira hatete katak mundu mak hela-fatin temporáriu deʼit, fatin atu haree sé-sé deʼit mak merese bá lalehan no moris ba nafatin hamutuk ho Maromak. Maibé, se ida-neʼe mak loos, neʼe katak Maromak mak hamosu buat aat sira iha mundu, loos ka lae? Neʼe kontra  malu duni ho Maromak nia hahalok. Bíblia hatete kona-ba Maromak: “Ninia dalan sira hotu mak loos. Maromak laran-metin, nia sempre hatudu justisa.”​—Deuteronómio 32:4.

Bíblia hatudu sai Maromak nia hakarak ba mundu hodi dehan: “Kona-ba lalehan, neʼe mak Jeová nian, maibé nia fó ona rai ba ema.” (Salmo 115:16) Sin, Maromak kria mundu nuʼudar ema nia hela-fatin permanente neʼebé furak no Maromak kria buat oioin atu taka ita-nia presiza hodi ita bele goza moris ba nafatin.​—Génesis 2:8, 9.

“Kona-ba lalehan, neʼe mak Jeová nian, maibé nia fó ona rai ba ema.”​—Salmo 115:16

Bíblia mós fó sai ho klaru Maromak nia hakarak kona-ba ema. Maromak haruka kaben-naʼin primeiru atu “halo nakonu no domina rai neʼe, domina . . . kriatura hotu neʼebé book an iha rai”. (Génesis 1:28) Tau matan no halo luan paraízu iha mundu mak knaar neʼebé furak tebes! Tuir loloos Adão ho Eva no mós sira-nia bei-oan hotu iha oportunidade atu moris ba nafatin iha mundu, laʼós iha lalehan.

Se nuneʼe, tanbasá mak ita mate? Bíblia esplika katak iha kriatura espíritu ida neʼebé ikusmai sai Diabu Satanás no koko atu estraga Maromak nia arranju iha Eden. Oinsá?

Satanás book ita-nia inan-aman primeiru Adão no Eva atu apoia nia hodi kontra Maromak. Satanás duun katak Maromak lakohi fó ba sira direitu atu deside buat diʼak no aat. Tuirmai sira hili atu apoia Satanás no kontra Maromak. Neʼe lori rezultadu saida? Hanesan Maromak hatete nanis ona, ikusmai sira mate. Sira lakon oportunidade atu moris ba nafatin iha mundu paraízu.​—Génesis 2:17; 3:1-6; 5:5.

Tanba Adão no Eva kontra Maromak, neʼe fó impaktu ba ema hotu toʼo ohin loron. Maromak nia Liafuan hatete: “Sala tama iha mundu liuhusi ema ida [Adão], no mate tanba sala. Nuneʼe ema hotu mate tanba ema hotu halo ona sala.” (Roma 5:12) Ita mate tanba ita mak Adão ho Eva nia bei-oan neʼebé sala-naʼin, laʼós tanba Maromak nia planu.

Maibé buat neʼebé akontese iha jardín Eden la hapara Maromak nia hakarak ba ema no mundu. Maromak nia domin neʼebé perfeitu no ninia hahalok justisa book nia atu prepara dalan hodi nuneʼe ita bele livre husi sala no mate. Apóstolu Paulo esplika: “Sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita-nia Naʼi.” (Roma 6:23) Tanba domin, Maromak “fó nia Oan-Mane mesak [Jesus Kristu], atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek”. (João 3:16) Liuhusi Jesus nia sakrifísiu, neʼe bele taka fali buat hotu neʼebé Adão halakon ona. a

Lakleur tan, Maromak nia promesa kona-ba mundu paraízu sei sai loos. Ita mós bele simu ida-neʼe se Ita halo tuir Jesus nia liafuan neʼebé hatete: “Laʼo liuhusi odamatan kloot bá, tanba odamatan boot no dalan luan mak lori ema ba mate, no ema barak laʼo liuhusi dalan neʼe. Maibé odamatan kloot no dalan kiʼik tebes mak lori ema ba moris, no ema uitoan deʼit mak hetan dalan neʼe.” (Mateus 7:13, 14) Sin, Ita-nia futuru depende ba Ita-nia desizaun. Saida mak Ita sei halo?