OGU TIGULI MUGISA GW’AMAANI? Omuhangi waitu aturaganiize kutuha obwomeezi obutahwaho, hanu omu nsi. Baitu, baingi ekintu kinu kibagumira kukiikiriza. Bagamba ngu ‘Buli muntu wena natekwa kufa.’ Kandi bagamba ngu ‘Ky’obuhangwa kufa.’ Abandi nibatekereza ngu kwomeera ebiro byona nikisoboka, baitu hatali omu nsi munu. Bagamba ngu omuntu nasobora kutunga obwomeezi obutahwaho hanyuma y’okufa kandi akagenda omu iguru. Iwe notekereza ki?

Otakagarukiremu ekikaguzo kinu, habwaki otabanza kwetegereza omulingo Baibuli egarukamu ebikaguzo binu bisatu: Omulingo omuntu yahangirwemu gwoleka guta akasumi akakaba asemeriire kwomeera? Ekigendererwa kya Ruhanga hali abantu n’ensi eky’okubanza nikiha? Okufa kukaija kuta omu bantu?

Omu bintu byona Ruhanga ebiyahangire ebiine obwomeezi, abantu bakahangwa omu mulingo ogw’embaganiza. Omu mulingo ki? Baibuli eyoleka ngu abantu bonka nubo bahangirwe omu “kisisani” kya Ruhanga n’omu “kusisanakwe.” (Okubanza 1:26, 27) Eki nikimanyisa ki? Nikimanyisa ngu abantu baine emiringo n’enyetwaza nk’eya Ruhanga, nk’okugonza, hamu n’okugonza obwinganiza.

Kwongera hali eki, Ruhanga akaha abantu obusobozi obw’okutekereza, okwetegereza, obw’okumanya ekihikire n’ekitahikire, hamu n’ekihika eky’okumanya kandi n’okutunga enkoragana enungi nauwe. Enu niyo ensonga habwaki nitusobora kusiima oburungi obw’ebihangwa byona, kandi n’okugonza ebintu nka kuteera ebisisani, n’okuzina. Baitu kukira byona, abantu baine obusobozi obw’embaganiza obw’okuramya Omuhangi wabo. Emiringo nk’enu efoora abantu b’embaganiza muno ha bihangwa ebindi byona

Tekerezaaho kinu: Ruhanga yakuhangire abantu n’emiringo nk’enu hamu n’obusobozi obw’okugikurakuraniza kandi kunu akabahanga kwomeera emyaka ntaito? Amananu gali ngu, Ruhanga akahanga abantu n’emiringo enu hamu n’obusobozi obw’embaganiza nukwo basobole kwegondeza omu nsi habw’ebiro n’ebiro.

Abamu bagamba ngu, Ruhanga atahange abantu kwikara omu nsi ebiro byona. Kandi batekereza ngu ensi ekahangwa kwikarwamu habw’akasumi kake, rundi nk’ekiikaro eky’okulengeramu abantu kumanya  abo abasemeriire kugenda omu iguru kwikara na Ruhanga habw’ebiro n’ebiro. Baitu ago obugaraaba gali mananu, tikirukumanyisa ngu Ruhanga nuwe ndugirro y’ebikorwa byona ebibi hamu n’obubi bwona obuli omu nsi? Eki tikihikire habwokuba nikiba nikihakaniza emiringo ya Ruhanga. Baibuli egamba eti hali Ruhanga: “Emihandaye yona yobulyo: Ruhanga wokwesigwa hataroho kutahikirra, nuwe ahikiriire, kandi wobulyo.”​—Ekyebiragiro 32:4.

Baibuli neyolekera kimu ekigendererwa kya Ruhanga akaba aine kuruga kara omu bigambo binu: “Iguru niryo iguru lya Mukama; baitu ensi akagiha abana babantu.” (Zabuli 115:16) Mali, Ruhanga akahanga ensi eri nungi muno, ebe eka y’abantu etalihwaho, kandi yagitamu ebintu byona ebibarukwetaaga kuba n’obwomeezi oburungi kandi obutahwaho.​—Okubanza 2:8, 9.

“Iguru niryo iguru lya Mukama baitu ensi akagiha abana babantu.”​—Zabuli 115:16

Kandi Baibuli eyongera etwoleka kurungi ekigendererwa kya Ruhanga hali abantu. Akaragira omusaija n’omukazi ab’okubanza ati: “Muijuze ensi, mugirye; mulemege . . . byona ebinyina obwomezi ebigendera hansi.” (Okubanza 1:28) Mali ogu kagukaba mugisa gw’amaani ogw’okurolerra kandi n’okugalihya orugonjo orurungi kuhika omu nsi yoona! Adamu na Haawa hamu n’abaana babo baali baine omugisa ogw’okutunga obwomeezi obutahwaho omu nsi hatali omu iguru.

Baitu hati, habwaki tufa? Baibuli n’eyoleka ngu ekihangirwe kya Ruhanga eky’omwoyo ekirukumanywa nka Setani, kikahakaniza entekaniza za Ruhanga omu rugonjo Adeni. Omu mulingo ki?

Setani akasoonasona abazaire baitu ab’okubanza Adamu na Haawa, nabo kumweteranizaaho omu kujemera Ruhanga. Setani obuyagambire ngu Ruhanga tarukugondeza Adamu na Haawa ebirungi​—obu nubwo obugabe obw’okwecweramu ekihikire n’ekitahikire—​bakahuliiriza Setani kandi bajeemera Ruhanga. Kiki ekyarugiremu? Akasumi kakahika, bafa, nk’oku Ruhanga akaba agambire. Bakaferwa omugisa ogw’okwomeera ebiro byona omu nsi.​—Okubanza 2:17; 3:1-6; 5:5.

Obujeemu bwa Adamu na Haawa bukakwataho abantu boona n’okuhika kasumi kanu. Ekigambo kya Ruhanga nikigamba: “Nukwo, nkekibi okukyatahire omu nsi obwomuntu omu [Adamu], kandi nokufa obwekibi; nukwo nokufa kwahikire kuti ha bantu bona.” (Abarumi 5:12) Titurukufa habw’entekaniza ya Ruhanga, baitu nitufa habw’okwijukura ekibi n’okufa kuruga ha bazaire baitu ab’okubanza.

Obujeemu obwatandikiire omu rugonjo rw’Adeni butahindule ekigendererwa kya Ruhanga eky’akabaine omu kubanza habw’abantu hamu n’ensi. Engonzi za Ruhanga enyingi hamu n’obwinganiza bwe, bikamuletera kututeraho omuhanda ogw’okutujuna kuruga omu kibi n’okufa ebitwaijukwire. Omukwenda Paulo akasoborra ati: “Baitu empera eyekibi kufa; baitu ekisembo kyembabazi ekya Ruhanga bwomezi obutahwaho omu Kristo Yesu Mukama waitu.” (Abarumi 6:23) Habw’okugonza, Ruhanga ‘akahayo Omwana we [Yesu Kristo] ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho.’ (Yohana 3:16) Habw’okwehayo ayegondiize nk’ekicunguro, Yesu akacungura byona Adamu ebyakaba atuferiize. a

Omu kasumi akatali kahara, omurago gwa Ruhanga ogw’okufoora ensi yoona orugonjo orurungi nigwija kuhikirra. Obwomeezi bunu oburungi obw’omu kasumi ak’omu maiso naiwe nosobora kubutunga kakuba oyorobera okutererra kwa Yesu kunu: “Mutahe omu irembo erifunzire: baitu irembo ligalihire nomuhanda ogurukugenda omu kuhwerekerra mukoto, nabo abagutahamu baingi. Baitu irembo lifunzire nomuhanda ogutaha omu bwomezi muke, nabo abuguzora bake.” (Matayo 7:13, 14) Mali, obusumi bwawe obw’omu maiso nibwija kusigikirra ha ncwamu zaawe ez’orukukora kasumi kanu. Kiki iwe eky’orakora?