ỌYENA CHA VWERHEN OMA! Ọmemama rẹ avwanre veri nẹ ọ cha kẹ avwanre arhọ rẹ bẹdẹ vwẹ otọrakpọ na. Jẹ ọ bẹn vwọ kẹ ihwo buebun rẹ ayen vwo se ọyena gbuyota. Evo tobọ ta: ‘O vwo ohwo ro che je ghwo-o.’ ‘Ọyena ẹbẹre ọvo rẹ akpeyeren.’ Efa vwo esegbuyota nẹ a sa dia bẹdẹ, ẹkẹvuọvo ọ dia otọrakpọ na-a. Ayen tanẹ ohwo de ghwu nu, ko kpo odjuvwu ra dia bẹdẹ. Die wo rorori?

Tavwen wọ ke kpahenphiyọ, roro kpahen ẹkpahọnphiyọ rẹ Baibol vwọ kẹ enọ erha nana: Mavọ yen obo ra ma ohworakpọ wan dje uchọke ra guọnọre nẹ ọ dia te? Die yen ọhọre rẹ Ọghẹnẹ vwọ kẹ ihworakpọ vẹ otọrakpọ na? Die yen ghwa ughwu rhe?

Vwẹ emama ri vwo arhọ ejobi rẹ Ọghẹnẹ mare, ohworakpọ fẹnẹre. Vwẹ idjerhe vọ? Baibol na djerephia nẹ ohworakpọ ọvo yen a ma “họhọ” Ọghẹnẹ vwẹ “oma” rọyen. (Jẹnẹsis 1:26, 27) Die yen ọyena mudiaphiyọ? O mudiaphiyọ nẹ a kẹ ihworakpọ iwan vẹ iruemu re họhọ e rẹ Ọghẹnẹ, kerẹ ẹguọnọ kugbe ọhọ rẹ orhiẹn abavo.

Vwọba, a kẹ ohworakpọ ẹgba ro se vwo roro, ra vwọ riẹn obo ri shephiyọ, vẹ ẹgba re vwo yono Ota rẹ Ọghẹnẹ. Kọyensorọ avwanre sa vwọ kpẹvwẹ Ọghẹnẹ fikirẹ igbunu rẹ obo rọ ma idjuvwu, otọrakpọ vẹ obo rehẹ evun rayen, eriyin ji te erọnvwọn rẹ ihwo ya re, uhworo, vẹ eta yẹrẹ ine aghwanre. Ọ rọ marho, ohworakpọ vwo ẹgba rẹ oghẹresan, ọyen ọ vwọ ga Ọmemama na. Iruemu vẹ iwan tiọyena nẹrhẹ ihworakpọ fẹnẹ emama efa rehẹ otọrakpọ na.

Ọtiọyena gbe roro kpahen onọ nana: Ọghẹnẹ ra ma avwanre vẹ iwan iyoyovwin tiọyena, vẹ ẹgba re vwo ru ayen yovwin phiyọ, ọ da dianẹ ọ guọnọre nẹ a dia otọrakpọ na bẹdẹ-ẹ? Vwọrẹ uyota, Ọghẹnẹ kẹ avwanre iwan yena rere e se vwo yerin akpọ rẹ omavwerhovwẹn vwẹ otọrakpọ na bẹdẹ.

Ihwo evo tare nẹ Ọghẹnẹ ma ihworakpọ rẹ ayen vwọ dia bẹdẹ-ẹ. Ayen tanẹ Ọghẹnẹ ma akpọ na a vwọ dia ọmọke krẹn rere ọ vwọ davwen ihworakpọ ni, ọtiọyena kọ sa riẹn ihwo ri muwan ri vwo kpo odjuvwu re nene dia bẹdẹ. Ọyena da dia uyota, kọyen ayen tanẹ Ọghẹnẹ yen so umiovwon vẹ ebẹnbẹn ra mrẹ vwẹ akpọ na nonẹna. Esegbuyota  tiọyena vwọso oka rẹ ohwo rẹ Ọghẹnẹ ghene hepha. Baibol na da ta kpahen Ọghẹnẹ: “Ọghẹnẹ rẹ uyota ro vwo umwemwu-u, ọvwata vẹ ohwo ọsoso o ruẹ.”​—Urhi Rivẹ 32:4.

Baibol na nabọ dje ọhọre rẹ Ọghẹnẹ vwọ kẹ otọrakpọ na phephẹn womarẹ eta nana: “Idjuvwu na idjuvwu rẹ Ọrovwohwo na, ẹkẹvuọvo otọ na kọye ọ vwọ kẹ emọ rẹ ihwo.” (Une Rẹ Ejiro 115:16) Ophẹnri nẹ Ọghẹnẹ ma otọrakpọ na rere ọ dia uwevwin kẹ ihworakpọ bẹdẹ, o da ma kemu kemu phiyọ ra guọnọre a vwọ riavwerhen akpeyeren bẹdẹ bẹdẹ.​—Jẹnẹsis 2:8, 9.

“Idjuvwu na idjuvwu rẹ Ọrovwohwo na, ẹkẹvuọvo otọ na kọye ọ vwọ kẹ emọ rẹ ihwo.”​—Une Rẹ Ejiro 115:16

Oborẹ Baibol na je ta kpahen ọhọre rẹ Ọghẹnẹ vwọ kẹ ihworakpọ je nabọ phẹn. Ọ vuẹ aye gbe ọshare ẹsosuọ nẹ: “Vọn akpọ na, ru we phio kparobọ, kugbe re we vwo ogangan vwẹ enu rẹ . . . kemu kemu rọ yan vwẹ otọ na ejobi.” (Jẹnẹsis 1:28) Ọyena uphẹn rode rẹ ayen vwọ vwẹrote, ji ru akpọ na ejobi phiyọ Iparadaisi! Vwọrẹ uyota, Ọghẹnẹ guọnọre nẹ Adam vẹ Ivi kugbe emọ rẹ ayen che vwiẹ dia otọrakpọ na bẹdẹ, ọ dia odjuvwu-u.

Diesorọ avwanre vwo ghwẹ? Baibol na tare nẹ amakashe Ọghẹnẹ ọvo, ra rhe riẹn phiyọ Eshu rọ dia Idẹbono, davwẹngba ro vwo gbowọphiyọ ọrhuẹrẹphiyotọ rẹ Ọghẹnẹ vwẹ Idẹn. Vwẹ idjerhe vọ?

Eshu riẹriẹ Adam vẹ Ivi re dia ọsẹ vẹ oni avwanre rẹsosuọ, ayen da vwomaba Eshu vwo gbevwọso Ọghẹnẹ. Ọke rẹ Eshu vwọ tanẹ Ọghẹnẹ si emu erhuvwu ọvo nu kẹ ayen, kọyen uphẹn rẹ ayen vwo brorhiẹn kẹ oma rayen kpahen obo ri yovwirin vẹ obo re brare​—ayen de nene Eshu chukoku Ọghẹnẹ. Die yen nẹ obuko rọyen rhe? Ọke ọvo rhi vwo te, ayen de ghwu, kirobo rẹ Ọghẹnẹ tare jovwo. Uphẹn rẹ ayen vwọ dia Iparadaisi vwẹ otọrakpọ na bẹdẹ da va ayen abọ.​—Jẹnẹsis 2:17; 3:1-6; 5:5.

Oborẹ Adam vẹ Ivi ruru na djobọte ihworakpọ eje rhi te nonẹna. Ota rẹ Ọghẹnẹ tare: “Umwemwu wan oma rẹ ohwo ọvo [Adam] rhe akpọ rẹ ughwu da wan oma rẹ umwemwu rhe na, ọtiọye na ughwu da hrabọ ro ihwo ejobi.” (Rom 5:12) Avwanre ghwẹ kiridie avwanre riuku rẹ umwemwu vẹ ughwu mie ọsẹ vẹ oni rẹ avwanre rẹsosuọ, ughwu vẹ umwemwu dia obo re rhiri-i, ọ je dia ọhọre Ọghẹnẹ kẹ avwanre-e.

Egbevwọsua rọ phiare vwẹ Idẹn na wene ọhọre Ọghẹnẹ vwọ kẹ ihworakpọ vẹ otọrakpọ na-a. Ẹguọnọ ọgbagba rẹ Ọghẹnẹ vẹ orhiẹn ọsoso mu ro vwo rhie idjerhe ro vwo si avwanre vwo nẹ umwemwu vẹ ughwu ra riuku rọyen. Ọyinkọn Pọl de dje enẹ: “Osa rẹ umwemwu hẹ ughwu, ẹkẹvuọvo ẹserọphẹ rẹ Ọghẹnẹ na ọye hẹ arhọ ri bẹdẹ vwẹ evun ri Jesu Kristi Ọrovwavwanre.” (Rom 6:23) Kidie nẹ Ọghẹnẹ guọnọ akpọ na, “ọ da vwẹ Ọmọ ọvuọvo rọye na [Jesu Kristi] kẹ, rere ohwo kohwo ro sere gbuyota vwo jẹ ghwọrọ ẹkẹvuọvo ko vwo arhọ ri bẹdẹ.” (Jọn 3:16) Womarẹ izobo rẹ ọtanhirhie rẹ Jesu, kọ sa tan emu ejobi rẹ Adam ku kufia hirhe. a

O rhe che kri-i, ive rẹ Ọghẹnẹ ro vwo ru akpọ na hirhiephiyọ iparadaisi ko che rugba. Wọ sa dia vwẹ ọke yena siẹrẹ wo de ru nene uchebro rẹ Jesu rọ vwọ ta: “Ovwan wan anurhoro ọhwahwa na: Kidie idjerhe rọ hẹhẹre kugbe anurhoro hẹhẹre ọye idjerhe rẹ ughwru. Ihwo buebu yi nene idjerhe yena. Kidie idjerhe rẹ uyota na pha hwahwa phiọnphiọn, ọye ọ rẹ arhọ na; ihwo tutuno re sa guọnọ mrẹ.” (Matiu 7:13, 14) Orhiẹn ru wo bruru nonẹna yen che dje sẹ wọ cha dia vwẹ ọke yena. Die yen wo che ru?