CHELECHI CHILI CHEMBECHEYO CHAKUSANGALASYA MNOPE! Mkupanganya jwetu atupele chembecheyo chakutama ni umi wangamala pachilambo chapasi pano. Nambope ŵandu ŵajinji yikusiyasawusya kulupilila yeleyi. Ŵandu ŵane akusati, ‘Mundu papagwile, akusajembecheya kuti lisiku line chachiwa.’ Ŵandu ŵane akusayiwona kuti yili yakomboleka kutama kwangamala, nambo ngaŵa pachilambo chapasi pano. Ŵane akusasala kuti ŵandu akusakola umi wangamala kwinani panyuma pachiwa chawo. Ana wawojo akuganisya wuli?

Mkanajanje chiwusyochi kwende kaje tulole yajikusasala Baibulo pa yiwusyo yitatu yakuyichisyayi, Ana yisyene kuti ŵanduwe twapanganyidwe m’litala lyakuti mpaka tutame kwangamala? Ana chakulinga cha Mlungu pakupanganya chilambo chapasi soni ŵandu chaliji chamtuli? Ana chiwa chatandite mwamtuli?

Pa yakupanganyikwa yosope yaumi yaŵapanganyisye Mlungu pachilambo chapasi, ŵanduwe tuli yakupanganyikwa yapajika. Ligongo chichi? Baibulo jikusalosya kuti Mlungu ŵapanganyisye ŵandu “m’chiwanichisyo,” kapena kuti ‘mwakulandana’ ni jwalakwe. (Genesis 1:26, 27) Ana yeleyi yikugopolela chichi? Yikugopolela kuti Mlungu ŵapanganyisye ŵandu kuti alosyeje ndamo syakwe, mpela chinonyelo soni chilungamo.

Konjechesya pelepa, Mlungu ŵapanganyisye ŵandu m’litala lyakuti apakomboleje kusagula chambone soni chakusakala nambosoni kuti asachilileje kuŵa paunasi ni jwalakwe. Ni ligongo lyakwe tukusakombola kwambula, kwimba nyimbo, kulemba nambosoni kusangalala patukulola yakupanganyikwa yakwinani soni yapachilambo chapasi. Kupunda yosopeyi, Mlungu ŵatupanganyisye m’litala lyakuti tupakomboleje kuŵa najo paunasi. Ligongo lya ndamo syelesi ŵanduwe tuli ŵakulekangana mnope ni yakupanganyikwa yosope yaumi pachilambo chapasi.

Aganichisye ayi; Ana Mlungu akapanganyisye ŵandu m’litala lyeleli yikaŵe kuti ŵasakaga kuti atameje kwa ndaŵi jamnono? Mlungu nganasakaga yeleyi, jwalakwe jwapanganyisye ŵandu ni ndamo syapajika kuti asangalaleje ni umi mpaka kalakala.

Ŵandu ŵane akusasala kuti Mlungu nganasakaga kuti ŵandu atameje pachilambo chapasi mpaka kalakala. Akusasala kuti Mlungu ŵapanganyisye chilambochi kuti chiŵe malo gakwalinjila ŵandu, kuti kaneko apate ŵakuŵajilwa ŵachachitama nawo kwinani mpaka kalakala. Yikaŵe kuti yeleyi yili yisyene, nikuti yikaliji yakupikanika kumjimba Mlungu magambo pa yakusakala yosope yayikutendekwa pachilambopa. Nambosoni kutenda  yeleyi ngamkaniyikamulana ni ndamo jakwe. Pakwamba ya Mlungu, Baibulo jikusati, “Pakuŵa matala gakwe gosope gali gachilungamo. Mlungu jwakulupichika, ngakusatenda yangalungama. Jwalakwe ali jwakulungama.”—Detulonomo 32:4.

Baibulo pakusala ya chakulinga cha Mlungu pakupanganya chilambo chapasichi, jikusati, “Pakwamba ya kwinani, kwinani kuli kwa Yehofa, nambo chilambo chapasi ŵachipeleche kwa ŵanache ŵa ŵandu.” (Salimo 115:16) Kusala yisyene, Mlungu ŵachipanganyisye chilambo chakusalalachi kuti chiŵe kumangwawo ŵandu, soni chikwete yindu yosope yakusosechela kuti tusangalaleje ni umi mpaka kalakala.—Genesis 2:8, 9.

“Pakwamba yakwinani, kwinani kuli kwa Yehofa, nambo chilambo chapasi ŵachipeleche kwa ŵanache ŵa ŵandu.”—Salimo 115:16

Baibulo jikusasalasoni ya chakulinga cha Mlungu pakupanganya ŵandu. Mlungu jwamsalile jwamlume ni jwamkongwe jwandanda kuti ‘mŵelekane, mtupe, mgumbale pachilambo chapasi, soni mchiloleleje . . . chaumi chilichose chakwaŵa pachilambo chapasi.’ (Genesis 1:28) Mlungu ŵampele Adamu ni Hawa upile wekulungwa wakusamalila chilambo, soni kuchikusya kuti chiŵe Paladaiso. Jemanjaji yimpepe ni ŵanache ŵawo akatamaga pachilambopa ni kusangalalaga ni umi mpaka kalakala, nambo ngaŵa kwinani.

Ana ligongo chichi tukusawa? Baibulo jikusalosya kuti chimo mwa yakupanganyikwa yausimu chamjimuchile Mlungu. Panyuma pakwe chatandite kolanjidwa kuti Satana. Jwalakwe jwalinjile kusokonasya chakulinga cha Mlungu mu mgunda wa Edeni. Ana jwatesile yeleyi mwamtuli?

Satana jwanyenjelele achinangolo ŵetu ŵandanda, Adamu ni Hawa kuti aŵe kumbali jakwe jakwimuchila Mlungu. Satana jwasasile kuti Mlungu ŵajimaga yindu yambone ligongo nganiŵapa ukumu wakuti amanyilile jika yambone soni yakusakala. Adamu ni Hawa ŵapikanile yaŵasalaga Satana ni kusagula kwimuchila Mlungu. Ana kaneko chatendekwe chichi? Mkupita kwa ndaŵi, ŵawile mpela muŵaŵechetele Mlungu. Jemanjaji ŵajasile upile wawo wakutama kwangamala m’Paladaiso pachilambo chapasi.—Genesis 2:17; 3:1-6; 5:5.

Yakuyichisya ya kwimuchila kwa Adamu ni Hawa yakwayiye ŵandu wosope mpaka lelojino. Maloŵe ga Mlungu gakusati, “Mpela mwele ulemwa wajinjile m’chilambo kupitila mwa mundu [jwali Adamu] jumo soni chiwa chayiche kupitila mu ulemwawo, myoyo chiwa chawandile kwa ŵandu wosope.” (Aloma 5:12) Ŵanduwe tukusawa ligongo lyakuti twajigalile ulemwa soni chiwa kutyochela kwa achinangolo ŵetu ŵandanda, nambo ngaŵa kuti Mlungu ŵalembile chile yeleyi mpela mwakusaŵechetela ŵane.

Kwimuchila kwa mumgunda wa Edeni ngaŵa kuti kwasokonasisye chakulinga cha Mlungu pakwamba ya ŵandu, soni chilambo chapasichi. Chinonyelo cha Mlungu, soni chilungamo chakwe chamtendekasisye kupata litala lyakulupuchisya ŵanduwe ku ulemwa soni chiwa. Ndumetume Paulo jwatite, “Malipilo ga ulemwa gali chiwa, nambo mtuka wakusapeleka Mlungu uli umi wangamala kupitila mwa Klistu Yesu Ambuje ŵetu.” (Aloma 6:23) Mlungu mwachinonyelo “ŵapeleche Mwanache jwakwe jumopejo [jwali Yesu Klistu], ni chakulinga chakuti jwalijose jwakumkulupilila jwalakwe akajonanjidwa nambo akole umi wangamala.” (Yohane 3:16) Yesu jwaliji jwakusachilila kupeleka umi wakwe mpela mbopesi kuti ŵawombole ŵanache wosope ŵa Adamu. a

Pachangakaŵapa chakulinga cha Mlungu pakwamba ya paladaiso pachilambo chapasichi chichikwanilichikwe. Naga akusaka kuti chasangalale ni umi m’chilambo chasambano, akusosekwa kukuya maloŵe ga Yesu gakuti, “Mjinjile pamlango wakanganika, ligongo mlango wekulungwa soni msewu welanguche ukwawula ku chonasiko, mwamti ŵajinji akupita pamlango welewu.  Nambo mlango wakanganika soni msewu wamwana ukwawula ku umi, mwamti ŵele ŵakuwupata ali ŵakuŵalanjika.” (Mateyu 7:13, 14) Kuti chasangalale ni yeleyi yikwegamila yampaka asagule apano. Ana wawojo chasagule kutenda chichi?