RIB MANIGIL E RE ATHAP NEY! Ke micheg e En Tasunmiy nra pi’ e yafos ni manemus ngodad u roy u fayleng. Machane, boor e girdi’ nib mo’maw’ ni nge mich e re n’ey u wan’rad. Ma lungurad, ‘Gubin e girdi’ nra yim’. Ya ka bang ko yafos rodad.’ Ma boch e girdi’ e yad ma lemnag nrayog ni nge par e girdi’ ni manemus, machane gathi u roy u fayleng e ngar pared riy. Yad ma yog ni fin ngiyal’ ni kad m’ad ka darod nga tharmiy e fin aram e ngiyal’ nra yag e yafos ni manemus ngodad. Me gur, uw rogon u wan’um?

U m’on ni ngam pi’ e fulweg ko re deer ney, ma mang ndab mu guy e fulweg ko re dalip i deer ni baaray nrogon ni bay u Bible. Re dalip i deer ney e: Bochan rogon ni sunmiy Got e girdi’, ma mang e be dag e re n’ey ngodad u rogon n’umngin nap’an ni lemnag ni ngar pared? Mang e n’en nib m’agan’ Got ngay ni fan ko fayleng nge girdi’ aram ko tabolngin? Ma mang e rin’ ma aram me tabab e girdi’ ni ngaur m’ad?

Rib thil e girdi’ u fithik’ urngin ban’en ni ke sunmiy Got u fayleng. Ni uw rogon? Be yog e Bible ni kemus ni yigoo girdi’ e kan sunmiyrad ni yad bod ‘yaan’ Got maku yad ‘bod’ ir. (Genesis 1:26, 27) Mang e be yip’ fan e re n’ey? Be yip’ fan ni kan sunmiy e girdi’ ni bay rarogon Got rorad nge pi fel’ngin ni bod rogon e t’ufeg, maku yad baadag e tin nib mat’aw.

Maku reb e, kan sunmiy e girdi’ nrayog ni ngar lemgad mu kur fal’eged i lemnag boch ban’en, maku rayog ni ngar nanged e n’en nib thil u thilin e tin nib fel’ ko tin nib kireb, miki fel’ e tha’ u thilrad Got. Aram fan nrayog ni ngad felfelan’gad ko pi n’en nrib pag feni manigil ni bay u palpalth’ib, nge pi n’en ni kan sunmiy nrib fel’ yaan, nge yaan boch ban’en ni kan yoloy nrib manigil, nge musik. Bin th’abi fel’ riy e, rayog ko girdi’ ni ngar liyorgad ngak e En Ke Sunmiyrad. Pi fel’ngin ney ni bay ko girdi’ e aram e n’en ni ma tayrad ni yad ba thil ko tin ni ka bay ban’en ni kan sunmiy u roy u fayleng.

Am lemnag e re n’ey: Ga be lemnag ni faan gomanga lemnag Got ni kemus ni in e duw ni ngad pared ni gad ba fos ngemu’ ma gad yim’, ma gur, ra pi’ boch e fel’ngin ngodad ni ar feni manigil, me taydad nrayog ni ngad maruwelgad ko pi fel’ngin ney mu kud mon’oggad u rogon ni gad be dag? Bin riyul’ riy e, ke pi’ Got e pi fel’ngin nge salap ney ko girdi’ ni bochan e nge yag nra felfelan’gad ko par rorad u roy u fayleng ndariy n’umngin nap’an.

Machane, bay boch e girdi’ ni yad ma yog nde lemnag Got ni nge par e girdi’ ni manemus. Yad ma yog ni kan ngongliy e re fayleng ney ni nge par e girdi’ riy nde n’uw nap’an, ya ngan guy ko mini’ rorad e bay rogon ni  nge yan nga tharmiy nge par rok Got ni manemus. Machane faanra riyul’ e re n’ey, me ere gathi ra yan i aw ni Got tapgin urngin e kireb ni be buch u roy u fayleng? Re n’ey e ba togopuluw ko bin riyul’ i rarogon Got. Be weliy e Bible murung’agen Got ni be gaar: “Ir e ba yal’uw ma mmat’aw urngin e tin ni ma rin’. Got romed e ba yul’yul’ ma der ma ban, ngongolen e ba fel’ ma ba yal’uw.”​—Deuteronomy 32:4.

Ke tamilangnag e Bible e n’en nib m’agan’ Got ngay ni fan ko fayleng aram ko tabolngin u daken e pi thin ni baaray ni be gaar: “Tharmiy e ke mus ni Somol e mmil suwon ngak, ma fayleng e ke pi’ ngak e girdi’.” (Psalm 115:16) Arrogon, ke sunmiy Got e fayleng nrib fel’ yaan ni nge par e girdi’ riy ndariy n’umngin nap’an, ma ke tay urngin ban’en ngay nib t’uf rodad ya nge yag nda felfelan’gad ko yafos rodad ndariy n’umngin nap’an.​—Genesis 2:8, 9.

“Tharmiy e ke mus ni Somol e mmil suwon ngak, ma fayleng e ke pi’ ngak e girdi’.”​—Psalm 115:16

Kub tamilang e n’en ni be yog e Bible u murung’agen e n’en nib m’agan’ Got ngay ni fan ko girdi’. I yog ngak e gal nsom’on e girdi’ ni ngar ‘diyengow nge yoor pi fakrow, nge wer e piin ni owcherow nga gubin yang u fayleng ngar pired riy mi yad suwey . . . urngin e gamanman.’ (Genesis 1:28) Ireray reb e tow’ath nrib manigil nni pi’ ngorow ni aram e ngar ayuwegew mar ga’nagew fare Paradis ni taferow ni bay u fayleng! Arrogon, fare athap ni immoy rok Adam nge Efa nge pi fakrow e aram e yafos ni manemus u fayleng, ma gathi tharmiy.

Ere mang fan ni gad ma yim’? Be tamilangnag e Bible ni immoy reb e engel rok Got ni boch nga tomuren me gagiyel ni ir Satan ni Moonyan’ ni guy rogon ni nge kirebnag e yaram rok Got u Eden. Ni uw rogon?

I k’aring e gal ga’ rodad ni aram Adam nge Efa ni ngar unew ngak ngar togopuluwgad ngak Got. Nap’an ni yog Satan ngak Adam nge Efa ni bay ban’en nib fel’ nder pi’ Got ngorow, ni aram e mat’awrow ni ngar dugliyew ko mang e ba fel’ ma mang e ba kireb, ma aram mar unew ngak Satan ngar togopuluwgad ngak Got. Ere mang wenegan ni yib nga tomuren? Munmun ma aram mar m’ow ni bod rogon ni yog Got ngorow u m’on riy. I mul u pa’row e athap ko yafos ni manemus u Paradis u fayleng.​—Genesis 2:17; 3:1-6; 5:5.

Ke par wenegan e togopuluw ni tay Adam nge Efa ko girdi’ keb i mada’ ko ngiyal’ ney. Be gaar e Thin rok Got: “Denen e yib nga fayleng u daken taabe’ [ni aram Adam], ma denen ni ngongliy e fek e yam’ i yib. Wenegan ni yib e af e yam’ ngak urngin e girdi’ nu fayleng.” (Roma 5:12) Gad ma yim’ ni bochan e ke afweg e gal ga’ rodad e denen nge yam’ ngodad. Ma re n’ey e gathi aray bang ko n’en nib ‘m’agan’’ Got ngay ni ke dugliy u m’on riy ndabiyog ni ngad nanged fan.

Fare togopuluw nni tay u Eden e de taleg Got ni nge dabi lebguy e n’en nib m’agan’ ngay ni fan ko girdi’ nge fayleng. T’ufeg rok Got nge rarogon ni ir reb e Got nib mat’aw e k’aring ni nge bing e kanawo’ ngodad ni ngad chuwgad u tan gelngin e denen nge yam’ ni ke af ngodad. I weliy apostal Paul ni gaar: “Denen e ma pi’ puluwoy​—ni yam’; machane tow’ath rok Got ngodad ndariy puluwon e yafos ndariy n’umngin nap’an nra pi’ u daken e taab girdi’ ni kad tiyed e Somol rodad i Jesus Kristus.” (Roma 6:23) Ere, bochan e t’ufeg rok Got ngodad ma aram “me pi’ Fak [ni aram Jesus Kristus] ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Bochan ni m’agan’ Jesus ngay ni nge pi’ ir ni nge mang biyul ni maligach, ma aram me yag rok ni nge sulweg urngin ban’en ni ke mul u pa’ Adam. a

Dabki n’uw nap’an ma ra riyul’ e n’en ni ke micheg Got ni aram e ra paradis e re fayleng ney. Rayog ni ngam un ko par u rom boch nga m’on ni faan ga ra fol ko fare thin ni yog Jesus ni be gaar: “Marod ko bin nib wen’in e garog, ya ba ga’ langan e garog ko nifiy, ma kanawo’ ni yan ngay e mmom, ma boor e girdi’ ni be yan u daken. Ma garog ko yafos e ba wen’in, ma kanawo’ ni yan ngay e mmo’maw’, ma ba lich e girdi’ ni be pirieg.” (Matthew 7:13, 14) Arrogon, gur e ga ra mel’eg rogon nra yan i aw e par rom boch nga m’on. Ere mang e ngam rin’?