ҜӘЛӘҸӘЈИНИЗ СИЗДӘН АСЫЛЫДЫРМЫ? Бәзиләри дүшүнүр ки, һәјат талејин, гисмәтин әлиндәдир, инсан ону дәјишә билмәз. Бу ҹүр дүшүнән инсанлар бәзи мәгсәдләринә чата билмәјәндә «гисмәтдән артығыны јемәк олмаз» дејиб «талеләри» илә барышырлар.

Бәзиләри исә јашадығымыз бу зүлм вә әдаләтсизлик дүнјасында чыхыш јолу тапмајыб мәјуслуға гәрг олур. Онлар һәјатларыны јахшылашдырмаға чалышырлар, амма һәр дәфә мүһарибә, ҹинајәт, тәбии фәлакәт, хәстәликләр вә бу кими шејләр планларыны алт-үст едир. Бу заман онлар: «Өзүмү бу гәдәр өлдүрмәјә дәјәр?» — дејә дүшүнүрләр.

Бу, һәгигәтдир ки, һәјатда баш верәнләр планларымыза ҹидди шәкилдә тәсир едә биләр (Ваиз 9:11). Амма сөһбәт сизин әбәди һәјатыныздан ҝедәндә сечим едә биләрсиниз. Мүгәддәс Китабда дејилир ки, ҝәләҹәјимиз вердијимиз гәрарлардан асылыдыр. Ҝәлин ҝөрәк неҹә.

Гәдим Исраил халгына рәһбәрлик едән Муса пејғәмбәр Вәд едилмиш дијарын астанасында халга Аллаһын сөзләрини чатдырыр: «Гаршыныза һәјатла өлүмү, хејир-дуа илә ләнәти гојдум. Һәјаты сечин ки, өзүнүз дә, өвладларыныз да сағ галасыныз, Аллаһыныз Јеһованы севиб, сөзүнә гулаг асыб, Она бағланыб јашајасыныз» (Ганунун тәкрары 30:15, 19, 20).

«Гаршыныза һәјатла өлүмү, хејир-дуа илә ләнәти гојдум. Һәјаты сечин ки,.. сағ галасыныз» (Ганунун тәкрары 30:19).

Бәли, Аллаһ Исраил халгыны Мисир көләлијиндән азад едир вә онлара Вәд едилмиш дијарда азад вә хошбәхт һәјат сүрмәк имканы верир. Амма Аллаһын вәд етдији бүтүн немәтләри әлдә етмәк үчүн онлар «һәјаты» сечмәли иди. Неҹә? Аллаһы севиб, сөзүнә гулаг асыб, Она бағланараг.

Бу ҝүн сизин дә гаршынызда буна бәнзәр бир сечим дурур вә ҝәләҹәјиниз бу сечимдән асылыдыр. Аллаһы севмәји, Онун сөзүнә гулаг асмағы вә Она бағлы галмағы сечмәклә «һәјаты» — јерүзү Ҹәннәтдә әбәди јашамағы сечмиш олаҹагсыныз. Бәс Аллаһы севмәк, сөзүнә гулаг асмаг, Она бағланмаг нә демәкдир?

Мәһәббәт Аллаһын әсас хүсусијјәтидир. Мүгәддәс Китабда јазылыб: «Аллаһ мәһәббәтдир» (1 Јәһја 4:8). Елә буна ҝөрә дә давамчылары Иса Мәсиһдән һансы әмрин ән бөјүк олдуғуну сорушанда о демишди: «Аллаһын Јеһованы бүтүн гәлбинлә, бүтүн варлығынла вә бүтүн ағлынла сев» (Мәтта 22:37). Јеһова Аллаһла мөһкәм достлуг мүнасибәтләри гурмаг үчүн Она горхудан вә ја кор-коранә јох, мәһәббәтдән ирәли ҝәләрәк итаәт етмәлијик. Бәс Аллаһы нәјә ҝөрә севмәлијик?

Аллаһын инсанлара севҝисини анламаг үчүн валидејнин өвлада бәсләдији севҝи барәдә дүшүнә биләрсиниз. Гејри-камил олмасына бахмајараг, өвладыны севән валидејн она тәрбијә верир, үрәкләндирир, дајаг олур. Чүнки өвладынын хошбәхт олмасыны, онун рифаһыны арзулајыр. Бәс бунун гаршылығында валидејн нә ҝөзләјир? Валидејн истәјир ки, ушағы ону севсин вә вердији тәрбијәни гәбул еләсин. Мәҝәр бизә һәр ҹүр немәт бәхш едән Јараданымызын да биздән Она миннәтдар олмағымызы ҝөзләмәјә һаггы чатмыр?

Мүгәддәс Китабда јазылан «гулаг асмаг» сөзү орижинал дилдә әсасән «итаәт етмәк» мәнасында ишләдилир. Елә ушаға «валидејнинин сөзүнә гулаг ас» дејиләндә дә бу нәзәрдә тутулур. Ејнилә, Аллаһын сөзүнә гулаг асмаг да Онун дедикләринә итаәт етмәк демәкдир. Биз Аллаһын Кәламыны охумагла Ону «ешидә» вә сөзүнә әмәл едә биләрик (1 Јәһја 5:3).

Аллаһын сөзүнә гулаг асмағын ваҹиблијини ҝөстәрмәк үчүн Иса Мәсиһ демишди: «Инсан јалныз чөрәклә јашамамалыдыр, Јеһованын ағзындан чыхан һәр бир кәлмә илә јашамалыдыр» (Мәтта 4:4). Физики гида нә гәдәр ваҹибдирсә, Аллаһ һагда елм алмаг ондан гат-гат ваҹибдир. Сүлејман пејғәмбәр демишди: «Һикмәт дә пул кими инсанын сипәридир. Амма елмин үстүнлүјү бундадыр ки, һикмәт өз саһибинин һәјатыны һифз едир» (Ваиз 7:12). Аллаһын бәхш етдији елм вә һикмәт бу ҝүн бизи мүдафиә едә вә әбәди һәјата апаран дүзҝүн гәрарлар вермәјә көмәк едә биләр.

Бундан өнҹәки мәгаләдә Иса Мәсиһин чәкдији нүмунәдән бәһс етмишдик. Ҝәлин һәмин нүмунәјә јенидән нәзәр салаг: «Һәјата апаран гапы дар, јол исә енсиздир вә бу јолу аз адам тапыр» (Мәтта 7:13, 14). Белә бир јолда сәјаһәт едәркән мәнзилбашына — әбәди һәјата чатмаг үчүн, сөзсүз ки, тәҹрүбәли бәләдчинин јанымызда олмасыны вә бизә јол ҝөстәрмәсини истәјәрдик. Демәли, Аллаһа бағлы галмаг үчүн әсаслы сәбәбимиз вар (Зәбур 16:8). Бәс буну неҹә едә биләрик?

Һәр ҝүн ҝөрүләси вә ҝөрмәк истәдијимиз ҹүрбәҹүр ишләримиз олур. Башымыз бу шејләрә о гәдәр гарыша биләр ки, Аллаһын биздән нә ҝөзләдијини дүшүнмәјә вахтымыз галмаја биләр. Мәһз бу сәбәбә ҝөрә Мүгәддәс Китаб бизи хәбәрдар едир: «Диггәтли олун, дүшүнҹәсизләр кими јох, мүдрикләр кими һәрәкәт един вә пис вахтда јашадығымызы нәзәрә алараг, вахтынызын гәдрини билин» (Ефеслиләрә 5:15, 16). Аллаһла мүнасибәтимизи һәјатда һәр шејдән үстүн тутмагла Она бағлы гала биләрик (Мәтта 6:33).

Кечмиши дәјишә билмәсәниз дә, өзүнүзүн вә доғмаларынызын ҝөзәл ҝәләҹәјинин олмасы үчүн тәдбир ҝөрә биләрсиниз. Мүгәддәс Китабда јазылыб ки, Јараданымыз Јеһова Аллаһ бизә дәрин мәһәббәт бәсләјир вә Онун биздән нә ҝөзләдијини билмәјимизә имкан јарадыб. Микә пејғәмбәр демишди:

«Еј инсан, нәјин доғру олдуғуну О, сәнә сөјләди. Јеһова сәндән башга нә истәјир ки?! Истәјир ки, әдаләтлә давранасан, Сәдагәти уҹа тутасан, Аллаһын өнүндә тәвазөкарлыгла јеријәсән!» (Микә 6:8).

Сиз Јеһова Аллаһын Онун јолунда аддымламаг дәвәтини гәбул едиб бу дәвәтә һај верәнләри ҝөзләјән әбәди немәтләри дадмаг истәјирсинизми? Сечим сизиндир!