MAKAPILI BA KA KON UNSAY IMONG KAUGMAON? Nagtuo ang ubang tawo nga ang kapalaran o predestinasyon mao ang nagkontrol sa ilang kinabuhi ug dili ang ilang mga desisyon. Kon dili nila makab-ot ang ilang mga tumong, igo lang silang moingon: “Aw, di gyod to para nako!”

Ang uban nabug-atan tungod sa ilang nakitang pagdaogdaog ug inhustisya nga nagakahitabo sa kalibotan karon. Naningkamot sila nga makabaton ug maayong kinabuhi. Pero ang ilang mga plano kanunayng mababagan tungod sa mga giyera, krimen, kalamidad, ug sakit. ‘Nawad-an na kog paglaom,’ sila miingon.

Tinuod, ang kahimtang sa kinabuhi makaapektar pag-ayo sa atong mga plano. (Ecclesiastes 9:11) Pero ang imong tinuod nga kaugmaon magdepende sa imong desisyon. Gani, ang Bibliya naghisgot ug pipila ka pananglitan nga nagpakita nga ang imong kaugmaon magdepende sa imong desisyon.

Si Moises, ang lider sa karaang nasod sa Israel, miingon sa katawhan dihang hapit na silang mosulod sa Yutang Saad: “Akong gibutang ang kinabuhi ug ang kamatayon sa inyong atubangan, ang panalangin ug ang tunglo; ug pilia gayod ang kinabuhi aron mabuhi mo ug ang inyong mga kaliwat, pinaagi sa paghigugma kang Jehova nga inyong Diyos, sa pagpamati kaniya, ug sa pag-unong kaniya.”​—Deuteronomio 30:15, 19, 20.

“Akong gibutang ang kinabuhi ug ang kamatayon sa inyong atubangan, ang panalangin ug ang tunglo; ug pilia gayod ang kinabuhi.”​—Deuteronomio 30:19

Oo, giluwas gyod sa Diyos ang mga Israelinhon gikan sa pagkaulipon sa Ehipto ug gihatagan silag paglaom nga magkinabuhing gawasnon ug malipayon sa Yutang Saad. Pero kanang tanan dili awtomatikong mahitabo. Aron madawat ang maong mga panalangin, kinahanglan nilang ‘pilion ang kinabuhi.’ Sa unsang paagi? ‘Pinaagi sa paghigugma sa Diyos, pagpamati kaniya, ug pag-unong kaniya.’

Karon, gibutang sab sa imong atubangan ang samang kapilian, ug ang imong kaugmaon magdepende sa imong pilion. Kon imong higugmaon ang Diyos, pamation o sundon ang iyang mga sugo, ug mounong niya, samag imong gipili ang kinabuhi—ang kinabuhing walay kataposan sa paraisong yuta. Pero unsay nalangkit niana?

Gugma ang pangunang hiyas sa Diyos. “Ang Diyos gugma,” misulat si apostol Juan. (1 Juan 4:8) Tungod niini nga rason, dihang gipangutana si Jesus kon unsa ang kinalabwan sa tanang sugo, siya miingon: “Higugmaa si Jehova nga imong Diyos sa tibuok mong kasingkasing, sa tibuok mong kalag, ug sa tibuok mong hunahuna.” (Mateo 22:37) Ang tinuod nga relasyon uban kang Jehova nga Diyos kinahanglang gibase sa gugma, dili sa kahadlok o tungod kay napugos lang. Pero nganong angay natong pilion ang paghigugma sa Diyos?

Ang gugma ni Jehova alang sa tawo samag gugma sa ginikanan ngadto sa ilang mga anak. Bisag dili perpekto, ang mapinanggaong mga ginikanan magtudlo, magdasig, motabang, ug magdisiplina sa ilang mga anak kay gusto nilang magmalipayon ug molampos sila. Unsay gidahom sa mga ginikanan? Gusto nila nga higugmaon sila sa ilang mga anak ug sundon ang ilang gitudlo nga makahatag nilag kaayohan. Dili ba natural lang nga dahomon sab sa atong perpektong Amahan sa langit nga magpakita tag apresasyon sa tanan niyang gihimo para nato?

Sa orihinal nga pinulongan nga gisulat ang Bibliya, ang pulong “pamati” sagad nagkahulogan ug “pagsunod.” Dili ba mao nay atong pasabot dihang sultihan nato ang bata nga “Pamati sa imong mama ug papa”? Busa, ang pagpamati nato sa Diyos nagpasabot nga mokat-on ta ug mosunod niya. Kay dili man nato literal nga madungog ang tingog sa Diyos, mamati ta niya pinaagi sa pagbasa ug pagsunod kon unsay giingon sa iyang Pulong, ang Bibliya.​—1 Juan 5:3.

Aron ipakita ang kaimportante sa pagpamati sa tingog sa Diyos, si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Gikinahanglan nato ang literal nga pagkaon, pero mas labaw natong gikinahanglan ang pagkuhag kahibalo bahin sa Diyos. Ngano? Ang maalamong hari nga si Solomon miingon: “Ang kaalam panalipod sama nga ang salapi panalipod, apan ang bentaha sa kahibalo mao kini: Ang kaalam magtipig sa kinabuhi sa tag-iya niini.” (Ecclesiastes 7:12) Ang kahibalo ug kaalam nga gikan sa Diyos makapanalipod nato ug makatabang nato sa paghimog maayong desisyon nga moresultag kinabuhing walay kataposan sa umaabot.

Hinumdomi ang ilustrasyon ni Jesus nga atong gihisgotan sa miaging artikulo, diin siya miingon: “Sigpit ang ganghaan ug gamay ang dalan padulong sa kinabuhi, ug diyutay ra ang nakakaplag niini.” (Mateo 7:13, 14) Sa pag-agi nianang dalana, seguradong makatabang ug dako kon kauban nato ang usa ka ekspertong guide ug dili ta molayo niya aron makaabot ta sa atong destinasyon​—ang kinabuhing walay kataposan. Busa, angay lang gyod nga magpabilin tang suod sa Diyos. (Salmo 16:8) Pero unsaon nato na paghimo?

Kada adlaw, daghan kaayo tag angayng himoon ug gustong himoon. Tungod ana, busy kaayo ta ug wala na kaayo tay panahon o wala na gyoy panahon sa paghunahuna kon unsay gusto sa Diyos nga atong himoon. Maong gipahinumdoman ta sa Bibliya: “Pagbantay pag-ayo nga ang inyong paggawi dili sama sa dili maalamon kondili sa maalamong mga tawo, nga gamiton ang inyong panahon sa kinamaayohang paagi, tungod kay nagkinabuhi ta sa daotang mga adlaw.” (Efeso 5:15, 16) Makapabilin tang suod sa Diyos kon himoon natong pinakaimportanteng butang sa atong kinabuhi ang atong relasyon kaniya.​—Mateo 6:33.

Bisag dili na nimo mabag-o ang imong kagahapon, makapili ka ug maayong kaugmaon para nimo ug sa imong mga minahal. Gipakita sa Bibliya nga gimahal gyod ta sa atong Amahan sa langit, si Jehova nga Diyos, ug iya tang gitudloan kon unsay gusto niya nga atong himoon. Matikdi ang giingon ni propetang Miqueas:

“Oh tawo, iyang gisulti kanimo kon unsay maayo. Ug unsa ba ang gipangayo ni Jehova kanimo? Mao lamang ang pagbuhat sa hustisya, ang paghigugma sa pagkamaunongon, ug ang paglakaw nga mapainubsanon uban sa imong Diyos!”​—Miqueas 6:8.

Dawaton ba nimo ang imbitasyon ni Jehova nga molakaw uban niya aron madawat ang walay kataposang mga panalangin nga iyang ihatag niadtong molakaw uban niya? Ikaw ang magdesisyon!