MBELA OTO VULU OKUHOGOLOLA NKENE ONAKUYIWA YOYE TAYI KA KALA? Aantu yamwe oyi itaala kutya omatokolo gawo hago hagu utha onkalamwenyo yawo, oshoka oyu uthwa nale. Ngele oya kala inaaya adha omalalakano gawo ohayi itunyu owala komapepe, ye wete kutya kaye na shoka taya vulu okuninga po. Ohaya ti: “Osha kala shu uthwa nale kutya itandi ka pondola.”

Yamwe ohaya teka omukumo uuna ya mono kutya itaya vulu okuhwepopaleka onkalo ndjika yomathiminiko nokwaanuuyuuki hoka ku li muuyuni. Otashi vulika ya kambadhala okuhwepopaleka oonkalamwenyo dhawo, ihe iinima ngaashi iita, omiyonena, iiponga yopaunshitwe nomauwehame ohayi yono oompangela dhawo lwiikando. Ohayi ipula taya ti: ‘Ngele osho shi li ngawo, omolwashike ndi na okuninga oonkambadhala?’

Oshoshili kutya oonkalo monkalamwenyo ohadhi vulu okuyona lela oompangela dhomuntu. (Omuuvithi 9:11) Ihe ngele tashi ya ponakuyiwa yoye yaaluhe, ehogololo olyoye mwene. Ombiimbeli otayi ulike kutya onakuyiwa yoye oyi ikolelela komatokolo ngoka ho ningi. Tala shoka tayi ti.

Moses, omuwiliki gwoshigwana shonale shaIsraeli, okwa li a lombwele oshigwana manga sha li shi li pokuya mEvi lyeuvaneko oohapu dhaJehova tadhi landula a ti: ‘Otandi ku pe, u hogolole pokati komwenyo neso, pokati keyambeko lyaKalunga netulomutima lye. Hogolola omwenyo. Hola Omuwa Kalunga koye, vulika kuye nowu mu dhame.’ — Deuteronomium 30:15, 19, 20.

‘Otandi ku pe u hogolole pokati komwenyo neso, pokati keyambeko lyaKalunga netulomutima lye. Hogolola omwenyo.’ — Deuteronomium 30:19

Eeno, Kalunga okwa li a mangulula oshigwana shaIsraeli muupika waEgipiti nokwe shi pe etegameno lyokukala sha manguluka noshi na onkalamwenyo ombwanawa mEvi lyEuvaneko. Ihe iinima ayihe mbyoka kaya li tayi ka ningwa owala ngeya. Opo shi mone omayambeko ngoka, osha li shi na ‘okuhogolola omwenyo.’ Ngiini mbela? Omokukala shi ‘hole Kalunga, hashi vulika kuye noshe mu dhama.’

Kunena, nangoye owu na ehogololo lya faathana, nolyo tali ku utha nkene onkalamwenyo yoye tayi ka kala. Ngele owa hogolola okukala wu hole Kalunga, ho vulika kuye nowe mu dhama, osha yela kutya owa hogolola omwenyo, ano omwenyo gwaaluhe moparadisa kombanda yevi. Ihe oshike sha kwatelwa moonkatu adhihe ndhoka?

Ohole oyo uukwatya waKalunga wa dhenga mbanda. Omuyapostoli Johannes okwa nwethwa mo a nyole ta ti: “Kalunga oye ohole.” (1 Johannes 4:8) Omolwetompelo ndika, sho Jesus a li a pulwa kutya oshipango oshinene shini shi vule iipango ayihe, okwa ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.” (Mateus 22:37) Ekwatathano naJehova Kalunga oli na okukala li ikolelela kohole, ihe hakokukala owala twe mu tila nenge hatu vulika kuye. Ihe omolwashike tu na okuhogolola okukala tu mu hole?

Ohole yaKalunga yokuhola aantu oya faathana naandjoka aavali haya kala ye nine oyana. Nonando inaya gwanenena, aavali mboka ye hole oyana ohaye ya longo, ladhipike, ambidhidha noku ya pukulula, oshoka oya hala oyana ya kale ya nyanyukwa noya pondole monkalamwenyo. Oshike mbela aavali haya kala ya tegelela koyana? Oya hala oyana ya kale ye ya hole noya vulike kwaashoka taye ya longo, opo shi ya kwathele. Mbela kashi li mondjila sho Tate yetu gwomegulu a tegelela  tu kale tu mu hole nohatu mu pandula omolwaashihe shoka e tu ningila?

MOmbiimbeli iitya “vulika” nosho wo “pulakena” ohayi vulu okugandja eityo lya faathana. Onkee ano, uuna tatu lombwele okanona tatu ti: “Pulakena kaavali yoye,” otatu ka lombwele ka vulika kaavali yako. Ano okupulakena kuKalunga otashi ti kutya otu na okutseya shoka te tu lombwele nokuvulika kusho. Molwaashoka ihatu vulu okuuva ewi lyaKalunga lyo lyene, ohatu vulika kuye mokulesha nomokutula miilonga shoka shi li mOohapu dhe, Ombiimbeli. — 1 Johannes 5:3.

Opo Jesus u ulike kutya okupulakena kuKalunga okwa simana, oshikando shimwe okwa tile: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mateus 4:4) Okutseya Kalunga okwa simanenena kutse ku vulithe nokuli piikulya. Omolwashike mbela? Omukwaniilwa omunandunge Salomo okwe shi yelitha a ti: “Owino oyo egameno, ngaashi iimaliwa oyo egameno, ihe ekwatho lyuunongo olyo ndika — owino otayi gamene omwenyo gwamwene gwayo.” (Omuuvithi 7:12) Owino nuunongo mboka hawu zi kuKalunga, otawu vulu oku tu gamena kunena noku tu kwathela tu ninge ehogololo lyopandunge ndyoka tali ke tu petha omwenyo gwaaluhe monakuyiwa.

Dhiladhila kethaneko lyaJesus ndyoka twa lesha moshitopolwa sha tetekele moka a ti: “Osheelo shoka oshishona nondjila ndjoka ya thinana otayi fala komwenyo, naashona yowala mboka taye yi mono.” (Mateus 7:13, 14) Sho tatu ende mondjila ndjoka, otashi ka kala ekwatho enene ngele otwa kala tu na omuntu ngoka e yi shi nawa notwa kala popepi naye, opo e tu kwathele tu thike hoka yu uka, ano komwenyo gwaaluhe. Onkee ano, otu na etompelo ewanawa lyokukala popepi naKalunga. (Episalomi 16:8) Ihe ongiini tatu vulu oku shi ninga?

Opu na iinima oyindji mbyoka tu na okuninga esiku kehe nayilwe oyindji mbyoka hatu kala twa hala okuninga. Iinima mbyoka otayi vulu okumana po ethimbo lyetu nenge yi tu imbe kaatu kale tu na ethimbo lyokudhiladhila shoka Kalunga a hala tu ninge. Nomolwaashono Ombiimbeli tayi tu dhimbulukitha tayi ti: “Ikonakoneni ano nawa, nkene mu na okukala. Inamu kala ngashika omagoya, kaleni ngaashi aanandunge. Longitheni nawa ethimbo kehe mu li na, oshoka omasiku ngaka omawinayi.” (Aaefeso 5:15, 16) Ngele ekwatathano lyetu naJehova olyo lya kala oshinima sha simanenena monkalamwenyo yetu, otatu kala popepi naye. — Mateus 6:33.

Nonando kapu na shoka to vulu okuninga, opo wu lundulule onakuziwa yoye, oto vulu okuninga po sha, opo ngoye noyaandjeni mu ka kale mu na onakuyiwa ombwanawa. Ombiimbeli otayi popi kutya Tate yetu gwomegulu, Jehova Kalunga, oku tu hole lela nonokutya ohe tu tseyithile shoka a hala tu ninge. Tala shoka oohapu dhomupolofeti Mika tadhi ti:

“Omuwa okwe tu lombwela shoka shu uka. Shoka te tu pula, osho okulonga shoka shu uka, oku mu ulukila ohole yashili nokukala muukumwe nomeifupipiko naKalunga ketu.” — Mika 6:8.

Oto ka taamba ko ngaa ehiyo lyaJehova lyokweenda pamwe naye, opo wu ka mone omayambeko taga kalelele ngoka e nine mboka taye shi ningi? Ehogololo olyoye.