¿ATISUNMANCHU AJLLAYTA IMAYNACHUS KAUSAYNINCHEJ KANANTA? Wakin runasqa ninku, imaynachus kausayninchej kananqa qhelqasqaña kasqanta. Wakintaj ninku: “Diosninchej sapa ujpaj uj ñanta churapuwanchejña”, nispa. Chayrayku imallapis mana munasqankuman jinachu llojsin chayqa, ninku: “Ajinapunichá kanan karqa”, nispa.

Wakin runastaj llakiykunata, imaymana sajra ruwaykunatawan rikuspa, sonqo pʼakisqa kanku. Sumajta kausakunankupaj tukuy imata ruwajtinkupis, jinallapi ima llakiypis paykunata qhatirin. Ichá kanman uj guerra, suwas, onqoykuna chayri waj jatuchaj llakiykuna. Ajinapi rikukuspa, tukuy ima ruwasqanku qhasillapaj kasqanta yuyanku.

Ima llakiypis jinallamanta rikhurejtin, kausayninchejqa mana munasqanchejman jinapunichu kanman (Eclesiastés 9:11). Jinapis wiñay kausayta japʼinanchejqa, sapa ujmanta kashan. Bibliaqa chayta willawanchej. Kunan chaymanta yachakuna.

Israelitas Sumaj Jallpʼaman yaykunankupajña kashajtinku, Jehová Diosqa kamachin Moisesnejta paykunaman nerqa: “Ñawpaqeykichejman churani kawsayta, wañuytawan chantá bendicionta, maldiciontawan, chaykunamanta ajllakunaykichejpaj. Kawsayta ajllakuychej ari, jinamanta qankuna, wawasniykichej ima kawsanaykichejpaj. Señorniykichej Tata Diosta munakuychej, kasuychejtaj; payllata qhatiychej”, nispa (Deuteronomio 30:15, 19, 20).

“Ñawpaqeykichejman churani kawsayta, wañuytawan chantá bendicionta, maldiciontawan, chaykunamanta ajllakunaykichejpaj. Kawsayta ajllakuychej” (Deuteronomio 30:19).

Diosqa israelitasta Egipto suyupi esclavos kasqankumanta librarqa. Chantá paykunaman nerqa, Sumaj Jallpʼapi kusiy kausayta qonanta. Jinapis chay bendicionta japʼiyta munaspaqa, ‘kausayta ajllakunanku’ karqa. Israelitasqa kausayta ajllasqankuta rikuchinkuman karqa, Diosta munakuspa, payta kasukuspa, payllatataj qhatispa.

Noqanchejpis israelitas jinallataj ajllakunanchej kashan. Chay ajllasqanchejman jinataj, aswan qhepaman kausayninchej kanqa. Sichus Diosta munakuyta, kasukuyta, payllatataj qhatiyta ajllakusun chayqa, kay jallpʼapi wiñaypaj kusisqa kausakusun. Imaynatachus chayta ruwanamanta parlarina.

Apóstol Juanqa nerqa: “Diosqa munakuymin”, nispa (1 Juan 4:8). Jesustaj chayta sumajta yacharqa. Chayrayku mayqenchus kuraj kamachiy kasqanta tapojtinku, pay nerqa: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj”, nispa (Mateo 22:37). Diosninchejmanqa qayllaykunanchej tiyan payta munakusqanchejrayku, manataj manchachikusqanchejraykuchu, nitaj chʼinsitumanta kasukuna kasqanraykuchu. ¿Diosta munakunapunichu tiyan?

Tataswan mamaswanqa pantaj runas kaspapis, wawasninkuta mayta munakunku. Chayrayku wawasninkuta yachachinku, kallpachanku, yanapanku, kʼaminku ima. Chantapis wawasninku kusisqa, sumajtataj kausakunankuta munanku. Tatasqa munallankutaj, wawasninku paykunata munakunankuta, kasukunankuta, entiendenankutataj allinninkuta munasqankuta. Jehová Diosninchejqa ajinallatataj munakuwanchej. Jinapis tatasmanta nisqaqa,  payqa ni imapi pantanchu. Tatanchej Jehovaqa munan payta munakunanchejta, tukuy imata qowasqanchejmanta agradecekunanchejtapis.

Diosta kasukunapajqa, imatachus niwasqanchejta yachananchej tiyan. Jinapis, ¿imaynatá Diosta uyarisunman? Diospa nisqantaqa yachasunman Bibliata leespa, leesqanchejta kasukuspa ima (1 Juan 5:3).

Jesusqa Diosninchejta kasukunapuni kasqanta nerqa. Chaytataj kay nisqanpi reparanchej: “Runaqa mana tʼantallawanchu kausanqa, astawanqa Jehová Diospa siminmanta tukuy llojsimoj palabraswan kausanqa” (Mateo 4:4). Kausanapajqa mikhunanchejpuni tiyan, jinapis Diosmanta yachakoyqa aswan sumajpuni. ¿Imaraykutaj? Bibliapi may yachayniyoj rey nerqa: “Yachaywan, qolqewanqa jarkʼakuna escudo jina kanku. Yachayrí astawanraj yanapan, imaraykuchus kawsayta qon pichus yachayta taripajman”, nispa (Eclesiastés 7:12). Diosqa yachayta, yuyaytawan qowasunman. Chaytaj kay tiempopi ashkha llakiykunamanta librawasunman, wiñay kausayman pusaj ñanmantaj churawasunman.

Jesuspa ujnin kikinchayninmanta parlarerqanchejña. Pay nerqa: “Punkoqa kʼullkumin, kʼullkullataj kausayman pusaj ñanpis, chayta tarejkunaqa pisilla kanku”, nispa (Mateo 7:13, 14). Sapallanchejmantaqa wiñay kausayman pusaj ñanta mana puriyta atisunmanchu. Chayrayku Tata Diosninchejta qhatikunanchej tiyan (Salmo 16:8). ¿Imaynatá chayta ruwasunman?

Sapa día ashkha ruwanasniyoj kanchej, astawantaj ruwayta munasunman. Mana tiempoyoj purisqanchejrayku, Diosninchejmanta qonqakapusunman. Chayraykuchá Biblia jinata niwanchej: “Allinta qhawarikuychej imaynatachus kausashasqaykichejta. Ama wampus jina kausaychejchu, manachayqa yachayniyojkuna jina. Tiempoykichejta ama usuchiychejchu. Imaraykuchus sajra pʼunchaykunapi kausashanchej” (Efesios 5:15, 16). Diosman qayllaykuyta munaspaqa, payta kausayninchejpi ñaupajman churananchej tiyan (Mateo 6:33).

Ñaupa kausayninchejtaqa mana allinchayta atisunmanchu. Jinapis sapa ujninchejmanta kashan, familianchejwan khuska sumaj kausaypi kananchejqa. Bibliaqa niwanchej, Tatanchej Jehová maytapuni munakuwasqanchejta. Chantá willallawanchejtaj, imatachus Diosninchej kamachiwasqanchejta. Payqa kamachin Miqueasnejta jinata niwanchej:

“Tata Diosqa nisunkiña imachus allin kasqanta. Payqa kayta munan ruwanaykita: Cheqan kajta ruwanaykita, khuyakuyta munakunaykita, Diosniykimantaj kʼumuykunaykita” (Miqueas 6:8).

Diosninchejqa chayta kasukojkunaman, may chhika bendicionesta qonanta nin. Sichus payta kasukuyta ajllanki chayqa, qanpis chay bendicionesta japʼillankitaj. Imatachus ruwanaykeqa qanmanta kashan.