NE SINTTANAA DEˈOY AY MALA GIDANAAKKO NEENI DOORANA DANDDAYIYOOBI TUMUPPE DEˈII? Issi issi asay eta sinttanaa deˈoy eti dooriyoobaara gidennan, kaseti kuuyetti uttida qaadaara gayttidaba giidi qoppees. Eti halchchido issibay polettennan attiyo wode, hegee kaseti kuuyettidabadan qoppoosona. Eti, “Simi hegee ta qaada!” goosona.

Harati qassi pirddi baynna ha iita alamiyan deˈanaappe attin hara dooroy baynnaagaa qoppiyo wode azzanoosona. Eti kaseegaappe loˈˈo deˈuwaa deˈanawu baaxetikkonne, olay, danoy, meretay gattiyo daafay qassi harggee eti qoppidobay polettennaadan diggees. Yaatin eti, ‘Masho ekko!’ giidi aggibayoosona.

Nu deˈuwan gakkiya issi issibay nuuni halchchidobaa polennaadan xube gidana danddayiyoogee qoncce. (Eranchchaa 9:11) SHin sinttappe ay mala deˈo deˈanaakko ne huuphe doorana danddayaasa. Ne sinttanaabay ne dooriyoobaara gayttidaba gidiyoogaa Geeshsha Maxaafay yootees. I giyoobaa beˈa.

Beni Israaˈeela deriyaa kaalettida Muusee Israaˈeelati Hidootaa Biittaa gelanawu matido wode hagaadan giis: “Taani intte sinttan de7uwaanne haiquwaa, anjjuwaanne qanggettaa [wottaas]; . . . simmi inttenne intte zaree de7uwan de7ana mala, de7uwaa doorite. GODAA intte Xoossaa siiqite; a qaalaa siyite, ayyo azazettite; aara ohettite.”—Zaarettido Wogaa 30:15, 19, 20.

‘Taani intte sinttan deˈuwaanne hayquwaa, anjjuwaanne qanggettaa wottaas; deˈuwaa doorite.’—Zaarettido Wogaa 30:19

Ee! Xoossay Israaˈeelata Gibxxe aylletettaappe kessidi eti laˈa gididi ufayttidi Hidootaa Biittan deˈanaagaa yootiis. SHin hegee coo haniyaaba gidenna. Eti he anjjota demmanawu ‘deˈuwaa doorana’ koshshees. Waatidi? ‘Xoossaa siiqiyoogaana, a qaalaa siyiyoogaananne aara ohettiyoogaana.’

Ha wodiyan, neenikka doorana koshshees; qassi ne dooriyoobay ne sinttanaa deˈuwaara gayttidaba. Xoossaa siiqanawu, A qaalaa siyanawunne aara ohettanawu dooriyoogan deˈuwaa, saˈay gannate gidin merinaa deˈuwaa dooraasa. SHin hegee woygiyoogee?

Siiqoy Xoossaa waanna eeshsha. Kiitettida Yohaannisi geeshsha ayyaanay denttettin “Xoossai siiqo” yaagidi xaafiis. (1 Yohaannisa 4:8) Higgiyaa giddon ubbaappe aadhdhiya azazoy awugaakko oychchin Yesuusi, “Neeni Godaa ne Xoossaa ne kumetta wozanaappe, ne kumetta shemppuwaappe, ne kumetta qofaappe siiqa” giidi zaaridoy hegaassa. (Maatiyoosa 22:37) Xoossaa Yihoowaara dabbotiyoy A siiqiyoogaanappe attin, yayyidi azazettiyoogaana gidenna. SHin nuuni A siiqanawu doorana koshshiyoy aybissee?

Yihooway asaa siiqiyo hanotay bantta naata siiqiya aawaagaanne aayyeegaa mala. Siiqiya aawatinne aayoti nagaranchcha gidikkokka, bantta naati ufayttanaadaaninne etawu deˈoy injjetanaadan eta tamaarissoosona, minttettoosona, kaafoosona qassi seeroosona. Yelidaageeti shin bantta naati waatanaadan koyiyoonaa? Naati eta siiqanaadaaninne maaddiya zoriyaa bantta wozanan wottanaadan koyoosona. Saluwan deˈiya, wottiyoobi baynna nu Aaway I nuussi oottido ubbabaa nuuni nashshiyoogaa bessanaadan koyiyoogee bessiyaaba.

Geeshsha Maxaafay koyro xaafettido doonan, “siya” giyoogee darotoo “azazetta” giyoogaa. Issi  guutta naˈaa, “Ne aawaynne aayyiyaa yootiyoobaa siya” giyoogeekka hegaa mala gidennee? Yaatiyo gishshawu, Xoossaa qaalaa siyiyoogaa giyoogee I giyoobaa eridi azazettiyoogaa giyoogaa. Nuuni Xoossaa cenggurssaa siyenna gishshawu, A Qaalaa Geeshsha Maxaafaa nabbabidi an deˈiyaabaa oosuwan peeshshiyoogan I yootiyoobaa siyoos.—1 Yohaannisa 5:3.

Xoossaa qaalaa siyiyoogee keehi koshshiyaaba gidiyoogaa qonccissanawu Yesuusi issi wode, “Asi Xoossai haasayiyo qaala ubban de7anaappe attin, oitta xalaalan de7enna” yaagiis. (Maatiyoosa 4:4) Qumay bollawu maaddiyoogaadan Xoossaabaa eriyoogeekka hegaappe aadhdhidi maaddees. Aybissi? Eranchcha Kawuwaa Solomoni hagaadan giis: “Miishshai asa iitaappe kammidi ashshiyoogaadan, aadhdhida eratettaikka ashshees. SHin, aadhdhida eratettai miishshaappe dariyoogee, i asassi de7o immanau danddayiyoogaana.” (Eranchchaa 7:12) Xoossay immiyo eraynne aadhdhida eratettay ha wodiyan nuna metuwaappe ashshees, qassi sinttappe merinaa deˈuwaa demmanaadan maaddiyaabaa dooranaadan oottees.

Hagaappe kasetiya huuphe yohuwan qonccida, Yesuusi yootido leemisuwaa hassaya: “De7uwau efiya penggee un77o; ogeekka xuntta. Qassi hegaara biya asatikka amaridaageeta.” (Maatiyoosa 7:13, 14) Hegaa mala ogiyan hemettiyo wode, nuuni halchchidosaa gakkanawu hegeekka, merinaa deˈuwaa demmanawu, kaalettiyoogan gooba gidida uraa zoriyaa loytti kaallana bessees. Yaatiyo gishshawu, nuuni ubbatoo Xoossaara dabbotidi deˈana bessees. (Mazamure 16:8) SHin waatidi hegaadan oottana danddayiyoo?

Galla galla, nuuni oottana koshshiya darobaynne nuuni oottana koyiyoy keehi darobay deˈees. Hegaa malabay nuna unˈˈettidi woy nu qofay shaahettanaadan oottidi, nuuni oottanaadan Xoossay koyiyoobaa qoppanawu nu wode xayanaadan oottana danddayees. Geeshsha Maxaafay hagaadan gees: “Intte waani de7iyaakko akeekite; aadhdhida eratettaara de7iya asadan de7iteppe attin, aadhdhida eratetti bainna asadan de7oppite. Wodee iita gidiyo gishshau, intte lo77o wodiyaa coo xaissoppite.” (Efisoona 5:15, 16) Nuuyyo Xoossaara deˈiya dabbotaa hara aybippenne sinttayiyoogan Xoossaakko shiiqidi deˈana danddayoos.—Maatiyoosa 6:33.

Ne deˈuwan haniichchidabaa laammana danddayennaba gidikkokka, neeninne ne siiqiyoogeeti sinttappe ufayssiya deˈo deˈanaadan doorana danddayaasa. Geeshsha Maxaafay saluwan deˈiya nu Aaway, Xoossaa Yihooway nuna keehi siiqiyoogaanne I nuuppe koyiyoobaa loytti qonccissees. Hananabaa yootiya Mikiyaasi giidobaa beˈa:

“Hai asau, GODAI neeyyo lo77obaa odi wottiisttenne. GODAI neeppe koyiyoogee aibee giikko, neeni suurebaa oottanaagaa, aggenna siiquwaa bessanaagaanne ashkketettan ne Xoossaara hemettanaagaa.”—Mikiyaasa 6:8.

Neenikka Yihoowa shoobiyaa siyada aara hemettuutee, qassi banaara hemettiyaageetuyyo I giigissi wottidobaa ekkuutee? Dooroy nebaa!