“E Mau Anai E Te Kau Agavaivai Te Kele”
Neʼe kua lagi tou sisio fuli pe ki he ʼu aluʼaga heʼe faitotonu. Pea mo te gaohi koviʼi ʼo te hahaʼi agalelei e te kau agakovi. ʼE feala anai koa ke pulihi ʼi he temi te heʼe faitotonu mo te agakovi?
ʼI te Tohi-Tapu ʼi te Pesalemo 37 MN, ʼe maʼu ai he tali mo he takitaki kia tatou ia ʼaho nei. Tokagaʼi age muʼa te tali ʼo te ʼu fehuʼi ʼaeni:
Kotea ʼae ʼe tonu ke tou fai kia natou ʼae ʼe natou gaohi koviʼi tatou?—Vaega 1, 2.
Kotea anai ka hoko ki te kau agakovi?—Vaega 10.
Kotea anai te ka haʼu ʼo natou ʼae ʼe natou fai te meʼa ʼae ʼe lelei?—Vaega 11, 29.
Kotea ʼae ʼe tonu ke tou fai ʼi te temi nei?—Vaega 34.
ʼE fakamahino lelei mai ʼi te Pesalemo 37 te ka haʼu taulekaleka ʼo natou ʼae ʼe ‘ ʼamanaki kia Sehova mo tauhi tona ʼala.’ ʼE fiafia anai te kau Fakamoʼoni ʼa Sehova ʼi te tokoni atu kia koe ke ke ako te Tohi-Tapu. Pea ke ke falala ʼe hoko moʼoni anai te ʼu fakapapau kia koe totonu pea mo natou ʼae ʼe ke ʼofa ai.