«Bʼar wank chaq li Yos?»
«JUNELIK NAYEEMANK AʼIN: BʼAR WANK CHAQ LI YOS?» (Li papa Benedicto XVI, naq kiwulak saʼ li tzʼalam re Auschwitz [Polonia]).
MA AK XAAKʼOXLA JUNSUTAQ LI PATZʼOM AʼIN NAQ XAAKʼUL JUN LI RAHILAL? MA AK XAAKʼUL JUNAQ LI NIMLA RAHILAL LI KIXBʼAANU NAQ TAAKʼOXLA NAQ LI YOS INKʼAʼ NAXKʼE XCHʼOOL CHAAWIX?
Li xSheila li wank Estados Unidos kikʼiik saʼ jun li junkabʼal li wank xpaabʼal. Aʼan naxye: «Chalen chaq saʼ linkachʼinal ninpaabʼ naq wank li Yos, xbʼaan naq aʼan kiyobʼtesink qe. Abʼan moko xinwank ta saʼ amiiwil rikʼin. Usta ninnaw naq nikinril, xinkʼoxla naq inkʼaʼ naxkʼe xchʼool chiwix. Ninnaw naq moko xikʼ ta nikinril, abʼan ninkʼoxla naq moko nikinxra ta». Kʼaʼut kixkʼoxla li xSheila naq moko naraheʼk ta xbʼaan li Yos? Aʼan kixye: «Linjunkabʼal kixkʼul naabʼal li rahilal ut chanchan tawiʼ naq maakʼaʼ naraj re li Yos li yooko xkʼulbʼal».
Joʼ li xSheila, maare nakaapaabʼ naq wank li Nimajwal Yos, abʼan maare nakaakʼoxla naq moko naxkʼe ta xchʼool chaawix. Aʼin kikʼulmank rikʼin laj Job, jun li chaabʼil winq li naxpaabʼ li xwankil ut li xchoxahil naʼlebʼ li Yos (Job 2:3; 9:4). Naq ak kixkʼul li rahilal saʼ reqaj ribʼ ut inkʼaʼ chik naxkuy, kixye re li Yos: «Kʼaʼ naq nakamuq aawibʼ chiwu? Kʼaʼut naq xikʼ nikinaawil?» (Job 13:24).
Abʼan, kʼaru naxye li Santil Hu? Ma li Yos nakʼamok chaq re li rahilal? Ma naxkʼe xchʼool chirixebʼ chixjunil li kristiʼaan ut ma nokooril chiqajunqal? Ma naru tawiʼ xnawbʼal ma naxnaw qu, naxtaw qu ut nokooxtenqʼa naq wanko saʼ junaq li rahilal?
Saʼebʼ li junchʼol chik chi tzolom, tqil chanru naxkʼut li yobʼtesihom ut li Santil Hu naq li Yos naxkʼe xchʼool chiqix (Romanos 1:20). Naq taanaw ru chiʼus laj Yobʼtesinel taakʼe reetal naq qʼaxal wiʼ chik nakatxra (1 Juan 2:3; 1 Pedro 5:7).
Maare twulaq ajwiʼ chaawu
LAJ KʼAAKʼALEHOM
Ma naxkʼe xchʼool li Yos chaawix?
Kʼaru naxkʼutbʼesi naq li Yos naxkʼe xchʼool chaawix?
